EU​អំពាវនាវ​ឲ្យ​រុស្ស៊ី​ដោះលែង​លោក​Navalny​អ្នកនយោបាយ​ប្រឆាំង​ជាបន្ទាន់​

22-01-2021 10:36 am 254

​ប្រធាន​ក្រុមប្រឹក្សា​អឺរ៉ុប​លោក​Charles Michel​នៅ​ថ្ងៃ​ព្រហស្បត្តិ៍ បាន​អំពាវនាវ​ឲ្យ​រុស្ស៊ី​ដោះលែង​ជាបន្ទាន់ នូវ​អ្នកនយោបាយ​ប្រឆាំង​រុស្ស៊ី​ដ៏​លេចធ្លោ​មួយរូប គឺ​លោក​Alexei Navalny​។ លោក​Navalny​ត្រូវបាន​ចាប់ខ្លួន​នៅ​ថ្ងៃអាទិត្យ ក្រោយ​ត្រឡប់​មកពី​ព្យាបាល​ជំងឺ​នៅ​ប្រទេស​អាល្លឺម៉ង់​កាលពី​ចុង​សប្តាហ៍​មុន​។ មុន​ចាកចេញ​ពី​អាល្លឺម៉ង់​លោក​Navalny​ដែល​ទើបតែ​ជាសះស្បើយ​ពី​ជំងឺ បាន​អះអាងថា​នឹង​ត្រឡប់​ទៅ​ប្រទេស​រុស្ស៊ី​វិញ បើទោះបីជា​ប្រឈម​នឹង​ការចាប់ខ្លួន​យ៉ាងណាក៏ដោយ​។ នៅ​ទីបំផុត លោក​ត្រូវបាន​ចាប់ខ្លួន​និង​បញ្ជូនទៅ​មន្ទីរឃុំឃាំង​រយៈពេល​៣០​ថ្ងៃមុន​កាត់ទោស​។ សេវាកម្ម​ពន្ធនាគារ​រុស្ស៊ី​និយាយថា ការ​ចាប់ឃុំខ្លួន​អ្នកនយោបាយ​ប្រឆាំង​រុស្ស៊ី​រូបនេះ ដោយសារតែ​លោក​រំលោភ​លើ​លក្ខខណ្ឌ​នៃ​ការកាត់ទោស​ដែល​ត្រូវបាន​ព្យួរទោស​នោះ​។ លោក​Navalny​ត្រូវបាន​ចោទប្រកាន់​ពីបទ​ឆបោក​កាលពី​ឆ្នាំ​២០១៤ តែ​លោក​Navalny​អះអាងថា ការប្រើប្រាស់​ប្រព័ន្ធតុលាការ​ដាក់​សម្ពាធ​លើ​រូបលោក គឺ​ក្រោម​ហេតុផល​នយោបាយ​តែប៉ុណ្ណោះ​។​

​គួរ​ជម្រាបជូន​ថា លោក​Navalny​ត្រូវបាន​ក្រុមគ្រួសារ និង​ប្រទេស​មួយចំនួន​ជាពិសេស​អាល្លឺម៉ង់ អន្តរាគមន៍​បញ្ជូនទៅ​ព្យាបាល​ជំងឺ​នៅ​ក្រុង​ប៊ែក​ឡាំង ក្រោយ​លោក​ធ្លាក់ខ្លួន​ឈឺ​ភ្លាមៗ​នៅលើ​យន្តហោះ កាលពី​ខែសីហា​ឆ្នាំ​២០២០ បន្ទាប់ពី​ផឹក​តែ​នៅ​ហាង​កាហ្វេ​នៅ​ព្រលានយន្តហោះ​Tomsk​។ បើតាម​អធិការបតី​អាល្លឺម៉ង់​លោកស្រី​Angela Merkel​និយាយ​ដោយ​យោងទៅលើ​លទ្ធផល​នៃ​ការធ្វើ​តេស្ត ដោយ​មន្ទីរពិសោធន៍​ក​ង​ទ័ព​អាល្លឺម៉ង់​ថា មាន​ភ័ស្តុតាង​ច្បាស់​ដែលថា​អ្នកនយោបាយ​ប្រឆាំង​រុស្ស៊ី​លោក​Alexei Navalny​ត្រូវបាន​បំពុល ដោយសារ​ធាតុគីមី​ដែល​អាច​បំផ្លាញ​ប្រព័ន្ធ​ប្រសាទ​បាន​។ សារធាតុ​គីមី​នោះ​ឈ្មោះថា Novichok ផលិត​ដោយ​សហភាពសូវៀត​ក្នុង​ទសវត្ស​ឆ្នាំ​១៩៧០​និង​១៩៨០​។ តែ​គ្រូពេទ្យ​ក្នុងស្រុក​អះអាងថា មិនបាន​រកឃើញ​សារធាតុពុល​ក្នុង​ខ្លួន​លោក Navalny​ឡើយ អំឡុងពេល​លោក​សម្រាក​ព្យាបាល​ជំងឺ​រយៈពេល​ខ្លី​នៅ​រុស្ស៊ី មុន​ផ្លាស់​ទៅ​ព្យាបាល​នៅ​ក្រៅប្រទេស ក្នុងស្ថានភាព​សន្លប់​ស្តូកស្តឹង​។ 

​លោក​Navalny​និយាយថា​លោក​វ្លា ឌី​មៀ ពូ​ទីន​ប្រធានាធិបតី​រុស្ស៊ី​ជា​អ្នក​នៅ​ពីក្រោយ​ការពុល​លោក​កាលពី​ខែ​សីហា តែ​វិមាន​ក្រឹម​ឡាំង​បាន​បដិសេធ​។ ពាក់ព័ន្ធ​នឹង​ករណីនេះ ថ្លែង​បន្ទាប់ពី​កិច្ចប្រជុំ​របស់​មេដឹកនាំ​សហភាព​អឺរ៉ុប​លោក​Charles Michel​បាន​ប្រាប់​អ្នកយកព័ត៌មាន​ថា ការស៊ើបអង្កេត​អន្តរជាតិ​ដោយ​មិន​លម្អៀង គួរតែ​ត្រូវបាន​ធ្វើឡើង​ក្រោម​ការគាំទ្រ​របស់​អង្គការ​ហាមឃាត់​អាវុធ​គីមី ទៅនឹង​អ្វីដែល​បាន​កើតឡើង​ចំពោះ​លោក​Navalny​។​

​លោក​Alexei Navalny​វ័យ​៤៤​ឆ្នាំ ជា​សមាជិក​ក្រុមប្រឹក្សា​សម្របសម្រួល​ប្រឆាំង​រុស្ស៊ី​និង​ជា​មេដឹកនាំ​គណបក្សប្រឆាំង​Progress Party និង​ជា​សកម្មជន​ប្រឆាំង​អំពើពុករលួយ​។ លោក​បាន​លេចធ្លោ​ជា​អន្តរជាតិ តាមរយៈ​ការរៀបចំ​បាតុកម្ម​និង​ការតស៊ូ​មតិ ដើម្បី​គាំទ្រ​ការធ្វើកំណែទម្រង់​ប្រឆាំងនឹង​អំពើពុករលួយ​នៅ​ប្រទេស​រុស្ស៊ី​,​ប្រធានាធិបតី​រុស្ស៊ី​លោក​វ្លា ឌី​មៀ​ពូ​ទីន​និង​រដ្ឋាភិបាល​របស់លោក​។ ក្នុង​ឆ្នាំ​២០១២​កាសែត​The Wall Street Journal​បាន​ពិពណ៌នា​លោក​Alexei Navalny​ថា​ជា​“ បុរស​ដែល​លោក​វ្លា ឌី​មៀ​ពូ​ទីន​ខ្លាច​បំផុត​”៕ ដោយ​៖​អ៊ុន សុខ​ឡា​

 ពាក្យគន្លឹះ  រុស្ស៊ីUE​ លោក​AlexeiNavalny

ព័ត៌មានផ្សេងទៀត