អាមេរិក​ទទូច​ឲ្យ​ចិនបើកផ្លូវ​សម្រាប់​អ្ន​ក​វិទ្យាសាស្ត្រ​ចូល​ស្វែងរក​ប្រភពដើម​កូវី​ដ​-១៩

19-01-2021 11:48 am 366

​សហរដ្ឋអាមេរិក​នៅ​ថ្ងៃ​ចន្ទ​ទី​១៨​ខែ​មករា​ឆ្នាំ​២០២១ បាន​ទទូច​ឲ្យ​ប្រទេស​ចិន​អនុញ្ញាត ក៏ដូចជា​បើកផ្លូវ​សម្រាប់​ក្រុម​អ្នកវិទ្យសាស្ត្រ​មក​ពី​អង្គការ​សុខភាព​ពិភពលោក​(WHO)​បាន​ចូល​ទៅ​កាន់​ទីក្រុង​វូ​ហាន ដើម្បី​ស្វែងរក​ប្រភពដើម​នៃ​វីរុស​កូរ៉ូ​ណាឬកូវី​ដ​-១៩​។ 

​សូមបញ្ជាក់​ថា ការ​ទទូច​ពី​សំណាក់​របស់​អាមេរិក​ដល់​រដ្ឋាភិបាល​ចិន​ក្នុង​ការបើក​ផ្លូវដល់​ក្រុម​អ្នកវិទ្យាសាស្ត្រ​មកពី​អង្គការ​សុខភាព​ពិភពលោក​នេះ​ដែរ ធ្វើឡើង​បន្ទាប់​ពី​អាជ្ញាធរ​សុខាភិបាល​ចិន​កាលពី​ថ្ងៃ​ទី​១១​ខែ​មករា​បាន​អះអាងថា ក្រុម​អ្នកជំនាញ​អន្តរជាតិ​នៃ​អង្គការ​សុខភាព​ពិភពលោក ដែល​មាន​ភារកិច្ច​ស៊ើបអង្កេត​ពី​ប្រភពដើម​នៃ​ជំងឺ​រាតត្បាត​កូវី​ដ​១៩ នឹង​ទៅ​ដល់​ប្រទេស​ចិន​នៅ​ថ្ងៃ​ទី​១៤​ខែ​មករា​ឆ្នាំ​២០២១​។ ម្យ៉ាងទៀត ការប្រកាស​ពី​កាលបរិច្ឆេទ​នៃ​ការ​មក​ដល់​ប្រទេស​ចិន ដោយ​អ្នកជំនាញ​ស៊ើបអង្កេត​អន្តរជាតិ ធ្វើឡើង​បន្ទាប់​ពី​ត្រូវបាន​ពន្យារពេល​កាលពីដើម​ខែ​មករា​នេះ ក្រោម​មូលហេតុ​ដែល​ចិន​លើកឡើងថា មាន​ការយល់ច្រឡំ​គ្នា​លើ​បញ្ហា​មួយចំនួន​។​

​បើ​តាម​លោក​Garrett Grigsby ប្រធាន​គណៈប្រតិភូ​សហ​រដ្ឋ​អាមេរិក​បាន​និយាយថា ប្រទេស​ចិន​គួរតែ ចែករំលែក​រាល់​ការ​សិក្សា​វិទ្យាសាស្ត្រ​ទាក់ទង​នឹង​គំរូ​របស់​មនុស្ស សត្វ និង​បរិស្ថាន ដែល​យក​ចេញពី​ទីផ្សារ​ក្នុង​ទីក្រុង​វូ​ហាន ដែល​ជា​កន្លែង​ត្រូវបាន​គេ​ជឿ​ថា​ជា​ដើម​កំណើត​ដំបូងបង្អស់​នៃ​វីរុស​សកល​កូវី​ដ​-១៩​នេះ​។​

​ជា​ការឆ្លើយតប លោក​ស៊ុន​យ៉ាង អគ្គនាយក​ការិយាល័យ​ប្រតិកម្ម​រហ័ស​ផ្នែក​សុខភាព​នៃ​គណៈ​កម្មា​ធិ​សុខាភិបាល​ជាតិ​ចិន​បាន​ប្រាប់​ក្រុម​ប្រឹក្សា​ភិបាល​ថា ការសិក្សា​ពី​ប្រភពដើម​វីរុស​កូវី​ដ​-១៩​ត្រូវតែ​មាន​លក្ខណៈ​វិទ្យាសាស្ត្រ និង​ត្រូវការ​ការសម្របសម្រួល ការ​សហប្រតិបត្តិការ ពិសេស​លោក​បាន​ទទូច​ឲ្យ​លុបបំបាត់​ចោល​នូវ​និន្នាការ​នយោបាយ​។​

​គួរ​ជម្រាប​ថា ចិន​បាន​ក្លាយជា​គោលដៅ​នៃ​ការស៊ើបអង្កេត​រក​ប្រភព​ដើម​នៃ​វីរុស​កូរ៉ូ​ណាឬកូវី​ដ​-១៩ ដោយសារ​តែ​វីរុស​នេះ​ត្រូវបាន​គេ​ដឹងថា​ផ្ទុះ​ឡើង​ដំបូង​បំផុត នៅក្នុង​ទីក្រុង​វូ​ហាន​ប្រទេស​ចិន​នៅ​ចុងឆ្នាំ​២០១៩ មុន​បន្ត​រីក​រាលដាល​ទៅ​ទូទាំង​ពិភពលោក​រហូតមកដល់​បច្ចុប្បន្ន​។ នៅពេលដែល​មិន​ទាន់​ដឹង​ថា​វីរុស​នេះ មាន​ប្រភព​មក​ពី​ទីកន្លែង​ណា​ឬ​ពី​អ្វី​ឲ្យ​ពិតប្រាកដ មាន​ការសន្និដ្ឋាន​ខុសគ្នា​ជាច្រើន ពាក់ព័ន្ធ​នឹង​ប្រភព​ដើម​របស់​វីរុស ដោយ​ខ្លះ​សង្ស័យ​ថា​វីរុស​អាច​ផ្ទុះ​ចេញ​ពី​ផ្សារ​លក់​សាច់​សត្វព្រៃ​ក្នុង​ទីក្រុង​វូ​ហាន​។ ដោយឡែក​សម្រាប់​អាមេរិក​វិញ លោក​ដូណាល់ ត្រាំ​បាន​ចោទប្រកាន់​ប្រទេស​ចិន​ចំៗ​ថា វីរុស​នេះ​លេច​ធ្លាយ​ចេញពី​មន្ទីរពិសោធន៍​មេរោគ ដែល​មាន​ទីតាំង​នៅក្នុង​ទីក្រុង​វូ​ហាន​ប្រទេស​ចិន​។ ប៉ុន្តែ​ចិន​បាន​បដិសេធ​ចំពោះ​ការចោទប្រកាន់​ដោយ​គ្មាន​ភ័ស្តុតាង​ច្បាស់លាស់​ទាំងនេះ​។​

​តួយ៉ាង សម្រាប់​គោលបំណង​នៃ​ការបើក​ការស៊ើបអង្កេត​លើ​វីរុស​កូវី​ដ​-១៩ បើ​តាម​អ្នកជំនាញ​ស្រាវជ្រាវ​ដែល​ធ្វើដំណើរ​ទៅ​ទីក្រុង​វូ​ហាន ធ្លាប់បាន​ប្រាប់​ទីភ្នាក់ងារ​សារព័ត៌មាន​AP​ថា វា​មិនមែន​ជា​ចេតនា​ដើម្បី​ស្តីបន្ទោស​លើ​ចិន​ឡើយ តែ​ផ្ទុយទៅវិញ​ដើម្បី​រកឲ្យឃើញ​ប្រភព​ដើម​ដែល​ជំងឺ​ផ្ទុះឡើង ដើម្បី​ការពារ​ការ​ផ្ទុះ​ឡើង​ជា​ថ្មី​នៅពេល​អនាគត​៕ ដោយ​៖ យឺន សីហា​

ព័ត៌មានផ្សេងទៀត