ហុងកុង​ស្ដីបន្ទោស​ខ្លាំងៗ​ទៅ​អាមេរិក​ក្រោយ​ដាក់ទណ្ឌកម្ម​លើ​មន្ត្រី​៦​រូប​របស់​ខ្លួន​

16-01-2021 4:45 pm 384

​ទីក្រុង​ហុងកុង​នៅ​ថ្ងៃ​សៅរ៍​ទី​១៦​ខែ​មករា បាន​ស្ដីបន្ទោស​ខ្លាំងៗ​ទៅ​សហរដ្ឋអាមេរិក ជុំវិញ​ការដាក់ទណ្ឌកម្ម​ចុង​ក្រោយ​លើ​មន្ត្រី​០៦​រូប​របស់​ខ្លួន និង​បោះពាក្យ​ដាក់​អាមេរិក​ថា ឆ្កួត​ល្ងង់​និង​គួរឲ្យ​ស្អប់ខ្ពើម​បំផុត​។ នេះ​បើ​ដកស្រង់​ចេញពី​ការចុះផ្សាយ​ដោយ​បណ្ដាញ​សារព័ត៌មាន​CNA​។​

​ការចេញមុខ​ស្ដីបន្ទោស​ខ្លាំងៗ​ពី​សំណាក់​ទីក្រុង​ហុងកុង​លើ​អាមេរិក ធ្វើឡើង​បន្ទាប់​ពី​អាមេរិក​បាន​ប្រកា​សពី​ការដាក់ទណ្ឌកម្ម​លើ​មន្ត្រី​ហុងកុង​ទាំង​០៦រូប​របស់​ហុងកុង​លោកស្រី​Carrie Lam​ជាដើម។ 

​គួរ​ជម្រាប​ថា ការប្រកាស​ដាក់​ទណ្ឌកម្ម​លើ​មន្ត្រី​សំខាន់ៗ​ទាំង ០៦​រូប​និង​មេដឹកនាំ​ក្រុង​ហុងកុង ដោយសារ​តែ​អាមេរិក​ខឹងសម្បារ​ទៅ​នឹង​រដ្ឋាភិបាល​ចិន ជុំវិញ​ការចាប់ខ្លួន​សកម្មជន​ហុងកុង​ជាច្រើន​នាក់​កាលពី​ពេល​កន្លង​ទៅ​។ ជាក់ស្ដែង​គណនេយ្យ​ធនាគារ​របស់​លោកស្រី​Carrie Lam នៅ​សហរដ្ឋអាមេរិក​ត្រូវ​បាន​បិទ​មិនឲ្យ​ប្រើប្រាស់​បាន​ទៀត​ឡើយ​។ ចំណែកឯ​មន្ត្រី​ចំនួន​០៥​រូប​ផ្សេង​ទៀត​របស់​ហុងកុង​ក៏​បាន​រង​ទណ្ឌកម្ម​ស្រដៀង​នឹង​លោកស្រី​Carrie Lam​ដូចគ្នា​ដែរ​។​

​តាមរយៈ​សេចក្តីថ្លែងការណ៍​មួយ​របស់​រដ្ឋាភិបាល​ក្រុង​ហុងកុង​បាន​សម្តែង​នូវ​កំហឹង​យ៉ាងខ្លាំង និង​បាន​ចោទ​អាមេរិក​ថា​លូកដៃចូលផ្ទៃក្នុង​របស់​ហុងកុង និង​រារាំង​កិច្ច​ប្រឹងប្រែង​របស់​ទីក្រុង​ហុងកុង​ក្នុង​ការការពារ​សន្តិសុខ​ជាតិ​។ 

​ការសម្រេច​ដាក់ទណ្ឌកម្ម​របស់​អាមេរិក​លើ​ហុងកុង កើតឡើង​បន្ទាប់ពី​អាមេរិក​បាន​ខឹងសម្បារ​នឹង​ការចាប់ខ្លួន​សកម្មជន​តវ៉ា​ចុងក្រោយបង្អស់​នៅ​ហុងកុង​កាលពី​ពេល​ថ្មីៗ​កន្លងទៅ​។ ការចាប់ខ្លួន​សកម្មជន​តវ៉ា​នេះ​ទៀតសោត ក៏​រួម​មាន​ទាំង​ជនជាតិ​អាមេរិក​ផង​ដែរ គឺ​លោក​មេធាវី​សិទ្ធិមនុស្ស​John Clancey​។​

​ជា​ការឆ្លើយតប​ទៅនឹង​ទណ្ឌកម្ម​អាមេរិក​នេះដែរ អ្នកនាំពាក្យ​រដ្ឋាភិបាល​ហុងកុង​បាន​និយាយ​នៅក្នុង​សេចក្តីថ្លែងការណ៍​មួយ​ថា រដ្ឋាភិបាល​សហរដ្ឋអាមេរិក​បាន​​កេងចំណេញ​លើ​ខ្លួន និង​ថា​អាមេរិក​បាន​ព្យាយាម​រក​លេស ដើម្បី​ធ្វើឲ្យ​មាន​ការនិយាយ​បង្កាច់បង្ខូ​ច​អំពី​ច្បាប់​សន្តិសុខ​ជាតិ​ថ្មី​ដែល​ទើប​នឹង​ដាក់​ចេញ​ដោយ​រដ្ឋាភិបាល​ចិន​កាលពី​ឆ្នាំមុន​តែប៉ុណ្ណោះ​៕ ដោយ​៖ យឺន សីហា​

 ពាក្យគន្លឹះ  ហុងកុងអាមេរិកចិន

ព័ត៌មានផ្សេងទៀត