វិទ្យាស្ថាន​មួយ​នឹង​បង្រៀន​កូន​ខ្មែរ​សាងសង់​ផ្លូវ​-​ស្ពាន ដោយ​មិន​ពឹង​បរទេស​

13-01-2021 9:22 am 826

​រាជរដ្ឋាភិបាល​កម្ពុជា តាមរយៈ​ក្រសួង​សាធារណការ និង​ដឹកជញ្ជូន បាន​សម្រេច​បង្កើត​វិទ្យាស្ថាន​បណ្តុះបណ្តាល​ជំនាញ​សាធារណការ និង​ដឹកជញ្ជូន​ជា​លើកដំបូង​នៅ​កម្ពុជា ដើម្បី​បង្កើន​ធនធាន​មនុស្ស​លើ​ជំនាញ​សាធារណការ និង​ដឹកជញ្ជូន ដោយ​ផ្តោតជាសំខាន់​លើ​ការបណ្តុះបណ្តាល​ជំនាញ​សាងសង់​ផ្លូវ និង​ស្ពាន​។​

​វិទ្យាស្ថាន​នេះ​មានឈ្មោះ​ថា «​វិទ្យាស្ថាន​តេជោ​សែន សាធារណការ និង​ដឹកជញ្ជូន​» បង្កើតឡើង​ក្រោម​ការ​ចាប់ដៃ​គ្នា​រវាង​ក្រសួង​សាធារណការ ជាមួយ​វិទ្យាស្ថាន​បច្ចេកវិទ្យា​កម្ពុជា​(​តិច​ណូ​) ដែល​ត្រូវបាន​ចុះ​អនុស្សារណៈ​យោគយល់​គ្នា កាលពី​ថ្ងៃ​ទី​១២ ខែ​មករា ក្រោម​វត្តមាន​លោក​ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន និង​លោក ហង់​ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា​។​

​លោក​រដ្ឋមន្ត្រី​ស៊ុន ចាន់ថុល បាន​លើកឡើង​ថា មាន​ស្នាដៃ​ជាច្រើន​ដែល​បុព្វបុរស​ខ្មែរ​បាន​កសាងឡើង​ក្នុង​សម័យ​អង្គរ ដូចជា​ប្រាសាទ និង​ស្ពាន​ដែល​មាន​អាយុកាល​រាប់ពាន់​ឆ្នាំ​នៅក្នុង​ខេត្ត​សៀមរាប​។ ប៉ុន្តែ​ហេតុ​អ្វី​បាន​ជា​ខ្មែរ​នា​ពេលបច្ចុប្បន្ន​មិន​អាច​សាងសង់​ស្ពាន​ឆ្លងកាត់​ទន្លេមេគង្គ ទន្លេបាសាក និង​ទន្លេសាប​បាន​។ ដូច្នេះ​លោក​សង្ឃឹមថា វិទ្យាស្ថាន​នេះ នឹង​រួមចំណែក​បណ្តុះបណ្តាល​កូន​ខ្មែរ​ក្នុង​ការសាងសង់​ផ្លូវ ស្ពាន ដោយ​មិន​ពឹង​លើ​អ្នកជំនាញ​បរទេស​ទៀត​នោះទេ​។​

​ជាមួយគ្នានេះ លោក​រដ្ឋមន្ត្រី​ហង់ ជួន​ណារ៉ុន ក៏​បង្ហាញ​ក្តីសង្ឃឹម​ដូចគ្នា​ដែរ​ថា និស្សិត​ដែល​បញ្ចប់​ការសិក្សា​ពី​វិទ្យាស្ថាន​តេជោ​សែន​សាធារណការ និង​ដឹកជញ្ជូន អាច​មាន​សមត្ថភាព​សាងសង់​ស្ពាន​ឆ្លងកាត់​ទន្លេមេគង្គ ទន្លេសាប និង​ទន្លេបាសាក់​ជាដើម ដើម្បី​បង្ហាញ​នូវ​មោទនភាព​សម្រាប់​កូន​ខ្មែរ​នា​ថ្ងៃ​អនាគត​៕ ដោយ​៖ សៅ វិសាល​

ព័ត៌មានផ្សេងទៀត