អាមេរិក​បញ្ជូន​អ្នកការទូត​កំពូល​ប្រចាំ​UN​ទៅ​កោះ​តៃវ៉ាន់​អាច​នឹង​ធ្វើឲ្យ​ចិន​ផ្ទុះ​កំហឹង​

12-01-2021 4:52 pm 327
​លោកស្រី​Kelly Craft​

​លោកស្រី​Kelly Craft​អគ្គរដ្ឋទូត​អាមេរិក​ប្រចាំ​នៅ​អង្គការសហប្រជាជាតិ​(UN) គ្រោង​ធ្វើដំណើរ​ទៅដល់​កោះ​តៃវ៉ាន់​នៅ​ថ្ងៃទី​១៣​ខែមករា​ឆ្នាំ​២០២១ សម្រាប់​ដំណើរ​ទស្សនកិច្ច​រយៈពេល​៣​ថ្ងៃ​។ ដំណើរ​ទស្សនកិច្ច​របស់​អគ្គរដ្ឋទូត​អាមេរិក​ប្រចាំ​នៅ​អង្គការសហប្រជាជាតិ​រូបនេះ ត្រូវបាន​ប្រកាស​ភ្លាមៗ​បន្ទាប់ពី​អាមេរិក​បានបញ្ជាក់​ពី​ការលើកលែង​ការ​រឹត​ត្បឹត លើ​ទំនាក់ទំនង​រវាង​មន្ត្រីការទូត​អាមេរិក​និង​កោះ​តៃវ៉ាន់ ដែល​បានដាក់​ដោយ​ឯកតោភាគី​អស់​រយៈពេល​ជាច្រើន​ឆ្នាំ​មកហើយ ដើម្បី​ផ្សះផ្សារ​ជាមួយ​ចិន​។ 

​កោះ​តៃវ៉ាន់​បាន​អបអរសាទរ​យ៉ាងខ្លាំង ចំពោះ​ការផ្លាស់ប្តូរ​ទំនាក់ទំនង​ការទូត​នេះ​។ ផ្ទុយ​ពី​ចិន ដែលមាន​ការខកចិត្ត ហើយ​ទំនងជា​ផ្ទុះ​កំហឹង​កាន់តែខ្លាំង​បន្ថែមទៀត នៅពេលដែល​អាមេរិក​បន្ត​បញ្ជូន​អ្នកការទូត​ជាន់ខ្ពស់ ទៅកាន់​កោះ​តៃវ៉ាន់ ដែល​ចិន​ចាត់ទុកជា​ខេត្ត​មួយ​របស់ខ្លួន​ប៉ុណ្ណោះ​។​

​គួរ​ជម្រាបជូន​ដែរថា លោកស្រី​Kelly Craft​នឹង​ក្លាយជា​មន្ត្រីជាន់ខ្ពស់​អាមេរិក​ទី​៣ ដែល​ត្រូវបាន​បញ្ជូន​ទៅកាន់​កោះ​នេះ ចាប់តាំងពី​ខែសីហា​មក ហើយ​អ្នកការទូត​ជាន់ខ្ពស់​ស្ត្រី​រូបនេះ ក៏​ប្រហែលជា​មិនមែនជា​មន្ត្រីការទូត​ចុងក្រោយបង្អស់​របស់​អាមេរិក ដែល​បំពេញ​ទស្សនកិច្ច​ទៅកាន់​កោះ​តៃវ៉ាន់​នោះឡើយ​៕ ដោយ៖អ៊ុន សុខឡា

 ពាក្យគន្លឹះ  អាមេរិកតៃវ៉ាន់ចិន

ព័ត៌មានផ្សេងទៀត