លោក​បាយដិន​ស្ដីបន្ទោស​លោកត្រាំ​ជុំវិញ​កុបកម្ម​នៅ​សាល​ប្រជុំ​សភា​អាមេរិក​

07-01-2021 11:37 am 1091

​លោកចូ បាយ​ដិន បេក្ខជន​ឈ្នះឆ្នោត​ប្រធានាធិបតី​អាមេរិក​បាន​ស្តីបន្ទោស​យ៉ាងខ្លាំង​លើ​លោក​ដូណាល់ ត្រាំ បេក្ខជន​ចាញ់ឆ្នោត​និង​ជា​ប្រធានាធិបតី​អាមេរិក​ជិត​ផុត​អាណត្តិ ក្រោយពី​មាន​អ្នកគាំទ្រ​រាប់ពាន់​របស់​លោក​ត្រាំ​បាន​ផ្ទុះ​នូវ​ការតវ៉ា​បះបោរ​ទ្រង់ទ្រាយ​ជា​កុបកម្ម និង​សម្រុកចូល​ដោយ​ហិង្សា​នៅឯ​សាលប្រជុំ​សភាព​អាមេរិក​កា​ពី​តូ​ល​(Capitol)​។ កុបកម្ម​ដ៏​ធំ​ក្នុង​ប្រទេស​បិតា​ធិបតេយ្យ​នេះដែរ បាន​បណ្ដាលឲ្យ​ស្ត្រី​ម្នាក់​ស្លាប់​បាត់បង់​ជីវិ​ត ដោយសារ​តែ​ហិង្សា​បាន​ឈាន​ដល់​ការផ្ទុះអាវុធ​។​

​ទាក់ទង​នឹង​ការតវ៉ា​នេះ លោក​បាយ​ដិនបាន​ទទូច​ឲ្យ​លោក​ត្រាំ​ចេញមុខ​រារាំង និង​បញ្ឈប់​នូវ​សកម្មភាព​ប្រឆាំង​ក្នុង​រូបភាព​ជា​ហិង្សា​ចេញពី​អ្នកគាំទ្រ​របស់លោក​។ លោក​បាយដិន​លើកឡើង​ទៀត​ថា សកម្មភាព​ប្រឆាំង​បែបនេះ​ពុំ​ធ្លាប់​មាន​ពីមុន​មក​ឡើយ​នៅ​អាមេរិក​។ យ៉ាងណាមិញ សម័យប្រជុំ​សភា​ដើម្បី​សម្រេច​លើ​ជ័យជម្នះ​ក្នុង​ការបោះឆ្នោត​ប្រធានាធិបតី​របស់​លោក​បាយដិន​ត្រូវ​បាន​ពន្យា​ពេល​ហើយ​។​

​ជាក់ស្ដែង ហ្វូង​បាតុករ​ដែល​ជា​អ្នកគាំទ្រ​លោក​ត្រាំ​ទាំងនោះ ដើមឡើយ​ត្រូវបាន​អំពាវនាវ និង​ជំរុញ​ឲ្យ​ប្រមូលផ្ដុំ​គ្នា​នៅ​ជុំវិញ​សាលប្រជុំ​កា​ពី​តូ​ល​អាមេរិក​ដោយ​លោក​ត្រាំ​ផ្ទាល់​តែម្ដង​។ ជា​ការឆ្លើយតប លោក​ត្រាំ​តាមរយៈ​ខ្សែ​វីដេអូ​បង្ហោះ​លើ​បណ្ដាញ​សង្គម​ធ្វី​ត​ទ័​រ បាន​បន្ត​លើកឡើង​ជុំវិញ​ការលួចបន្លំ​សន្លឹកឆ្នោត​របស់​លោក​ក្នុង​ការបោះឆ្នោត​ប្រធានាធិបតី​កាលពី​ខែ​វិច្ឆិកា​ឆ្នាំ​២០២០​។ លោក​ត្រាំ​បាន​ថ្លែង​ទៅកាន់​អ្នកគាំទ្រ​របស់​លោក​ថា ខ្ញុំ​ដឹង​ពី​ការឈឺចាប់​របស់​អ្នក​។ ខ្ញុំ​ដឹង​ថា​អ្នក​ឈឺចាប់​។ ការបោះឆ្នោត​មាន​ការលួចបន្លំ​លើ​យើង ប៉ុន្តែ​អ្នក​ត្រូវតែ​ត្រឡប់ទៅផ្ទះ​វិញ​ឥឡូវ​នេះ​ហើយ​យើង​នឹង​មាន​សន្តិភាព​។​

​ទាក់ទង​នឹង​កុបកម្ម​ដដែល​នេះ មាន​ឥស្សរជន​នយោបាយ និង​មេដឹកនាំ​មួយចំនួន​បាន​សម្តែង​ការភ្ញាក់ផ្អើល​យ៉ាងខ្លាំង​ចំពោះ​ទង្វើ​របស់​ក្រុម​អ្នកគាំទ្រ​របស់លោក​ត្រាំ​នេះ​។ ជាក់ស្ដែង​នាយករដ្ឋមន្ត្រី​អង់គ្លេស​លោក​Boris Johnson បាន​ថ្កោលទោស​ចំពោះ​ការតវ៉ា​នេះ និង​បាន​អំពាវនាវ​ឲ្យ​លោក​ត្រាំ​ផ្ទេរ​អំណាច​ដោយ​សន្តិវិធី​។ រី​ឯ​រដ្ឋមន្ត្រី​ក្រសួង​ការបរទេស​អាឡឺម៉ង់​លោក​Heiko Maas ក៏​បាន​និយាយថា លោក​ត្រាំ​និង​អ្នកគាំទ្រ​ត្រូវតែ​ទទួលយក​ការសម្រេចចិត្ត​របស់​អ្នកបោះឆ្នោត​អាមេរិក និង​គួរ​បញ្ឈប់​ការ​ជាន់ឈ្លី​លើ​លទ្ធិប្រជាធិបតេយ្យ​។

​ក្រៅពីនេះ សូម្បីតែ​លោក​បា​រ៉ាក់ អូ​បា​ម៉ា អតីត​ប្រធានាធិបតី​អាមេរិក ក៏​បាន​និយាយ​នៅក្នុង​សេចក្តីថ្លែងការណ៍​ដែរ​មួយ​ថា ការវាយលុក​ទៅលើ​សាលប្រជុំ​កា​ពី​តូ​ល​នេះ​នឹង​ត្រូវ​ចារ​ជា​ប្រវត្តិសាស្ត្រ និង​ថា​វា​ជា​ពេលវេលា​ដ៏​អាម៉ាស់​សម្រាប់​សហរដ្ឋអាមេរិក​។​

​គួរ​ជម្រាប​ថា មូលហេតុ​ដែល​ឈាន​ដល់​ផ្ទុះ​មាន​ការតវ៉ា​និង​សម្រុកចូល​ទៅ​កាន់​សាល​ប្រជុំ​សភា​កា​ពី​តូ​ល​អាមេរិក​របស់​ក្រុម​បាតុករ​គាំទ្រ​លោក​ត្រាំ គឺ​ដោយសារតែ​ពួកគេ​មិន​ពេញចិត្ដ​នឹង​លទ្ធផល​បោះឆ្នោត​កាលពី​ថ្ងៃ​ទី​០៣​ខែវិច្ឆិកា​ឆ្នាំ​មុន​។ ដោយ​កាលនោះ​លោកចូ បាយ​ដិនបាន​ឈ្នះឆ្នោត ប៉ុន្ដែ​ប្រធានាធិបតី​ដែល​ពួកគេ​គាំទ្រ​គឺ​លោក​ត្រាំ​បែរ​ជា​ចាញ់ឆ្នោត​ទៅវិញ​។ ប្រការ​នេះ​បាន​ធ្វើឲ្យ​ពួកគេ​មិន​សុខចិត្ដ និង​ចោទ​ថា​ការបោះឆ្នោត​មាន​ភាពមិនប្រក្រតី​មាន​ការបន្លំ​សន្លឹកឆ្នោត ដូច​ជា​ការអះអាង​រប​ស់លោក​ត្រាំ​៕ ដោយ​៖ យឺន សីហា​

ព័ត៌មានផ្សេងទៀត