ស្វែងយល់​​បន្ថែម​​ពី​វ៉ាក់សាំង​​កូវី​ដ​១៩​​ក្រុមហ៊ុន​Pfizer ​​និង​ការចាប់ផ្ដើម​​ចាក់​នៅ​អាមេរិក​

15-12-2020 4:37 pm 468

​គិត​ត្រឹម​ថ្ងៃទី​១៥​ធ្នូ​នេះ មនុស្ស​ឆ្លងកូវី​ដ​-១៩​សរុប​ទូទាំង​ពិភពលោក​កើន​ដល់​ជាង​៧៣​លាន​នាក់ និង​ស្លាប់​ជាង​១​លាន​៦​សែន​នាក់​។ សហរដ្ឋអាមេរិក​ជា​ប្រទេស​មាន​មនុស្ស​ឆ្លង​និង​ស្លាប់​ច្រើនជាងគេ គឺ​គិត​ក្នុង​ថ្ងៃ​ដដែល​ឆ្លង​ជិត​១៧​លាន​នាក់ ស្លាប់​ជាង​៣០​ម៉ឺន​នាក់​។ នេះ​បើតាម​តួលេខ​ចុះផ្សាយ​ដោយ​គេហទំព័រ​worldometers​។ ចំនួន​ឆ្លង​និង​ស្លាប់​កើនឡើង​ជា​បន្ដបន្ទាប់ ជា​កត្ដា​ជំរុញ​ឲ្យ​ក្រុមហ៊ុន​ផលិត​វ៉ាក់សាំង​បន្ថែម​ល្បឿន​កាន់តែខ្លាំង​។ ទីបំផុត​វ៉ាក់សាំង​ការពារកូ​វីដ​-១៩​ក៏​លេច​រូបរាង និង​ទទួលបាន​ការអនុញ្ញាតឲ្យ​ប្រើប្រាស់​ជា​ផ្លូវការ ពី​រដ្ឋបាល​ស្បៀងអាហារ​និង​ឱសថ​សហរដ្ឋអាមេរិក​(FDA)​។ ក្នុងចំណោម​បេក្ខភាព​វ៉ាក់សាំង​ជាច្រើន​ដែល​កំពុង​ធ្វើតេស្ដ​សាកល្បង​លើកចុងក្រោយ មានតែ​វ៉ាក់សាំង​របស់​ក្រុមហ៊ុនPfizer-BioNTech​មួយ​ប៉ុណ្ណោះ ទទួលបាន​ការអនុញ្ញាត​ផ្លូវការ​ពី​FDA ហើយ​អាមេរិក​ក៏​ចាប់ផ្ដើម​ចាក់ទៅលើ​បុគ្គល​អាទិភាព​មុនគេ​បង្អស់​។ 

​សហរដ្ឋអាមេរិក​បាន​ចាប់ផ្តើម​ចាក់​វ៉ាក់សាំង​ការពារ​ជំងឺ​កូវី​ដ​-១៩​ហើយ បន្ទាប់ពី​វ៉ាក់សាំង​ដែល​ផលិត​ដោយ​ក្រុមហ៊ុន​ឱសថ​Pfizer​របស់​អាមេរិក សហការ​ជាមួយ​ក្រុមហ៊ុន​ឱសថ​BioNTech​របស់​អាល្លឺម៉ង់ ត្រូវបាន​អនុញ្ញាតឲ្យ​ប្រើប្រាស់​ជា​ផ្លូវការ​ពី​រដ្ឋបាល​ស្បៀងអាហារ​និង​ឱសថ​សហរដ្ឋអាមេរិក​(FDA)​កាលពី​ថ្ងៃទី​១២​ធ្នូ​។ នៅ​ថ្ងៃទី​១៤​ធ្នូ​វ៉ាក់សាំង​ត្រូវ​ចាប់ផ្ដើម​ចាក់​ទៅឲ្យ​អ្នកមាន​អាទិភាព គឺ​ទៅលើ​បុគ្គលិក​សុខាភិបាល និង​មនុស្ស​វ័យ​ចំណាស់​ស្ថិតនៅក្នុង​មណ្ឌល​ថែទាំ​មនុស្ស​ចាស់​មុនគេ​។ 

​តាម​អ្នកគ្រប់គ្រង​ការ​ចែកចាយ​វ៉ាក់សាំង​លោក​Gustave Perna​បាន​ថ្លែងថា វ៉ាក់សាំង​ប្រមាណ​២​លាន​៩​សែន​ដូសដំបូង ត្រូវ​ចែករំលែក​និង​ដឹកជញ្ជូន​ទៅដល់​រដ្ឋ​នានា​ក្នុង​សហរដ្ឋអាមេរិក​នៅ​ព្រឹក​ថ្ងៃទី​១៤​ធ្នូ​។ លោក​Gustave Perna​បង្ហាញថា​ទីតាំង​ចំនួន​១៤៥​ត្រូវ​ទទួលបាន​វ៉ាក់សាំង​នៅ​ថ្ងៃទី​១៤​ធ្នូ ទីតាំង​៤២៥​ផ្សេងទៀត​នឹង​ទទួលបាន​វ៉ាក់សាំង​នៅ​ថ្ងៃទី​១៥​ធ្នូ ខណៈ​៦៦​ទីតាំង​នឹង​ទទួលបាន​វ៉ាក់សាំង​នៅ​ថ្ងៃទី​១៦​ធ្នូ​។ 

​រីឯ​លោក​Stephen Hahn​ប្រធាន​រដ្ឋបាល​ស្បៀងអាហារ​និង​ឱសថ​សហរដ្ឋអាមេរិក បាន​ប្រាប់​ទូរទស្សន៍​CNN​ថា​វ៉ាក់សាំង​ចំនួន​១៨៤,០០០​ដប ត្រូវបាន​ដឹក​ចេញ​តាម​ក្បួន​រថយន្ត​ទីមួយ​ពី​ទីតាំង​ផលិត​ឱសថ​របស់​ក្រុមហ៊ុន Pfizer​។ លោក​Hahn​គូសបញ្ជាក់ថា ពលរដ្ឋ​អាមេរិក​ប្រមាណ​២០​លាន​នាក់ អាច​ទទួលបាន​វាក់​សាំង​ការពារ​ជំងឺ​កូវី​ដ​-១៩​ក្នុង​ដូសទី​១ នៅត្រឹម​ដំណាច់​ខែធ្នូ​ឆ្នាំ​២០២០​នេះ​។ ដោយឡែក​លោក​Moncef Slaoui ប្រធាន​ទីប្រឹក្សា​អភិវឌ្ឍន៍​វ៉ាក់សាំង​របស់​រដ្ឋាភិបាល​សហព័ន្ធ បាន​ប្រាប់​កម្មវិធី​ទូរទស្សន៍​Fox News​កាលពី​ថ្ងៃទី​១៣​ធ្នូ​ថា ពលរដ្ឋ​អាមេរិកាំង​ប្រមាណ​១០០​លាន​នាក់ អាច​ទទួលបាន​វ៉ាក់សាំង​ការពារ​ជំងឺ​កូវី​ដ​-១៩​នៅ​ដំណាច់ខែ​មីនាឆ្នាំ​២០២១​ខាងមុខនេះ​។​

​លោក​Stephen Hahn​ប្រធាន​ទីភ្នាក់ងាររដ្ឋបាល​ស្បៀងអាហារ​និង​ឱសថ​អាមេរិក បាន​ពណ៌​នាពី​ការប្រើប្រាស់​វ៉ាក់សាំង​ប្រឆាំងនឹង​វីរុស​កូវី​ដ​-១៩​លើកដំបូង​នេះ ថា​ជា​ព្រឹត្តិការណ៍​ដ៏​សំខាន់​មួយ​ក្នុង​ការប្រយុទ្ធប្រឆាំង​នឹង​ជំងឺ​រាតត្បាត​ដ៏​សាហាវ ដែល​បាន​ជះឥទ្ធិពល​ដល់​គ្រួសារ​ជាច្រើន​នៅ​សហរដ្ឋអាមេរិក​និង​នៅ​ជុំវិញ​ពិភពលោក​។ លោក​និយាយថា ការអនុញ្ញាត​នេះ​ធ្វើឡើង​បន្ទាប់ពី​ដំណើរការ​ពិនិត្យឡើងវិញ​ដោយ​បើកចំហ​និង​ប្រកបដោយ​តម្លាភាព ដែល​ធានាថា​វ៉ាក់សាំង​បាន​បំពេញ​តាម​ស្តង់ដា​វិទ្យាសាស្ត្រ​យ៉ាង​ម៉ឺងម៉ាត់​របស់​FDA សម្រាប់​សុវត្ថិភាព ប្រសិទ្ធភាព និង​គុណភាព​។​

​លោក​ប្រធានាធិបតី​អាមេរិក​ដូណាល់ ត្រាំ​(Donald Trump)  បាន​បង្ហោះ​សារ​ក្នុង​បណ្តាញ​សង្គម Twitter របស់លោក​ថា​៖ «​ការចាក់​វ៉ាក់សាំង​ជា​លើកដំបូង​ត្រូវបាន​ធ្វើឡើង​។ ចូលរួម​អបអរសាទរ​សហរដ្ឋ​អាមេរិក​! ចូលរួម​អបអរសាទរ​ពិភពលោក​ទាំងមូល​!» នៅក្នុង​សារ​បង្ហោះ​តាម​ប្រព័ន្ធ Twitter នៅ​យប់​ថ្ងៃទី​១៣​ធ្នូ លោក​ត្រាំ​បន្ថែមថា​បុគ្គលិក​របស់​សេត​វិមាន​នឹងត្រូវ​ចាក់​វ៉ាក់សាំង​ការពារ​នៅក្នុង​កម្មវិធី​បន្ទាប់ លើកលែងតែ​អ្នក​ដែល​ចាំបាច់​ពិសេស​ដែល​អាច​ត្រូវ​ទទួលបាន​ភ្លាមៗ​។ លោក​ក៏​បានបញ្ជាក់​ផងដែ​រថា រូបលោក​ផ្ទាល់​នឹង​មិនមាន​គម្រោង​ទទួល​ចាក់​វាក់​សាំង​ភ្លាមៗ​នៅពេលនេះ​ទេ តែ​លោក​ទន្ទឹងរង់ចាំ​ចាក់​វ៉ាក់សាំង​នេះ​នៅពេល​សមស្រប​ណាមួយ​។​

​ការផលិត​បាន​វ៉ាក់សាំង​ប្រឆាំង​កូវី​ដ​-១៩​របស់​ក្រុមហ៊ុន​Pfizer​ចាប់ដៃ​ជាមួយ​ក្រុមហ៊ុន​BioNTech ដោយ​ប្រើពេល​ជិត​មួយឆ្នាំ​គិត​តាំងពី​ចាប់ផ្ដើម​ដំណើរការ អាច​និយាយបានថា​ជា​រឿង​ដ៏​អស្ចារ្យ​បំផុត​។ នាយក​ប្រតិ​ប​ត្ដិ​ក្រុមហ៊ុន​Pfizer​លោក​Albert Bourla​បាន​និយាយថា ក្រុមហ៊ុន​របស់លោក​គ្រោង​នឹង​ផលិត​វ៉ាក់សាំង​ឲ្យបាន​១.៣​ពាន់​លាន​ដូ​សនៅ​ចុងឆ្នាំ​២០២១​។ ក្រុមហ៊ុន​ក៏​បាននិងកំពុង​បង្កើន​ការផលិត​ឲ្យបាន​ច្រើន​ដើម្បី​បំពេញតម្រូវការ​ខ្ពស់បំផុ​ត  តប​តាម​សំណើ​ពី​រដ្ឋាភិបាល​អាមេរិក​សុំ​ផលិត​ឲ្យបាន​១០០​លាន​ដូ​ស​នៅត្រី​មាសទី​២​ឆ្នាំ​២០២១ បន្ថែម​លើ​ចំនួន​១០០​លាន​ដូស​រំពឹង​នឹង​អាច​ផលិត​បាន​នៅ​ចុង​ត្រីមាស​ទី​១​ឆ្នាំ​២០២១​។ 

​វ៉ាក់សាំង​ប្រឆាំង​កូវី​ដ​១៩​ដែល​គេ​ហៅថា​mRNA​របស់​ក្រុមហ៊ុន​អាមេរិក​Pfizer សហការ​ជាមួយ​ក្រុមហ៊ុន​អាល្លឺម៉ង់​BioNTech​ដើម្បី​ផលិត​ចេញ​នេះ បានប្រកាស​ពី​ជោគជ័យ​ក្នុង​ការសាកល្បង​ដោយ​ទទួលបាន​ប្រសិទ្ធភាព​៩៥​ភាគរយ​។ វ៉ាក់សាំង​នេះ បានទទួល​ការអនុម័ត​ឲ្យប្រើ​ប្រាស់​រួចហើយ​នៅ​ចក្រភព​អង់គ្លេស កាណាដា បា​រ៉ែ​ន​និង​អារ៉ាប់ប៊ីសាអូឌីត​។ មនុស្ស​ម្នាក់​ត្រូវ​ចាក់​វ៉ាក់សាំង​នេះ​ចំនួន​២​ដង និង​ម្តង​ត្រូវ​ចាក់​១​ដូស​។ ប្រជាជន​ដែល​ទទួល​ការចាក់​វ៉ាក់សាំង​លើក​ទី​១​រួចហើយ ត្រូវគេ​ផ្តល់ដំណឹង​ឲ្យមក​ចាក់​លើទី​២​ទៀត​ដែលជា​លើកចុងក្រោយ ក្នុង​រយៈពេល​៣​សប្តាហ៍​ឬ​២១​ថ្ងៃក្រោយ​ការចាក់​លើកទីមួយ​។​

​វ៉ាក់សាំង​ផ្ដល់​ប្រសិទ្ធភាព​ខ្ពស់ជាង​ដល់​ក្រុមមនុស្ស​វ័យក្មេង ខណៈ​ក្រុមមនុស្ស​វ័យ​ចំណាស់​មាន​អាយុ​លើ​៦៥​ឆ្នាំ​អាចមាន​ប្រសិទ្ធភាព​ជាង​៩៤​ភាគរយ​។ ពុំមាន​ការព្រួយបារម្ភ​ពី​បញ្ហា​សុវត្ថិភាព​ធ្ង​ន​ធ្ង​រ​នោះទេ គឺ​អាចមាន​អាការៈ​អស់កម្លាំង​និង​ឈឺក្បាល​តិចតួច​ប៉ុណ្ណោះ​ក្រោយ​ចាក់​។ ក្រៅពីនេះ​មាន​ឈឺចាប់​នៅ​កន្លែង​ចាក់​និង​ឈឺ​សាច់ដុំ ដែល​ទាំងនេះ​វា​ជា​អា​ការៈធម្មតា​នៅពេល​ចាក់​វ៉ាក់សាំង​ទូទៅ​។  

​ជា​រឿង​ច្បាស់ការ​ណាស់​ថា​នៅពេល​ទទួលបាន​វ៉ាក់សាំង​ការពារកូ​វីដ​-១៩ មនុស្ស​គ្រប់រូប​ពិតជា​ចង់ដឹង​កាន់តែច្បាស់​ពី​ព័ត៌មាន​នានា​របស់​វា​។ ក្រៅពី​ព័ត៌មាន​ដែល​បាន​រៀបរាប់ ក៏មាន​សាធារណជន​ខ្លះ​ចោទសួរ​ទៀតថា តើ​វ៉ាក់សាំង​នេះ​ពិតជា​អាច​ការពារ​មនុស្ស​បាន​គ្រប់គ្នា​ឬទេ​? ចម្លើយ​គឺថា​មិន​គ្រប់គ្នា​១០០​ភាគរយ​ទេ​។ ក្នុងចំណោម​មនុស្ស​ប្រមាណ​២​ម៉ឺន​នាក់​ដែល​បានទទួល​វ៉ាក់សាំង​ពេល​សាកល្បង មាន​០៨​នាក់​ឆ្លង​ជំងឺ​កូវី​ដ​-១៩ ហើយ​មាន​ម្នាក់​ស្ថិតក្នុង​សភាព​ធ្ងន់ធ្ងរ​។ នៅ​ពុំទាន់​មាន​ការបញ្ជាក់​ច្បាស់លាស់​ទេ ថា​មូលហេតុ​អ្វី​បានជា​អ្នកខ្លះ​មិន​ទទួលបាន​ប្រសិទ្ធភាព​ពី​វ៉ាក់សាំង​។ ប៉ុន្ដែ​អ្វីដែល​បានប្រកាស​ផ្លូវការ​រួចហើយ​គឺថា វ៉ាក់សាំង​មាន​ប្រសិទ្ធភាព​៩៥​ភាគរយ ដូច្នេះ​ទោះបីជា​ការពារ​មិនបាន​គ្រប់គ្នា​តែមាន​មនុស្ស​តិចតួច​ណាស់​ឆ្លងកូវី​ដ​-១៩​ក្រោយ​ចាក់​វ៉ាក់សាំង​។​

​ក៏​មានការ​ចោទសួរ​ទៀតថា នៅពេល​មាន​វ៉ាក់សាំង​ហើយ​តើ​អាច​ដកចេញ​វិធានការ​សុវត្ថិភាព​កន្លងមក​ទេ ជាក់ស្ដែង​លែង​ពាក់​ម៉ាស់ ឬ​លែង​រក្សា​គម្លាត​សង្គម​ជាដើម​? ចម្លើយ​ដែល​អ្នកជំនាញ​បាន​ឆ្លើយ​គឺថា ពុំគួរ​ធ្វេសប្រហែស​នោះឡើយ​។ ទោះបី​មាន​វ៉ាក់សាំង​ដែល​ទទួលស្គាល់ ប៉ុន្ដែ​វ៉ាក់សាំង​នេះ​ដំបូង​ឡើយ​ចែកចាយ​ទ្រង់ទ្រាយ​ធំ​ក្នុងប្រទេស​អាមេរិក និង​បណ្ដា​ប្រទេស​មួយចំនួនទៀត​ប៉ុណ្ណោះ ដូចជា​អង់គ្លេស កាណាដា បា​រ៉ែ​ន និង​អា​រ៉ាប៊ីសាអូឌីត តែ​វ៉ាក់សាំង​នៅ​ពុំទាន់​អាច​ចែកចាយ​ទៅកាន់​ទូទាំង​ពិភពលោក​បានទេ​។ 

​អ្នកជំនាញ​ក៏​បញ្ជាក់​ផងដែ​រថា វ៉ាក់សាំង​ពិតជា​មិនអាច​ត្រូវ​ផ្ដល់ឲ្យ​មនុស្ស​គ្រប់រូប​ដែរ គឺ​សម្រាប់តែ​អ្នក​ប្រឈម​ហានិភ័យ​និង​អ្នកមាន​ហានិភ័យ​ខ្ពស់​ជា​ជំហាន​ដំបូង​។ ចំពោះ​ការ​ចែកចាយ​វ៉ាក់សាំង​ទៀតសោត ស្ថិតក្នុង​ទ្រង់ទ្រាយ​កាន់តែ​ធំ​នៅ​ឆ្នាំក្រោយ​ឯណោះ​។ អ្នកជំនាញ​ភាគច្រើន​និយាយថា ទោះបី​មាន​វ៉ាក់សាំង​ច្រើន​ក៏ដោយ វិធានការ​បន្ថែម​ដូចជា​ពាក់​ម៉ា​ស់នឹង​នៅតែ​ចាំបាច់​ក្នុងការ​អនុវត្ដ រហូតដល់​ការគំរាមកំហែង​សុខភាព​សាធារណៈ​បាន​ថយចុះ​។ វេជ្ជបណ្ឌិត Paul Offit​សាស្ដ្រាចារ្យ​នៅ​សាកលវិទ្យាល័យ Pennsylvania​និយាយថា វ៉ាក់សាំង​នឹង​មិនអាច​ជំនួស​វិធានការ​អនាម័យ​ទេ​។​

​និយាយ​ពី​តម្លៃ​វ៉ាក់សាំង​ប្រឆាំង​កូវី​ដ​-១៩​របស់​ក្រុមហ៊ុន​បួន​ដែល​ត្រូវបាន​បង្ហាញ​កន្លងមក វ៉ាក់សាំង​របស់​ក្រុមហ៊ុន​អង់គ្លេស​Astrazeneca មានតម្លៃ​៤​ដុល្លារ​ក្នុង​មួយ​ដូស ប្រសិទ្ធភាព​ចន្លោះ​ពី​៦២-៩០​ភាគរយ អាច​រក្សាទុក​ក្នុង​ទូទឹកកក​ធម្មតា​។  វ៉ាក់សាំង​ក្រុមហ៊ុន​អាមេរិក​Moderna​មានតម្លៃ​៣៣​ដុល្លារ​ក្នុង​មួយ​ដូស មាន​ប្រសិទ្ធភាព​៩៥​ភាគរយ ត្រូវ​រក្សាទុក​ក្នុង​សីតុណ្ហភាព​-២០​អង្សារ​សេ​បាន​រហូតដល់​៦​ខែ​។ វ៉ាក់សាំង​ក្រុមហ៊ុន​អាមេរិក​-​អាល្លឺម៉ង់​Pfizer-BioNTech​មានតម្លៃ​២០​ដុល្លារ​ក្នុង​មួយ​ដូស មាន​ប្រសិទ្ធ​សភាព​៩៥​ភាគរយ ត្រូវ​រក្សាទុក​ក្នុង​សីតុណ្ហភាព​-៧០​អង្សារ​សេ និង​វ៉ាក់សាំង​របស់​រុស្ស៊ី​Gamaleya(Sputnik V) មានតម្លៃ​១០​ដុល្លារ​ក្នុង​មួយ​ដូស មាន​ប្រសិទ្ធភាព​៩២​ភាគរយ អាច​រក្សាទុក​ក្នុង​ទូទឹកកក​ធម្មតា​បាន​។ វ៉ាក់សាំង​របស់​ក្រុមហ៊ុន​ទាំង​បួន​នេះ​តម្រូវឲ្យ​ចាក់ពី​រដូស​ដូចគ្នា​ក្នុង​ម្នាក់​។ ក៏​នៅមាន​បេក្ខភាព​វ៉ាក់សាំង​ជាច្រើន​ទៀត​កំពុងស្ថិត​ក្នុងដំណាក់កាល​ធ្វើតេស្ដ​លើកចុងក្រោយ តែ​មានតែ​វ៉ាក់សាំង​របស់​ក្រុមហ៊ុន​Pfizer-BioNTech​ប៉ុណ្ណោះ ដែល​ត្រូវបាន​រដ្ឋបាល​ស្បៀងអាហារ​និង​ឱសថ​អាមេរិក​អនុញ្ញាតឲ្យ​ប្រើប្រាស់​៕

​ដោយ​៖​ពេញ ផេង​

ព័ត៌មានផ្សេងទៀត