បើ​ចង់​ទប់​ឥទ្ធិពល​ចិន​ដូច​រដ្ឋ​នៅ​អាស៊ី​មួយចំនួន​ចង់បាន តើ​លោក​បាយដិន​ត្រូវ​ធ្វើយ៉ាងណា​?

08-12-2020 5:40 pm 1103

​​ខណៈពេល​លោកចូ បាយដិនកំពុង​រៀបចំ​ខ្លួន​ត្រៀម​ចូល​កាន់តំណែ​ង​ប្រធានាធិបតី​ថ្មី​អាមេរិក​ជំនួស​លោក​ដូណាល់ ត្រាំ ដែល​ពិធី​ស្បថ​ចូល​កាន់តំណែង​នឹង​ធ្វើឡើង​នៅ​ថ្ងៃទី​២០ ខែ​មករា ឆ្នាំ​២០២១ អាច​និយាយបានថា​បណ្ដា​ប្រទេស​មួយចំនួន​នៅ​តំបន់​អាស៊ី​-​ប៉ាស៊ីហ្វិក​កំពុង​តែមាន​អារម្មណ៍​មិនល្អ និង​កំពុងមាន​មន្ទិល​ជុំវិញ​តួនាទី​អាមេរិក​នៅ​តំបន់​នេះ ស្ថិតក្រោម​ការដឹកនាំរ​បស់​ប្រធានាធិបតី​ថ្មី​។ បើទោះបីជា​នៅពេល​លោក​ដូណាល់ ត្រាំ​កាន់តំណែង​ធ្វើឲ្យ​ប្រទេសដៃគូ​មួយចំនួន​ប្រឈម​បញ្ហា ប៉ុន្ដែ​ក៏មាន​រដ្ឋ​នៅ​អាស៊ី​មួយចំនួន​ពេញចិត្ដ​នឹង​គោលនយោបាយ​របស់លោក​ត្រាំ​ដែរ ពិសេស​គឺ​ការចាត់វិធានការ​តឹងតែង​ប្រឆាំង​មហា​យក្ស​ចិន​។ តែ​នៅពេល​រដ្ឋបាល​ថ្មី​ដឹកនាំ​ដោយ​លោក​បាយ​ដិន គេ​ពុំទាន់​ដឹងថា​អាមេរិក​នឹងធ្វើ​យ៉ាងណាទេ​ចំពោះ​ចិន ដែល​ការណ៍​នេះហើយ​ទើប​មាន​ក្ដី​ព្រួយបារម្ភ​ពី​សំណាក់​ប្រទេស​មួយចំនួន ដែល​មើលឃើញថា​សកម្ម​ភាព​ចិន​មិន​ត្រឹមត្រូវ​ចាំបាច់​ចាត់វិធានការ​ទប់ស្កាត់​ជាបន្ទាន់​។​

​តំណែង​ប្រធានាធិបតី​របស់​លោកចូ បាយដិន​ចូលមក​ចំពេល​ដែល​ចិន​កើន​ឥទ្ធិពល និង​មាន​សកម្មភាព​ខ្លាំង​នៅក្នុង​តំបន់​អាស៊ី​។ បើតាម​ការឃ្លាំមើល​យ៉ាង​យកចិត្ដទុកដាក់​ពី​អន្ដរជាតិ ភាព​សកម្ម​របស់​ចិន​មាន​ជាអាទិ៍​ទៅលើ​បញ្ហា​រំលោភ​សិទ្ធិមនុស្ស​នៅ​ស៊ីន​ជាំ​ង​។ ស្ថិតក្រោម​ការដឹកនាំរ​បស់​លោក​ដូណាល់ ត្រាំ អាមេរិក​បានដាក់​បម្រាម​លើ​ការនាំ​ចូល​ទំនិញ​មួយចំនួន​ពី​តំបន់​នេះ ករណី​ដែល​ចិន​បង្ខិតបង្ខំ​ឬ​រំលោភបំពាន់​លើ​កម្លាំង​ពលកម្ម ឬ​ដាក់​សម្ពាធ​ខ្លាំង​លើ​ពលរដ្ឋ​រស់នៅក្នុង​តំបន់​នេះ​។ ជាងនេះទៅទៀត​ចិន​ក៏​បង្កើន​សកម្មភាព​ខ្លាំង​នៅ​តៃវ៉ាន់ នៅ​ហុង និង​នៅ​សមុទ្រ​ចិន​ខាងត្បូង​។ 

​តាមរយៈ​ការស្ទង់មតិ​របស់​មជ្ឈមណ្ឌល​ស្រាវជ្រាវ​មួយ​មានឈ្មោះ​ជា​អង់គ្លេស​ថា “Pew Research’s Summer 2020 Global Attitudes Survey of advanced economies” ឬ​អាច​និយាយ​ជា​ខ្មែ​រថា “​ការស្រាវជ្រាវ​ឥរិយាបថ​សកល​នា​រដូវក្ដៅ​ឆ្នាំ​២០២០​នៃ​ភាពជឿនលឿន​ផ្នែក​សេដ្ឋកិច្ច ក៏​មើលឃើញថា​ចិន​ហាក់​បង្កើន​សកម្មភាព​និង​ឥទ្ធិពល​ខ្លាំង​ផងដែរ​។ ការលែង​ជឿ​ទុកចិត្ដ​លើ​លោកស៊ី ជីន​ពីង​ចាប់ផ្ដើម​កើនឡើង​ខ្ពស់ ខណៈ​៧៨​ភាគរយ​នៃ​អ្នក​ឆ្លើយតប​ពេល​ស្ទង់​មតិ​និយាយថា ពួកគេ​គ្មាន​ទំនុកចិត្ដ​លើលោក​ស៊ីដែល​នឹងធ្វើ​រឿង​ត្រឹមត្រូវ​ក្នុង​កិច្ចការ​ពិភពលោក​នោះទេ​។​

​ដូច្នេះ​អាច​ទាញយក​មក​ពន្យល់បាន​ថា ហេតុអ្វី​បានជា​លោក​ដូណាល់ ត្រាំ​មាន​ឆន្ទៈ​ក្រោកឈរ​ប្រឆាំង​ចិន ដូចជា​ប្រឆាំង​បច្ចេកវិទ្យា​ចិន ពាណិជ្ជកម្ម និង​រឿង​មួយចំនួនទៀត ដែល​ត្រូវបាន​ស្វាគមន៍​យ៉ាងខ្លាំង​ពី​បណ្ដា​ប្រទេស​មួយចំនួន​ក្នុង​តំបន់​អាស៊ី​-​ប៉ាស៊ីហ្វិក​? ដ្បិត​លោក​ត្រាំ​ប្រកាស​គោលនយោបាយ​គិត​អាមេរិក​ដំបូង​គេ តែ​រដ្ឋ​ដែល​គាំទ្រ​សកម្មភាព​អាមេរិក​ដឹកនាំ​ដោយ​លោក​ត្រាំ សុខចិត្ដ​ទុក​មួយឡែ​កនូវ​គោលនយោបាយ​នេះ​។ និយាយ​ពី​ការ​ឆ្ពោះទៅរក​ការបោះឆ្នោត​អាមេរិក​កន្លងមក ប្រទេស​នៅ​អាស៊ី​-​ប៉ាស៊ីហ្វិក​ដូចជា​វៀតណាម ជប៉ុន និង​កូរ៉េខាងត្បូង មាន​ទំនោរ​ទៅរក​លោក​ត្រាំ ដោយ​ពួកគេ​និយាយថា​លោក​ត្រាំ​បានរៀបចំ​ផែនការ​ដ៏​មាន​ទម្ងន់​ប្រឆាំង​សេដ្ឋកិច្ច​ចិន សកម្មភាព​យោធា​ចិន និង​យុទ្ធសាស្ដ្រ​នានា​របស់​ចិន ជារួម​គឺ​ប្រឆាំង​ទង្វើ​ចិន​ដែល​គេ​ចាត់ទុកថា​អាច​បំផ្លាញ​ផលប្រយោជន៍​ពួកគេ​និង​ផលប្រយោជន៍​អន្ដរជាតិ​។​

​រម្លឹក​ទៅដល់​អាណត្ដិ​ដែល​លោក​បារ៉ាក់ អូ​បា​ម៉ា​កាន់តំណែង​ប្រធានាធិបតី​អាមេរិក ដោយ​លោក​ធ្លាប់​រស់នៅ​ក្នុងប្រទេស​ឥណ្ឌូនេស៊ី​មួយ​រយៈកាល​នៅ​ជា​កុមារភាព ដូច្នេះ​ហេតុផល​ផ្ទាល់ខ្លួន​អាចធ្វើឲ្យ​លោក​ស្រឡាញ់តំប​ន់អាស៊ី និង​ប្រើ​អំណាច​ទន់ភ្លន់​របស់​អា​មេរិក​ដាក់​តំបន់​នេះ​។ ប៉ុន្ដែ​បណ្ដា​ប្រទេស​ក្នុង​តំបន់​ហាក់​មាន​អារម្មណ៍​មិន​ស្រួល​ជាមួយនឹង​អ្វីដែល​ពួកគេ​គិតថា លោក​អូ​បា​ម៉ា​យោគយល់​ខ្លាំង​ព្រោះ​គិតថា​តំបន់​អាស៊ី​ជា​កន្លែង​លោក​ធ្លាប់​រស់នៅ រហូតដល់​មិន​ហ៊ាន​ប្រឈមមុខ​នឹង​អាកប្បកិរិយា​ឈ្លានពាន​របស់​ចិន​។​

​គោលនយោបាយ​ការបរទេស​របស់​អាមេរិក​បាន​បរាជ័យ​ក្នុង​ការកំណត់​ពី​ទំនាក់ទំនង​ជាមួយ​ចិន និង​របៀប​ដែល​ខ្លួន​អាច​ផ្សារភ្ជាប់​ជាមួយ​តំបន់​អាស៊ី​។ ស្របពេល​ដែល​ចង់​ដើរតួ​ជា​គំរូ​នៅ​អាស៊ី លោក​អូ​បា​ម៉ា​ក៏​បរាជ័យ​ក្នុង​ការបង្កើន​វត្ដ​មាន​យោធា​នៅ​អាស៊ី​-​ប៉ាស៊ីហ្វិក ដើម្បី​ឆ្លើយតប​នឹង​យោ​ធូប​នីយកម្ម​ចិន​ក្នុង​សមុទ្រ​ចិន​ខាងត្បូង​។ តម្លៃ​របស់​អាមេរិក​ក៏​ត្រូវបាន​គេ​ចាប់អារម្មណ៍​នៅក្នុង​ទិដ្ឋភាព​ផ្សេងទៀត​នៃ​ទំនាក់ទំនង​អាមេរិក​-​អាស៊ី​។ អ្នកសង្កេតការណ៍​បានចង្អុលបង្ហាញ​ពី​បរាជ័យ​របស់លោក​អូ​បា​ម៉ា ដើម្បី​ធានា​នូវ​ការទទួល​បានកា​គាំទ្រ​សម្រាប់​ភាពជា​ដៃគូ​អន្ដរ​ប៉ាស៊ីហ្វិក ដែល​បាន​ជះឥទ្ធិពល​បន្ថែម​ដល់​ពាណិជ្ជកម្ម​និង​សេដ្ឋកិច្ច​របស់​ចិន​។ អ្នកសង្កេតការណ៍​បានលើកឡើង​ពី​បញ្ហា​អសមត្ថភាព​របស់លោក​អូ​បា​ម៉ា ក្នុង​ការពង្រឹង​ការកែទម្រង់​របស់​អង្គការ​ពាណិជ្ជកម្ម​ពិភពលោក​(WTO) និង​យុទ្ធសាស្ដ្រ​អត់ធ្មត់​របស់លោក​ដែល​គ្មាន​ប្រសិទ្ធភាព​ក្នុង​ការទប់ស្កាត់​កម្មវិធី​នុយក្លេអ៊ែរ​របស់​កូរ៉េខាងជើង​។​

​បើ​និយាយ​ពី​ការ​ទប់ទល់​ឥទ្ធិពល​ចិន ទៅតាម​អ្វីដែល​បណ្ដា​ប្រទេស​នៅ​អាស៊ី​មួយចំនួន​ចង់បាន សម្រាប់​លោក​បាយដិន​តើលោក​គួរ​ធ្វើយ៉ាងណា​?

​លោក​បាយដិន​ត្រូវតែប​ន្ដនូវ​គោលនយោបាយ​របស់​លោកត្រាំ ដោយ​ផ្ដោត​សំខាន់​លើ​បញ្ហា​សមុទ្រ​ចិន​ខាងត្បូង​។ លោក​ត្រូវតែ​ដោះស្រាយ​បញ្ហា​ប្រឈម គឺធ្វើឡើង​តាមរយៈ​ភាពជា​អ្នកដឹកនាំ​ខាង​ផ្នែក​យុទ្ធសាស្ដ្រ​និង​សេដ្ឋកិច្ច ដើម្បី​បង្ហាញថា​អាមេរិក​អាច​ផ្ដល់ឲ្យ​តំបន់​នេះ​នូវអ​នាគ​តនៃ​ភាពរុងរឿង​និង​សន្ដិសុ​ខ​។ ប្រធានាធិបតី​ជាប់ឆ្នោត​ចូ បាយដិន​គួរតែ​រុញច្រាន​ប្រឆាំង​ការប៉ុនប៉ង​រប​ស់​ចិន ផ្លាស់ប្ដូរ​ឲ្យមាន​តុល្យភាព​អំណាច​នៅក្នុង​សមុទ្រ​ចិន​ខាងត្បូង ដែល​ការងារ​ទាំងអស់នេះ​ត្រូវតែ​ធ្វើឡើង​ជា​ពហុ​វិធី​។ 

​យុទ្ធសាស្ដ្រ​ប្រឆាំង​ឥទ្ធិពល​ចិន​ផ្សេងទៀត​អាចមាន​ទីមួយ លោក​បាយដិន​ត្រូវតែ​ដាក់​សម្ពាធ​ផ្នែក​ការទូត សន្ដិសុខ និង​សេដ្ឋកិច្ច​លើ​ប្រទេស​ចិន តាមរយៈ​ភាពជា​ដៃគូរ​នៃ​ក្រុម​ជា​សមាជិក​Quad ជា​ក្រុម​បង្កើតឡើង​ដោយមាន​កិច្ចសហការ​រវាង​ជប៉ុន ឥណ្ឌា អូស្ដ្រាលី និង​អាមេរិក ដើម្បី​ពង្រឹង​សណ្ដាប់ធ្នាប់​នៅ​តំបន់​ឥណ្ឌូ​-​ប៉ាស៊ីហ្វិក​ដោយ​សេរី​និង​បើកចំហ​។ ក៏​គួរតែមាន​ប្រតិ​បត្ដិកា​រ​ដើម្បី​បង្ហាញ​ពី​វត្ដ​មាន​យោធា​អាមេរិក ដូចជា​ប្រតិ​បត្ដិកា​រស្ដី​ពី​សេរីភាព​នៃ​ការរុក​រក ដើម្បី​ទប់​ទល់នឹង​ការអះអាង​ពង្រីក​ដែនទឹក​ពី​សំណាក់​ចិន​នៅ​សមុទ្រ​ចិន​ខាងត្បូង រួមជាមួយ​ការធ្វើ​សមយុទ្ធ​ដែនអាកាស​និង​លើ​សមុទ្រ ដូចជា​សមយុទ្ធ​ប្រចាំឆ្នាំ​Malabar​នៅ​ឈូង​សមុទ្រ​បេង​ហ្គាល់ និង​សមយុទ្ធ​Balikatan​នៅ​ហ្វីលីពីន មិន​ថា​ស្ថិតក្រោម​ប្រតិ​បត្ដិកា​ររបស់​ក្រុម​Quad​ឬ​ប្រតិ​ប​ត្ដិ​ការផ្សេង​ក៏ដោយ​។​

​ទី​ពីរ លោក​បាយដិន​ត្រូវតែប​ន្ដ​បង្កើនការ​ទប់ស្កាត់​ផ្នែក​យោធា ដោយ​ពង្រឹងសមត្ថភាព​យោធា​អាមេរិក​នៅ​តំបន់​ប៉ាស៊ីហ្វិក ដើម្បី​ដោះស្រាយ​លើ​វិស័យ​ងាយ​រងគ្រោះ​ថ្មី បណ្ដាលមកពី​យុទ្ធនាការ​កសាង​កោះ​របស់​ចិន និង​យុទ្ធសាស្ដ្រ​បដិសេធ​បង្កើតឡើង​ដើម្បី​រុញ​កងកម្លាំង​អាមេរិក​ចេញ​ក្រៅពី​តំបន់​ប្រជុំ​កោះ​ទីមួយ​និង​ទី​ពីរ​នៅក្នុង​សមុទ្រ​ប៉ាស៊ីហ្វិក​។ ខណៈដែល​លោក​ដូណាល់ ត្រាំ​បាន​ទាំង​បង្កើន​លើ​ការចំណាយ​ផ្នែក​យោធា​លើស​រដ្ឋបាល​ដឹកនាំ​ដោយ​លោក​អូ​បា​ម៉ា​ផង ប៉ុន្ដែ​កងទ័ពជើងទឹក​អាមេរិក​នៅតែ​ពុំមាន​នាវា​គ្រប់គ្រាន់​អាច​ចូលទៅក្នុង​តំបន់​នោះ​តាម​អ្វីដែល​ជា​ការប្ដេជ្ញាចិត្ដ​។ ថវិកា​ការពារជាតិ​ដំបូង​របស់លោក​បាយដិន​គួរតែ​រួមបញ្ចូល​ប្រាក់​សម្រាប់ក​ង​ទ័ពជើងទឹក ដើម្បី​បង្កើន​ការកសាង​ចំនួន​និង​គុណភាព​នាវា ក្នុងន័យ​អនុញ្ញាតឲ្យ​អាមេរិក​បន្ដធ្វើ​ប្រតិបត្ដិកា​រហួស​ពីប្រ​ជុំ​កោះ​ទីពីរ​ក្នុង​សមុទ្រ​ប៉ាស៊ីហ្វិក​។ ការងារ​នេះ​នឹង​ពាក់ព័ន្ធ​នូវ​ការសម្របសម្រួល​ត្រៀម​ទប់ស្កាត់​សង្គ្រាម​ក្រោម​សមុទ្រ ដូចជា​ត្រៀម​នាវាមុជទឹក នាវាមុជទឹក​គ្មាន​មនុស្ស​បើក និង​កង​នាវា​ដែលមាន​បច្ចេកវិទ្យា​បំបាំងកាយ​ជាដើម​។​

​ម្យ៉ាងវិញទៀត រដ្ឋបាល​របស់លោក​បាយដិន​គួរតែ​បន្ដផង​ដែរនូ​វ​ការពង្រឹង​លើ​កិច្ចប្រឹងប្រែង​ដែល​កំពុង​បន្ដ​ដោយ​ទីក្រុង​តូ​ក្យូ​និង​ទីក្រុង​វ៉ាស៊ីនតោន ដើម្បី​ផ្ដល់​ដល់​កងទ័ពជើងទឹក ឆ្មាំ​សមុទ្រ និង​ក្រុម​ជើង​អាកាស​ដែលជា​ដៃគូ​ក្នុង​តំបន់ នូវ​មូលដ្ឋាន​នៅ​អាស៊ី​ខណៈ​ពួកគេ​កំពុង​ខ្វះ​សមត្ថភាព​ការពារ​ដែនដី​របស់ខ្លួន ដូចជា​ហ្វីលីពីន ឥណ្ឌូនេស៊ី និង​វៀតណាម​។​

​ទី​បី ក្រុម​របស់លោក​បាយដិ​នក៏​អាច​ផងដែរ​ទទួ​ល​យក​យន្ដការ​មួយទៀត​របស់លោក​ត្រាំ​មក​អនុវត្ដ ស្ដីពី​ការប្រើប្រាស់​ការលើក​ទឹកចិត្ដ​ផ្នែក​សេដ្ឋកិច្ច​ក្នុងករណី​ត្រឹមត្រូវ ឬ​ដាក់​ទណ្ឌកម្មសេដ្ឋកិច្ច​ក្នុងករណី​ដែល​មិន​ត្រឹមត្រូវ​។ ចន្លោះពេល​កិច្ចព្រមព្រៀង​ពាណិជ្ជកម្ម​ជាមួយ​ចិន​អាចជា​ចំណុចរសើប​ផ្នែក​នយោបាយ នៅពេល​រដ្ឋបាល​ថ្មី​លោក​បាយដិន​ចូល​កាន់តំណែង​ដំបូង ប៉ុន្ដែ​លោក​អាច​ប្រើប្រាស់​នូវ​ពន្ធគយ​ដែលមាន​ស្រាប់​របស់លោក​ត្រាំ​ដាក់​លើ​ទំនិញ​ចិន ដើម្បី​ដាក់​សម្ពាធ​ទាញយក​ចំណេញ​សម្រាប់​ការចរចា​នៅ​ពេលអនាគត​។ មិនតែប៉ុណ្ណោះ​លោក​បាយដិ​ន​ក៏អាចប្រើប្រាស់​ពន្ធគ​យ​ឬ​ការដាក់ទណ្ឌកម្ម​បន្ថែម​លើ​ក្រុមហ៊ុន​ចិន​ឬ​មន្ដ្រី​បក្ស​កុម្មុយនីស្ដ​ចិន ជា​ការពិន័យ​នៅពេល​មាន​ភស្ដុតាង​បង្ហាញថា​មាន​អំពើ​ឈ្លានពាន​តាម​សមុទ្រ​នា​ពេលអនាគត​។​

​ទី​បួន ទោះបី​ប្រធានាធិបតី​ត្រាំ​ត្រូវបាន​គេ​រិះគន់​ជា​ញឹកញាប់​ចំពោះ​ការមិន​តស៊ូ​មតិ​ដើម្បី​សិទ្ធិមនុស្ស ក៏​រដ្ឋបាល​របស់លោក​ត្រាំ​បាន​ប្រឆាំងនឹង​សកម្មភាព​របស់​ទីក្រុង​ប៉េកាំង​នៅ​ហុងកុង និង​ការប្រព្រឹត្ដិ​របស់​ចិន​ទៅលើ​ក្រុម​មូស្លីម​អ៊ុយ​ហ្គួ​រ​នៅ​ស៊ីន​ជាំ​ង​។ រដ្ឋបាល​របស់លោក​បាយដិ​នក៏​គួរតែ​ធ្វើ​ដូចគ្នា និង​អនុវត្ដ​ច្បាប់​Global Magnitsky ដែល​ផ្ដល់​សិទ្ធិ​ដល់​រដ្ឋាភិបាល​អាមេរិក​ក្នុង​ការដាក់ទណ្ឌកម្ម​ជនល្មើស​សិទ្ធិមនុស្ស និង​ចំពោះ​មន្ដ្រី​ដែល​ពាក់ព័ន្ធ​ការរំលោភ​សិទ្ធិមនុស្ស​។ លោក​បាយដិ​នក៏​គួរតែ​បន្ដ​ផ្នែក​ផ្សេងទៀត​នៃ​គោលនយោបាយ​ដាក់​លើ​ចិន​របស់លោក​ត្រាំ ដូចជា​មាន​ជំហរ​តឹងរ៉ឹង​លើ​បច្ចេកវិទ្យា​5G​ដើម្បី​ការពារ​ទិន្នន័យ​អាមេរិក កាត់បន្ថយ​ការពឹងផ្អែក​លើ​ប្រទេស​ចិន​ចំពោះ​ឱសថ​និង​ឧបករណ៍​ការពារ​ផ្ទាល់ខ្លួន និង​បង្ហាញ​ពី​សាមគ្គីភាព​ជាមួយ​ឥណ្ឌា​រឿង​ដែល​ទីក្រុង​ប៉េកាំង​ចូល​បំពាន​នៅ​ជ្រលង​ភ្នំ​Galwan​។​

​ទោះបីជា​អ្វីដែល​បានលើកឡើង​ត្រូវបាន​គេ​មើលឃើញថា ជា​ចំណុច​វិជ្ជមាន​ដែល​លោក​ត្រាំ​ធ្វើ​ដើម្បី​ប្រឆាំង​ចិន ប៉ុន្ដែ​ក៏​ពុំមែន​មានន័យថា​គោលនយោបាយ​ការបរទេស​លោក​ត្រាំ​សុទ្ធតែ​ត្រូវ​ទទួលយក​ទាំងអស់​ដែរ​។ ជាក់ស្ដែង​លោក​ត្រាំ​បាន​អ​វត្ដ​មាន​ភាគច្រើន​នៅក្នុង​កិច្ចប្រជុំ​ប្រចាំឆ្នាំ​នៅ​អាស៊ី ដែល​អាច​ថា​បំផ្លាញ​ដល់​ភាពជឿជាក់​ទៅលើ​អាមេរិក​ក្នុងនាម​ពហុភាគី​និយម​។ ដូច្នេះ​លោក​បាយដិ​ននិង​មន្ដ្រី​ដែល​នឹងត្រូវ​ចូល​កាន់តំណែង​នាពេលខាងមុខ គួរ​រក​ផ្លូវ​ដើម្បី​ធ្វើ​យ៉ាងណាឲ្យ​អាមេរិកមាន​ឥទ្ធិពល​នៅក្នុង​តំបន់​អាស៊ី​ឡើងវិញ និង​ជួយ​បង្កើត​បទប្បញ្ញត្ដិ​ពាណិជ្ជកម្ម​សម្រាប់​អ្នកជំនាន់ក្រោយ​។ គួរ​និយាយ​ដែរថា ទីក្រុង​វ៉ាស៊ីនតោន​និង​ដៃគូ​អាស៊ី​គួរតែ​លើក​ទឹកចិត្ដ​ចិន​ឲ្យក្លាយ​ជាកម្លាំង​ស្ថាបនា​និង​ធ្វើការ​ដើម្បី​នាំយក​ភាពល្អ​បំផុត ចេញពី​ភាពជា​អ្នកដឹកនាំ​របស់ខ្លួន​។ តែ​អាច​ធ្វើបាន​បែបនេះ​អាមេរិក​ត្រូវតែ​ស្វែងរក​ការចូលរួម​ហើយ​ចៀសវាង​ឥរិយាបថ​ប្រឆាំងនឹង​ចិន​ទាំង​ទទឹងទិស ដែល​បន្សល់ទុក​ត្រឹម​ធ្វើឲ្យ​ចិន​កាន់តែ​រឹងរូស​ប្រឆាំង​អាមេរិក​វិញ​ប៉ុណ្ណោះ​។ 

​សំខាន់​ជាងនេះទៅទៀត លោកចូ បាយដិន​ត្រូវតែ​ដឹងថា​មិត្ដ​របស់​អាមេរិក​នៅ​អាស៊ី​ចង់ឲ្យ​លោក​ចៀសវាង​គោលនយោបាយ​ដាក់លើ​ចិន​ដែល​ប្រយ័ត្ន​ខ្ពស់​ពេក ដូច​កាល​លោក​អូ​បា​ម៉ា​ធ្វើ​ពេល​កាន់តំណែង តែ​ត្រូវ​បើក​ចិត្ដទ​ទួល​យក​នូវ​វិធានការ​ដ៏​គួរឲ្យ​ចាប់អារម្មណ៍​មួយចំនួន​របស់លោក​ដូ​ណាល់ ត្រាំ​៕

​ដោយ​៖​ពេញ ផេង​

ព័ត៌មានផ្សេងទៀត