សំបុត្រ​​ចូល​ទស្សនា​​ព្រឹត្ដិការណ៍​​កីឡា​​អូឡាំពិក​​នៅ​ជប៉ុន​​៨១​ម៉ឺន​​សំបុត្រ​​ដាក់​សុំ​ប្ដូរ​​យក​លុយ​វិញ​

03-12-2020 9:46 pm 396

​អ្នករៀបចំ​ព្រឹត្ដិការណ៍​កីឡា​អូឡាំពិក​ក្រុង​តូ​ក្យូ​ប្រទេស​ជប៉ុន​នៅ​ឆ្នាំ​២០២១ បានបញ្ជាក់​ថា​ពួកគេ​បាន​ទទួល​ពាក្យ​ស្នើសុំ​ដើម្បី​ដូរ​សំបុត្រ​ចូល​ទស្សនា​យកប្រាក់​វិញ​ប្រមាណ​៨១​ម៉ឺន​សំបុត្រ​។ ព្រឹត្ដិការណ៍​កីឡា​ដែល​គ្រោង​ធ្វើ​នៅ​រដូវក្ដៅ​ត្រូវបាន​ផ្អាក​ក្នុង​ឆ្នាំនេះ ដោយសារតែ​ការរីក​រាលដាល​ជំងឺ​កូវី​ដ​-១៩ ប៉ុន្ដែ​សំបុ​ទ្រ​ចូល​ទស្សនា​ដែល​លក់​រួច​ហើយ​នៅតែមាន​សុពលភាព​ដដែល​។ 

​គណៈកម្មាធិការ​រៀបចំ​ការប្រកួត​បាន​ទទួល​សំណើសុំ​ប្ដូរ​សំបុត្រ​យក​លុយ​វិញ​ក្នុង​រយៈពេល​២១​ថ្ងៃ​មក​ហើយ​គិត​ត្រឹម​ថ្ងៃទី​៣០​វិច្ឆិកា​ឆ្នាំ​២០២០ ដោយ​នឹង​បន្ដ​ទទួល​រហូតដល់​ថ្ងៃទី​២១​ខែ​ធ្នូ​នេះ​។ គណៈកម្មាធិការ​បញ្ជាក់​ថា ៨១​ម៉ឺន​សំបុត្រ​នេះ​ស្មើនឹង​ប្រមាណ​១៨​ភាគរយ នៃ​ចំនួន​សំបុត្រ​សរុប​៤,៤៥​លាន​សំបុត្រ​ដែល​បាន​លក់​ចេញ​។ អ្នក​រៀបចំ​កម្មវិធី​ថា​មិន​អាក់​អន់ចិត្ដ​នោះទេ ដ្បិត​សំបុត្រ​ជាង​៨០​ភាគរយ​ស្ថិតក្នុង​ដៃ​អ្នកទស្សនា​នៅឡើយ ស​បញ្ជាក់​ថា​ពួកគេ​ពិត​ជា​ចង់​ចូលរួម​ក្នុង​ព្រឹត្ដិការណ៍​កីឡា​នេះ ហើយ​គណៈកម្មាធិការ​ប្ដេជ្ញា​នឹង​រៀបចំ​ឲ្យមាន​សុវត្ថិភាព​បំផុត​៕

​ដោយ​៖​ពេញ ផេង​

ព័ត៌មានផ្សេងទៀត