ញ៉ាំ​អាហារ​ពេល​ល្ងាច​ឆ្អែត​ពេក ប្រឈម​នឹង​ជំងឺ​ធាត់​និង​មហារីក​ពោះវៀន​ធំ​

29-11-2020 5:50 pm 195

​នៅក្នុង​ចំណោម​អាហា​រទាំង​៣​ពេល គឺមាន​សារៈសំខាន់​ដូចគ្នា ប៉ុន្តែ​អាហារ​ពេលព្រឹក​សំខាន់​ជាងគេ ខណៈ​អាហារ​ពេល​ល្ងាច​គួរ​យកចិត្តទុកដាក់​បន្តិច ព្រោះ​វា​អាចធ្វើឲ្យ​មានសុខ​ភាពល្អ តែ​ក៏​អាចធ្វើឲ្យ​យើង​ប្រឈម​នឹង​ជំងឺ​ផងដែរ​។ ​មនុស្ស​មួយចំនួន ឲ្យ​តម្លៃលើ​អាហារ​ពេល​ល្ងាច​ជ្រុល​ហួសហេតុ ដោយ​រៀបចំ​របប​អាហារ ជាមួយ​រសជាតិ​ដែល​ខ្លួន​ចូលចិត្ត​យ៉ាងច្រើន​ពោ​រពាស ដើម្បី​បំពេញ​ភាព​ហត់នឿយ​ពី​ការងារ​ពេញ​មួយថ្ងៃ​។ ក៏ប៉ុន្តែ​ទម្លាប់​មួយ​នេះ​មិន​ត្រឹមត្រូវ​ឡើយ ព្រោះ​វា​អាច​បណ្តោល​ឲ្យ​ប្រឈម​នឹង​ជំងឺ​២​យ៉ាង គឺ​ជំងឺ​ធាត់​ឬ​លើស​ទម្ងន់​និង​ងាយ​នឹង​កើត​ជំងឺមហារីក​ពោះវៀន​ធំ​។​

​បើ​យោងតាម​ស្ថិតិ​បានឲ្យដឹងថា ៩០​ភាគរយ​នៃ​មនុស្ស​ដែលមាន​ជំងឺ​ធាត់ ដោយសារតែ​ការហូបចុក​ច្រើន​ហួស​កម្រិត​និង​អសកម្ម​ដែល​នាំឲ្យ​ជា​តិខ្លាញ់​កើនឡើង​កាន់តែ​ច្រើន​នៅក្នុង​រាងកាយ​។ មិនតែប៉ុណ្ណោះ ការស្ទង់មតិ​បាន​រកឃើញ​ទៀតថា មនុស្ស​ជាច្រើន​ពុំ​សូវ​ខ្វល់ខ្វាយ ជាមួយនឹង​ការ​ទទួលទាន​អាហារ ពេលព្រឹក​និង​ថ្ងៃត្រង់​ឡើយ ហើយ​បែរជា​មក​សម្រុក​ទទួល​ទាន​នៅពេល​ល្ងាច​វិញ​។ ទម្លាប់​នេះ ធ្វើឲ្យ​អ្នក​ធាត់​ដោយមិន​ដឹងខ្លួន ព្រោះ​ជាតិ​ខ្លាញ់​កើនឡើង​លើស​កម្រិត ដោយសារតែ​ហូប​ហើយក៏​គេង​តែម្តង រាងកាយ​មិនបាន​បញ្ចេញ​សកម្មភាព​។​

​ចំណែក​ជាតិ​ខ្លាញ់​ឆ្អែត នៅក្នុង​រាងកាយ​នឹង​ជួយ​ជំរុញ​ដល់​ការបញ្ចេញ​អាំង​ស៊ុយ​លីន ដែល​អាច​បណ្តាលឲ្យ​មានបន្ទុក​យ៉ាង​ធ្ងន់​ដល់​ការរំលាយ​អហារ និង​បណ្តោល​ឲ្យ​កើត​ជំងឺ​ទឹកនោមផ្អែម​។ ប្រសិនបើ​អ្នក​ញ៉ាំ​អាហារ ដែលមាន​ជាតិ​ប្រូតេអ៊ីន​ច្រើនពេក​ដូចជា សាច់សត្វ​ជាដើម រាងកាយ​មិន​អាចរំលាយ​អស់​ទាំងស្រុង​នោះឡើយ ហើយ​វា​នឹង​បង្ក​ទៅជា​ជាតិពុល ដែល​បង្កើន​ហានិភ័យ​នៃ​ជំងឺមហារីក​ពោះវៀន​ធំ​។ ដូច្នេះ ដើម្បី​កាត់បន្ថយ​គ្រោះថ្នាក់​មិន​មានន័យថា អ្នក​ត្រូវ​តម​អាហារ​ពេល​ល្ងាច​នោះទេ តែ​គួរ​ទទួលទាន​ក្នុង​កម្រិត​មធ្យម​និង​កុំឲ្យ​ឆ្អែត​ខ្លាំងពេក​៕

 ពាក្យគន្លឹះ  សុខភាពធាត់

ព័ត៌មានផ្សេងទៀត