លោក​ថាក់ស៊ីន ស៊ីណាវ៉ាត្រា ជោគជ័យ​ក្នុង​ជំនួញ​តែ​បរាជ័យ​ក្នុង​នយោបាយ​

22-11-2020 11:49 am 1084

​លោក​ថាក់ស៊ីន ស៊ីណាវ៉ាត្រា គឺជា​អតីត​នាយករដ្ឋមន្ត្រី​មួយរូប​របស់​ថៃ ដែលមាន​ប្រភព​ចេញពី​ត្រកូល​អ្នកជំនួញ​ដ៏​ធំ​ក្នុងប្រទេស​នេះ​។ លោក​គឺជា​បងប្រុស​បង្កើត​របស់​អ្នកស្រី​យីង​ឡាក់ ស៊ី​វ៉ា​ត្រា ដែលជា​អតីត​នាយករដ្ឋមន្ត្រី​ថៃ​ដូចគ្នា​។ លោក ថាក់ស៊ីន​បាន​ក្លាយជា​នាយ​រដ្ឋមន្ត្រី​ថៃ​កាលពី​ឆ្នាំ​២០០១ ហើយ​ត្រូវបាន​ក្រុម​យោធា​ធ្វើ​រដ្ឋប្រហារ​ទម្លាក់​ចេញពី​តំណែង​នៅ​ឆ្នាំ​២០០៦​។ ជីវិត​រស់នៅ​លោក​មិន​ធ្លាប់​លំ​ជួប​ការបាក​ឡើយ ប៉ុន្ដែ​អ្វីដែល​លំបាក​គឺ​ជីវិត​នយោបាយ ដែល​ធ្វើឲ្យ​លោកត្រូវ​និ​រទេសខ្លួន​ទៅ​រស់នៅ​ឯ​បរទេស​ដល់​សព្វថ្ងៃ​។

​ដើមកំណើត​និង​ការសិក្សា​

​លោក​ថាក់ស៊ីន ស៊ីណាវ៉ាត្រា​(Thaksin Shinawatra) កើត​នៅ​ថ្ងៃទី​២៦ ខែកក្កដា ឆ្នាំ​១៩៤៩ នៅក្នុង​ខេត្ត​ឈៀង​ម៉ៃ​(Chiang Mai)​ប្រទេស​ថៃ បច្ចុប្បន្ន​វ័យ​៧១​ឆ្នាំ​។ ដូនតា​របស់លោក​មាន​ដើមកំណើត​មកពី​ប្រទេស​ចិន គឺ​តា​ទូត​បាន​ចូលមក​ក្នុងប្រទេស​ថៃ​ក្នុង​ទសវត្ស​ឆ្នាំ​១៨៦០ និង​បាន​តាំង​ទីលំនៅ​ក្នុង​ខេត្ដ​ឈៀង​ម៉ៃ​ក្នុង​ឆ្នាំ​១៩០៨​។ លោក​ថាក់ស៊ីន​បានកើត​នៅក្នុង​គ្រួសារ​មាន​ទ្រ​ព​សម្បត្តិ​ស្តុកស្ដម្ភ ជា​ត្រកួល​អ្នកធ្វើជំនួញ​។ ឪពុក​របស់លោក​ក៏​ជា​អតីត​តំណាងរាស្ត្រ​ប្រចាំខេត្ត​ឈៀង​ម៉ៃ ចាប់ពី​ចុង​ទសវត្ស​ឆ្នាំ​១៩៦០​ដល់​៧០​ផងដែរ​។ លោក​មាន​បងប្អូន​ចំនួន​៩​នាក់ ហើយ​លោក​ក៏​ត្រូវបាន​គេ​ស្គាល់​យ៉ាងច្បាស់​ថា​ជា​បងប្រុស​បង្កើត​របស់​អ្នកស្រី​យី​ង​ឡាក់ ជា​អតីត​នាយករដ្ឋមន្ដ្រី​ថៃ​ដូចគ្នា​។ តាមរយៈ​ទ្រ​ព​សម្បត្តិ​ដ៏​ស្តុកស្តម្ភ លោក​ថាក់ស៊ីន​មិន​ប្រឈម​នឹង​ការលំបាក​ចំពោះ​បញ្ហា​ជីវភាព​នោះទេ ហើយ​លោក​ក៏បាន​ចូលក្នុង​វិស័យ​ជំនួញ​តាំងពីក្មេង​មកម្ល៉េះ​។ ពោលគឺ​នៅ​អាយុ​១៦​ឆ្នាំ លោក​បាន​ជួយ​មើល​ការខុសត្រូវ​ក្នុង​រោងភាពយន្ត​មួយ​ក្នុងចំណោម​រោងភាពយន្ត​ជាច្រើន​របស់​ឪពុក​ទៅហើយ​។ 

​លោក​ថាក់ស៊ីន ស៊ីណាវ៉ាត្រា បានបញ្ចប់​ការសិក្សា​នៅ​សាលា​ប៉ូលិស​ក្នុង​ឆ្នាំ​១៩៧៣ បន្ទាប់មក​ក៏​បានទទួល​អាហា​រូប​ក​រណ៏ទៅ​បន្ត​ការសិក្សា​នៅ​សាកល​វិទ្យាល័យ​Eastern Kentucky​នៅ​សហរដ្ឋអាមេរិក​។  លោក​បានបញ្ចប់​ការសិក្សា​ថ្នាក់បណ្ឌិត​នៅ​សាកលវិទ្យាល័យ​Sam Houston State ស្ថិតក្នុង​រដ្ឋ​តិច​សាស​(Texas)​សហរដ្ឋអាមេរិក​ក្នុង​ឆ្នាំ​១៩៧៨ ទទួល​សញ្ញាបត្រ​ថ្ងៃ​១២ ខែ​ឧសភា ឆ្នាំ​១៩៧៩ ជំនាញ​ទស្សនវិជ្ជា​។  បន្ទាប់ពី​បញ្ចប់​ការសិក្សា លោក​ក៏បាន​ត្រឡប់មក​កាន់​ប្រទេស​ថៃ​វិញ ដោយ​ចូល​បំរើ​ការងារ​នៅក្នុង​ផ្នែក​កងកម្លាំង​ប៉ូលិស​។ នៅ​ឆ្នាំ​១៩៨០​លោក ក៏បាន​រៀបការ​ជាមួយនឹង​អ្នកស្រី​ផុត​ចា​មែន ដា​មា​ប៉ុង​(Potjaman Damapong) ដោយ​មានកូន​ចំនួន​៣​នាក់ ប្រុស​មួយ​ស្រី​ពីរ ប៉ុន្ដែ​លែងលះ​នៅ​ឆ្នាំ​២០០៨​។ នៅ​ឆ្នាំ​១៩៨៧ លោក​ថាក់ស៊ីន​ក៏​បានសម្រេច​ចាកចេញ​ពី​ការងារ​ក្នុង​កងកម្លាំង​ប៉ូលិស​ថៃ ដើម្បី​ត្រឡប់​ចូលទៅក្នុង​ការងារ​ជំនួញ​ផ្ទាល់ខ្លួន​របស់លោក​វិញ​។ 

ការប្រឡូ​ក្នុង​នយោបាយ​

​នៅ​ចុងឆ្នាំ​១៩៩៤ លោក​ថាក់ស៊ីន​បាន​ចូលប្រឡូក​ក្នុង​ឆាកនយោបាយ​ដោយ​ចូល​ជា​សមាជិក​របស់ គណបក្ស​PDP ហើយ​លោក​ក៏បាន​ក្លាយទៅជា​រដ្ឋមន្ត្រី​ក្រសួងការបរទេស​ថៃ​នៅ​ឆ្នាំ​១៩៩៤​ផងដែរ​។ ប៉ុន្តែ​នៅ​ឆ្នាំ​១៩៩៦ លោក​ក៏បាន​សម្រេចចិត្ត​ចាកចេញ​ពី​គណបក្ស​នេះ ដោយ​ទៅ​បង្កើត​គណបក្ស​មួយ​ដោយ​ខ្លួនឯង​ឈ្មោះថា​ថៃ​រ៉ាក់​ថៃ​(Thai Rak Thai)​ក្នុង​ឆ្នាំ​១៩៩៨​។ ក្នុង​ការបោះឆ្នោត​នៅ​ឆ្នាំ​២០០១ ជ័យជម្នះ​ក៏បាន​ធ្លាក់​ទៅលើ​គណបក្ស​ដែល​ទើបតែ​បង្កើត​ថ្មី​នេះ ហើយ​លោក​ថាក់ស៊ីន​ក៏បាន​ក្លាយទៅជា​នាយករដ្ឋមន្ត្រី​របស់​ប្រទេស​ថៃ​។ ក្នុង​រយៈកាល​នៃ​ការដឹកនាំ​ក្នុង​អាណត្តិ​ដំបូង​នោះ លោក​ថាក់ស៊ីន បាន​ដាក់ចេញ​នូវ​គោលនយោបាយ​ជាច្រើន ដើម្បី​អភិវឌ្ឍ​ប្រទេសជាតិ​ជាពិសេស​ជួយ​ទៅដល់​ប្រជាជន​នៅតាម​តំបន់​ជនបទ​តែម្តង​។ ក្នុងនោះ ភាពក្រីក្រ​ក៏បាន​កាត់បន្ថយ​គួឲ្យកត់សម្គាល់​។ មិនតែប៉ុណ្ណោះ រដ្ឋាភិបាល​របស់លោក​ក៏បាន​ដាក់ចេញ​នូវ​គោលនយោបាយ​ធ្វើកំណែទម្រង់​លើ​វិស័យ​អប់រំ សេដ្ឋកិច្ច ហើយក៏​បាន​ដាក់ចេញ​នូវ​គោលនយោបាយ​កម្មវិធី​សុខភាព​ដល់​ប្រជាជន​ថៃ​ផងដែរ​។​

​នៅ​ឆ្នាំ​២០០៥ គណបក្ស​ថៃ​រ៉ាក់​ថៃ​(Thai Rak Thai)​របស់លោក​ថាក់ស៊ីន នៅតែ​ទទួលបាន​ជ័យជំនះ​ដដែល​។ ប៉ុន្តែ​យ៉ាងណាក៏ដោយ ការដឹកនាំ​ក្នុង​អាណត្តិ​ទី​២​មិនមាន​ដំណើរការ​ល្អ​ដូច​អាណត្តិ​ទី​១​ទេ ព្រោះថា​លោក​ត្រូវបាន​គេ​ចោទប្រកាន់​ជាច្រើន​ករណី ដូចជា​រឿងរ៉ាវ​អំពើពុករលួយ ប្រើប្រាស់​អំណាច​ផ្តាច់ការ អំពើ​ក្បត់ជាតិ និង​បទចោទប្រកាន់​ជាច្រើន​ទៀត​។  លុះដល់​ឆ្នាំ​២០០៦ ខណៈពេលដែល​លោក​ថាក់ស៊ីន​កំពុងតែ​ស្ថិតនៅ​ឯ​បរទេស កង​យោធា​ថៃ​ដែល​គេ​ហៅថា​ក្រុមប្រឹក្សាសន្តិសុខ​ជាតិ ក៏បាន​ធ្វើ​រដ្ឋប្រហា​រ​ទម្លាក់លោក​ចេញពី​តំណែង​។ មិនតែប៉ុណ្ណោះ ក៏បាន​រំលាយ​គណបក្ស​ថៃ​រ៉ាក់​ថៃ​(Thai Rak Thai) របស់លោក​ចោល ដើម្បី​រារាំង​កុំឲ្យ​ចូលរួម​ការបោះឆ្នោ​ត​នៅ​ពេលខាងមុខ​។ ជាងនេះទៀត ទ្រព្យសម្បត្ដិ​គ្រួសារ​លោក​ថាក់ស៊ីន​ប្រមាណ​ជាង​២​ពាន់​លាន​ដុល្លា​ត្រូវបាន​រឹបអូស ដោយ​គេ​ចោទប្រកាន់ថា​ជា​ទ្រ​ព​សម្បត្តិ​កើន​ខុសពី​ធម្មតា ចាប់តាំងពី​លោក​ថាក់ស៊ីន​ឡើងកាន់តំណែង​ជា​នាយ​រដ្ឋមន្ត្រី​កាលពី​ឆ្នាំ​២០០១​។ 

​លោក​ថាក់ស៊ីន​បាន​ត្រឡប់​ចូល​ប្រទេស​ថៃ​នៅ​ខែកុម្ភៈ​ឆ្នាំ​២០០៨ បន្ទាប់ពី​គណបក្ស​អំណាច​ប្រជាជន​ជា​បក្ស​លោក​គាំទ្រ បាន​ឈ្នះឆ្នោត​ក្រោយ​រដ្ឋប្រហារ​។ ប៉ុន្ដែ​បន្ទាប់ពី​លោក​ចាកចេញ​ពី​ថៃ​ទៅ​ទីក្រុង​ប៉េកាំង ចូលរួម​ព្រឹត្ដិការណ៍អូ​ឡាំ​ពិក​ក្នុង​រដូវក្ដៅ​ឆ្នាំ​២០០៨ លោក​មិនបាន​ត្រឡប់មក​ប្រទេស​ថៃ​វិញ​ទេ ហើយក៏​មិនបាន​ចូលរួម​សវនាការ​កាត់ទោស​លើកចុងក្រោយ​នៅ​តុលាការ​កំពូល​ដែរ​។ លោក​បានដាក់​ពាក្យសុំ​សិទ្ធិ​ជ្រកកោន​នៅ​ចក្រភព​អង់គ្លេស ប៉ុន្ដែ​ការស្នើសុំ​ត្រូវបាន​បដិសេធ បន្ទាប់មក​លោក​ត្រូវ​ធ្វើដំណើរ​ពី​ប្រទេសមួយ​ទៅ​ប្រទេស​មួយ​។ នៅ​ខែតុលា​ឆ្នាំ​២០០៨ តុលាការ​កំពូល​រកឃើញ​ពិរុទ្ធ​ទាក់ទង​នឹង​ទំនាស់​ផលប្រយោជន៍ ហើយ​បាន​កាត់ទោស​កំបាំងមុខ​ឲ្យ​លោក​ជាប់ពន្ធនាគារ​រយៈ​ពេល​ពីរ​ឆ្នាំ​។​

​បច្ចុប្បន្ននេះ​លោក​ថាក់ស៊ីន​នៅ​បន្ត​រស់នៅ​ក្រៅប្រទេស​នៅឡើយ​រយៈពេល​ជាង​១០​ឆ្នាំ​មកហើយ ដើម្បី​គេច​ពី​ការដាក់ទោស​។  ប៉ុន្តែ​យ៉ាង​ក៏ដោយ លោក​ថាក់ស៊ីន​បាន​លើកឡើងថា លោក​មិន​បានធ្វើ​រឿង​ខុស​ដូច​ការចោទប្រកាន់​នោះទេ​។ ជា​ការកត់សម្គាល់​ក្រោយពី​លោក​ថាក់ស៊ីន ត្រូវបាន​គេ​ធ្វើ​រដ្ឋប្រហារ​ទម្លាក់​ចេញពី​តំណែង​រួចមក ប្អូនស្រី​បង្កើត​របស់លោក​គឺ​អ្នកស្រី​យី​ង​ឡាក់ ស៊ីណាវ៉ាត្រា ក៏បាន​ចូលប្រឡូក​ក្នុង​ឆាកនយោបាយ​បន្ដ​ពី​បងប្រុស ហើយក៏​បាន​ក្លាយជា​នាយ​យក​រដ្ឋមន្ត្រី​ថៃ​នៅ​ឆ្នាំ​២០១១​។ វត្តមាន​អ្នកស្រី​យី​ង​ឡាក់​ក្នុង​ឆាកនយោបាយ​ថៃ ក៏​ត្រូវបាន​ក្រុម​ប្រឆាំងនឹង​លោក​ថាក់ស៊ីន​លើកឡើងថា អ្វីៗ​ជា​ការរៀបចំ​របស់លោក​ថាក់ស៊ីន​ប៉ុណ្ណោះ​។ តែ​លោក​ថាក់ស៊ីន​ក៏បាន​បដិសេធ​ជុំវិញ​បញ្ហា​នេះ​។  

​ដឹកនាំ​ប្រទេស​មិនបាន​ប៉ុន្មាន​ឆ្នាំ​ផង គឺ​នៅ​ថ្ងៃទី​០៧ ខែ​ឧសភា ឆ្នាំ​២០១៤ តុលាការ​ធម្មនុញ្ញ​ថៃ​បាន​ទម្លាក់​អ្នកស្រី​ចេញពី​តំណែង​នាយករដ្ឋមន្ដ្រី ក្រោយ​មាន​វិបត្ដិនយោបាយ​ជាច្រើន​ខែ​។ ទីបំផុត​នៅ​ថ្ងៃទី​២២ ខែ​ឧសភា ឆ្នាំ​២០១៤ យោធា​ក៏​ធ្វើ​រដ្ឋប្រហារ​ទម្លាក់​រដ្ឋាភិបាល​អ្នកស្រី​យីង​ឡាក់ ស៊ីណាវ៉ាត្រា​បន្ដទៀត ដើម្បី​ស្ដារ​ស្ថានការណ៍​ពី​ភាពវឹកវរ​ដោយសារ​ការតវ៉ា​។ បច្ចុប្បន្ន​អ្នកស្រី​ក៏មាន​ជាប់​ព័ន្ធ​នឹង​ការចោទប្រកាន់​ជាច្រើន​ករណី និង​បានគេច​ចេញពី​ប្រទេស​ថៃ​ដើម្បី​រួច​ផុតពី​ទោសទណ្ឌ​ផងដែរ​។ សរុបមក​ទាំង​លោក​ថាក់ស៊ីន​និង​អ្នកស្រី​យី​ង​ឡាក់​នៅពេលនេះ មាន​វាសនា​ដូចគ្នា គឺ​ត្រូវ​និរទេស​ទៅ​រស់នៅ​ក្រៅ​ស្រុក​ឆ្ងាយ​ពី​ទឹកដី​កំណើត​។ ដ្បិត​ជា​អ្នកជំនួញ​ដ៏​ជោគជ័យ​មួយរូប ប៉ុន្ដែ​លោក​ថាក់ស៊ីន​ត្រូវ​បរាជ័យ​ក្នុង​ជីវិត​នយោបាយ​។ សព្វថ្ងៃ​លេចដំណឹង​ថា​លោក​ថាក់ស៊ីន​មាន​ទីលំនៅ​ក្នុង​ទីក្រុង​ឌូ​បៃ​ប្រទេស​អារ៉ាប់​រួម ហើយ​អ្នកស្រី​យី​ង​ឡាក់​វិញ​លេចលឺ​ថា​នៅ​អង់គ្លេស​ផង នៅ​អារ៉ាប់​រួម​ផង ហើយក៏​មាន​ព័ត៌មាន​ថា​អ្នកស្រី​ទទួលបាន​សញ្ជាតិ​ស៊ែ​ប៊ី​ក្នុង​ឆ្នាំ​២០១៩៕

​ដោយ​៖​ពេញ ផេង​

ព័ត៌មានផ្សេងទៀត