​គណបក្ស​ចំនួន​៣​​រួបរួមគ្នា​អាច​ទាក់ទាញ​​ការគាំទ្រ​ពី​ពលរដ្ឋ​បានទេ​?​

17-11-2020 12:20 pm 1424

​ថ្មីៗ​នេះ​មាន​គណប្សនយោបាយ​ចំនួន​៣ បានសម្រេច​ចងសម្ព័ន្ធភាព​ជាមួយគ្នា ដើម្បី​ចូលរួម​ប្រកួតប្រជែង​ក្នុង​ការបោះឆ្នោត​ឃុំ​សង្កាត់​នៅ​ឆ្នាំ​២០២២​និង​ការបោះឆ្នោតជាតិ​នៅ​ឆ្នាំ​២០២៣​ខាងមុខ​។ តើ​ការ​រួបរួមគ្នា​ជា​សម្ព័ន្ធភាព​រវាង​គណ​បក្ស​ទាំង​៣​នេះ អាច​ទាក់ទាញ​ការគាំទ្រ​ពី​ប្រជាពលរដ្ឋ​បាន​ដែរឬទេ​?

​លោក​បណ្ឌិត​មាស នី អ្នកវិភាគ​បញ្ហា​សង្គម​និង​នយោបាយ​នៅ​កម្ពុជា លោក​មើលឃើញថា គណបក្សនយោបាយ​ទាំងអស់​នៅក្នុង​ប្រទេស​កម្ពុជា ក្រៅពី​គណបក្ស​ប្រជាជន​កម្ពុជា គណបក្ស​ដែល​ប្រជាពលរដ្ឋ​និយម​ចង់ឱ្យមាន​ការផ្លាស់ប្ដូរ​តាមរយៈ​ការបោះឆ្នោត មានតែ​អតីត​គណបក្ស​សង្គ្រោះ​ជាតិ​តែប៉ុណ្ណោះ​។ ប៉ុន្តែ​យ៉ាងណាក៏ដោយ​លោក​បណ្ឌិត​មាស នី នៅ​មិនទាន់​អាច​សន្និដ្ឋានបានថា​ការរួបរួម​ជា​សម្ព័ន្ធភាព​រវាង​គណ​បក្ស​ទាំង​៣​ខាងលើ អាច​ទាក់ទាញ​ការគាំទ្រ​ពី​ប្រជាពលរដ្ឋ​បាន​ឬ​យ៉ាង​នោះទេ ដោយ​លោក​រង​ចាំមើល​យុទ្ធសាស្ត្រ​នៃ​ការរួបរួម​របស់​គណ​បក្ស​ទាំង​៣​នេះ​សិន​…………

​សំឡេង​លោក​បណ្ឌិត​មាស នី​៖

​បើតាម​លោក​បណ្ឌិត​មាស នី គណបក្ស​មួយចំនួន​មិនមែនជា​អ្នក​និយម​ក្នុង​ការផ្លាសប្ដូរ ឬក៏​ប្រឈម​ជាមួយ​គណបក្ស​ប្រជាជន​កម្ពុជា ដូច​អតីត​គណបក្ស​សង្គ្រោះ​ជាតិ​ទេ ក៏ប៉ុន្តែ​ពួកគេ​ព្យាយាម​ផ្លាស់ប្ដូរ​មួយ​ដែល​ចូលរួម​ពី​ខាងក្នុង​។ ជាមួយគ្នានេះដែរ​លោក​លើ​ក​ឡើង​ថា មាន​គណបក្សនយោបាយ​មួយចំនួនទៀត​ បានធ្វើការ​ក្រោម​ស្លាប​គណបក្ស​ប្រជាជន​កម្ពុជា​ផងដែរ​។ ចំណែក​អតីត​គណបក្ស​សង្គ្រោះ​ជាតិ ដែល​លោក​មើលឃើញថា ប្រជាពលរដ្ឋ​និយម​ចង់ឱ្យមាន​ការផ្លាស់ប្ដូរ ដោយសារតែ​អតីត​គណបក្ស​នេះ មាន​អ្នក​គាំទ្រ​ច្រើន​ទាំង​នៅ​ក្នុងប្រទេស ក៏ដូចជា​នៅ​ក្រៅប្រទេស​។​

​ដោយឡែក​លោក​បណ្ឌិត​គិន ភា​ អ្នកវិភាគបញ្ហាសង្គម និងនយោបាយនៅកម្ពុជាមួយរូបទៀត លោក​គ្មាន​សុទិដ្ឋិនិយម​ថា ការសម្រេច​ចងសម្ព័ន្ធភាព​ជាមួយគ្នា​រវាង​គណបក្ស​ទាំង​៣​ខាងលើ អាច​ទាក់ទាញ​ការគាំទ្រ​ពី​ប្រជាពលរដ្ឋ​ឡើយ​។ គ្មាន​សុទិដ្ឋិនិយម​ដោយ​លោក​លើកឡើងថា ការរួបរួម​រវាង​គណបក្ស​នយោបាយ ក៏ដូចជា​អ្នកប្រជាធិបតេយ្យ មិនមែន​ទើបតែ​កើតមាន​នោះទេ ពីមុន​ក៏មាន​ការរួបរួម​បែប​នេះដែរ ប៉ុន្តែ​ក៏បាន​បាត់​ទៅវិញ​…………

​សំឡេង​លោកបណ្ឌិត​គិន ភា​៖

​សូមបញ្ជាក់ថា គណបក្សនយោបាយ​ចំនួន​៣ គឺ​គណបក្ស​សំបុក​ឃ្មុំ​សង្គម​ប្រជាធិបតេយ្យ​របស់លោក​ម៉ម សូណង់ដូ គណបក្ស​ខ្មែរ​រួបរួម​ជាតិ​របស់លោក​ញឹក ប៊ុនឆៃ និង​គណបក្ស​ខ្មែរ​តែមួយ​របស់លោក​កែម រិទ្ធិ​សិត បានសម្រេច​ចងសម្ព័ន្ធភាព​ជាមួយគ្នា ដើម្បី​ចូលរួម​ប្រកួតប្រជែង​ក្នុង​ការបោះឆ្នោត​ឃុំ​សង្កាត់​នៅ​ឆ្នាំ​២០២២ និង​ការបោះឆ្នោតជាតិ​នៅ​ឆ្នាំ​២០២៣​ខាងមុខ​។ សម្ព័ន្ធភាព​នៃ​គណបក្សនយោបាយ​ទាំង​៣​នេះ មាន​ឈ្មោះថា «​សម្ព័ន្ធភាព​អ្នកប្រជាធិបតេយ្យ​ខ្មែរ (​ស​.​ប​.​ខ​)៕
 

ព័ត៌មានផ្សេងទៀត