ព្យុះ​ស៊ីក្លូន​Vamco​បន្ត​វាយប្រហារ​ហ្វីលីពីន​និង​ផ្ដាច់​ជីវិត​មនុស្ស​៦៧​នាក់​

15-11-2020 4:37 pm 823

​មន្ត្រី​ហ្វីលីពីន​បាន​និយាយ​នៅ​ថ្ងៃ​អាទិត្យ​ទី​១៥ វិច្ឆិកា ឆ្នាំ​២០២០​នេះ​ថា ចំនួន​អ្នក​ស្លាប់​ដោយសារ​ព្យុះ​ស៊ីក្លូន​ដែល​បោកបក់​ខ្លាំង​បំផុត​នៅ​ប្រទេស​ហ្វីលីពីន​នា​ឆ្នាំ​នេះ​បាន​កើនឡើង​ដល់ ៦៧ នាក់​ហើយ​។ តំបន់​ជាច្រើន​នៅតែ​លិច​ទឹក​នៅ​ភាគ​ខាងជើង​ប្រទេស​ហ្វីលីពីន ដែល​រង​ការវាយប្រហារ​ដោយ​ទឹកជំនន់​ដ៏​អាក្រក់​បំផុត​ក្នុង​រយៈពេល​ប្រមាណ ៤​ទសវត្ស​ចុង​ក្រោយ​នេះ​។​

​ប្រធានាធិបតី​ហ្វីលីពីន​លោក​រ៉ូ​ឌ្រី​ហ្គោ ឌូ​តឺ​តេ បាន​ហោះ​ទៅ​ខេត្ត​Tuguegarao ដើម្បី​វាយតម្លៃ​ពី​ស្ថានភាព​នៅ​តំបន់​Cagayan Valley​។ ការចុះ​ត្រួតពិនិត្យ​ដោយ​ផ្ទាល់​របស់​លោកឌូ​តឺ​តេ បន្ទាប់​ពី​ព្យុះ​បាន​បង្ក​ជា​ការ​ជន់​លិច​យ៉ាងខ្លាំង ដោយសារ​ឥទ្ធិពល​ព្យុះ​Vamco ខណៈ​ភ្លៀង​បាន​បង្អុរ​យ៉ាង​ខ្លាំង​នៅ​លើ​ឯ​កោះ​Luzon រួម​ទាំង​រដ្ឋធានី​ម៉ានីល​ផងដែរ​។​

​ជុំវិញ​ករណី​អ្នកស្លាប់​ដោយសារ​ព្យុះ​ដ៏​អាក្រក់​នេះ អ្នកនាំពាក្យ​ទីភ្នាក់ងារ​គ្រប់គ្រង​គ្រោះមហន្តរាយ​ហ្វីលីពីន បាន​និយាយថា អ្នកស្លាប់​មាន​ចំនួន ២២​នាក់​នៅក្នុង​តំបន់​Cagayan ១៧​នាក់​នៅ​ភាគខាងត្បូង​កោះ​លូ​ហ្សុន ៨​នាក់​នៅ​រដ្ឋធានី​ម៉ានីល និង ២០​នាក់​នៅ​តំបន់​ពីរ​ផ្សេង​ទៀត​។ អ្នកនាំពាក្យ​រូប​នេះ​បន្តថា មនុស្ស ១២​នាក់ កំពុង​បាត់​ខ្លួន​នៅឡើយ​ហើយ​ផ្ទះ​ជិត ២៦,០០០​ខ្នង​រង​នូវ​ការខូចខាត​។​

​ជា​ការឆ្លើយតប​ទៅនឹង​ការវាយប្រហារ​ដោយ​ព្យុះ​កំណាច​នេះ លោក​Manuel Mamba អភិបាលខេត្ត Cagayan បាន​ថ្លែង​ក្នុង​សន្និសីទកាសែត​ជាមួយ​លោកឌូ​តឺ​តេ​ថា នេះ​ជា​ព្យុះដ៏​អាក្រក់​បំផុត​ពុំ​ធ្លាប់មាន​ក្នុង​រយៈពេល ៤៥​ឆ្នាំ​ចុងក្រោយ​នេះ​។ លោក​Mamba ថា ព្យុះ​នេះ​វា​កាន់តែ​អាក្រក់​ឡើងៗ​ជា​រៀងរាល់ឆ្នាំ​។ មិនតែប៉ុណ្ណោះ​លោក​Mamba ក៏បាន​លើកឡើង​ដដែល​ពី​ការកាប់បំផ្លាញ​ព្រៃឈើ​នៅក្នុង​ខេត្ត​Cagayan នឹង​បាន​ទទូច​ឲ្យ​លោកឌូ​តឺ​តេ​ចេញ​បញ្ជា​ក្នុងការ​បង្រ្កាបការកាប់បំផ្លាញ​ព្រៃឈើ​។​

​យ៉ាងណា ប្រតិ​បត្ដិកា​រជួយ​សង្គ្រោះ​កំពុង​បន្ត​នៅ​ខេត្ត​Cagayan ស្របពេល​ដែល​ទំនប់​ស្តុក​ទុក​ទឹក​ដ៏​ធំ​Magat ដែល​នៅ​ក្បែរ​នោះ​កំពុង​ត្រូវ​បាន​បញ្ចេញ​ទឹក​ដ៏​ធំ ក្នុង​បរិមាណ​ស្មើ​នឹង​អាង​ហែល​ទឹក​អូឡាំពិក​ដល់​ទៅ​២​ដង​ឯណោះ​៕ ដោយ​៖ យឺន សីហា​

ព័ត៌មានផ្សេងទៀត