វ៉ាក់សាំង​​ប្រឆាំង​​កូវី​ដ​-១៩​​របស់​ក្រុមហ៊ុន​​Pfizer​​មាន​ប្រសិទ្ធភាព​​ជាង​៩០​ភាគរយ​

10-11-2020 2:47 pm 377

​ក្រុមហ៊ុន​ផលិត​ឱសថ​របស់​អាមេរិក​Pfizer​បានប្រកាស​កាលពី​ថ្ងៃ​ចន្ទ​ថា តាម​ការវិភាគ​លើ​ទិន្នន័យ​ដំបូង​នៃ​វ៉ាក់សាំង​ប្រឆាំង​កូវី​ដ​-១៩​បង្ហាញ​ឲ្យដឹងថា វ៉ាក់សាំង​នេះ​មាន​ប្រសិទ្ធភាព​ខ្ពស់​ក្នុង​ការ​ការពារកូ​វីដ​-១៩​។ នេះ​ជា​ការអភិវឌ្ឍ​ថ្មី​មួយ​ខណៈដែល​ពិភពលោក​កំពុង​រង់ចាំ​វ៉ាក់សាំង​យ៉ាង​អន្ទះអន្ទែង​។ ក្រុមហ៊ុន​Pfizer​ដែល​បាន​ចាំ​ដៃ​ផលិត​វ៉ាក់សាំង​ជាមួយ​ក្រុមហ៊ុន​ផលិត​ឱសថ​អាល្លឺម៉ង់​BioNTech ចេញផ្សាយ​ព័ត៌មាន​លម្អិត​បន្ថែម​ពី​ការសាកល្បង​នៅតាម​គ្លីនិក​របស់ខ្លួន ដោយ​ផ្អែកលើ​ការពិនិត្យ​ទិន្នន័យ​ជា​ផ្លូវការ​លើកដំបូង ពី​សំណាក់​ក្រុម​អ្នកជំនាញ​មកពី​ខាងក្រៅ​ក្រុមហ៊ុន​។​

​តាមរយៈ​ការវិភាគ​បង្ហាញឲ្យឃើញថា វ៉ាក់សាំង​មាន​ប្រសិទ្ធភាព​រហូតដល់​ជាង​៩០​ភាគរយ​ឯណោះ ទៅលើ​អ្នក​ដែល​ស្ម័គ្រចិត្ដ​សាកល្បង​ធ្វើតេស្ដ​វ៉ាក់សាំង ដោយ​ពួកគេ​ពុំមាន​អាកា​រៈណា​មួយ​បង្ហាញថា​បាន​ឆ្លងកូវី​ដ​-១៩​ឡើយ​។  ក្រុមហ៊ុន​Pfizer​គ្រោង​នឹង​ស្នើសុំ​ទៅ​រដ្ឋបាល​ចំណីអាហារ​និង​ឱសថ​សហរដ្ឋអាមេរិក សម្រាប់​ការអនុញ្ញាត​ជាបន្ទាន់​នូវ​វ៉ាក់សាំង​ចំនួន​ពីរដូ​សនៅ​ចុងខែ​នេះ បន្ទាប់ពី​ក្រុមហ៊ុន​ប្រមូលបាន​ទិន្នន័យ​សុវត្ថិភាព​ក្នុង​រយៈពេល​ពីរ​ខែ​នៃ​ការធ្វើ​តេស្ដ​សាកល្បង​ដំណាក់កាល​ចុងក្រោយ​។ នៅ​ចុងឆ្នាំ​២០២០​នេះ ក្រុមហ៊ុន​នឹង​ផលិត​កម្រិត​វ៉ាក់សាំង​ឲ្យបាន​គ្រប់ដូស ដើម្បី​ចាក់​លើ​មនុស្ស​ចន្លោះ​ពី​១៥​ទៅ​២០​លាន​នាក់​។ 

​អ្នកស្រី​Kathrin Jansen​អនុប្រធាន​ជាន់ខ្ពស់ និង​ជា​ប្រធាន​ផ្នែក​ស្រាវជ្រាវ​និង​អភិវឌ្ឍ​វ៉ាក់សាំង​នៅ​ក្រុមហ៊ុន​Pfizer​បាន​មានប្រសាសន៍ថា នេះ​គឺជា​ឱកាស​ដ៏​ល្អ​មួយ​ក្នុង​ប្រវត្ដិសាស្ដ្រ​។ ស្ថានភាព​អាក្រក់​បំផុត​ដោយសារតែ​ការឆ្លង​រាតត្បាត​នៃ​ជំងឺ​កូវី​ដ​-១៩ បានធ្វើឲ្យ​យើង​អាច​ដើរ​លើ​ផ្លូវនិង​ជា​គោលដៅ​ដែល​ពុំទាន់​មាន​នរណាម្នាក់​អាច​ធ្វើបាន គឺអាច​ទទួលបាន​វ៉ាក់សាំង​ក្នុង​រយៈពេល​តែ​មួយឆ្នាំ​។​

​ពាក់ព័ន្ធ​នឹង​ការផលិត​វ៉ាក់សាំង​ការពារកូ​វីដ​-១៩ អ្នកវិទ្យាសាស្ដ្រ​ឯករាជ្យ​បាន​ព្រមាន​ប្រឆាំងនឹង​ការរកឃើញ​លទ្ធផល​មុន​ទិន្នន័យ​សុវត្ថិភាព​រយៈពេល​វែង​ត្រូវ​ប្រមូលបាន​។ ក៏​ពុំទាន់​មាន​នរណា​ដឹង​ឡើយ​ថា​វ៉ាក់សាំង​អាច​ការពារ​បាន​រយៈពេល​យូរ​បំផុត​ប៉ុន្មាន​។ ទោះជា​យ៉ាងណា​ការអភិវឌ្ឍ​នេះ​ធ្វើឲ្យ​ក្រុមហ៊ុន​Pfizer​ក្លាយជា​ក្រុមហ៊ុន​ដំបូងបង្អស់ ដែល​ប្រកាស​លទ្ធផល​វិជ្ជមាន​ពី​ការសាកល្បង​វ៉ាក់សាំង​ដំណាក់កាល​ចុងក្រោយ តាំងពី​មាន​ការប្រកួតប្រជែង​ផលិត​វ៉ាក់សាំង​ក្នុង​ខែ​មករា ហើយ​ក្រុមហ៊ុន​នេះ​បាន​បំបែក​កំណត់ត្រា​បាន​លឿន​ជាងគេ​។​

​គួរ​ជម្រាបជូន​ថា វ៉ាក់សាំង​ចំនួន​១១​ផ្សេងគ្នា​កំពុង​ស្ថិតក្នុង​ការសាកល្បង​ដំណាក់កាល​ចុងក្រោយ ក្នុងនោះ​មាននៅ​សហរដ្ឋអាមេរិក​ចំនួន​៤​វ៉ាក់សាំង​ផងដែរ​។ វឌ្ឍនភាព​របស់​ក្រុមហ៊ុន​Pfizer អាចជា​សញ្ញា​ល្អ​សម្រាប់​វ៉ាក់សាំង​របស់​ក្រុមហ៊ុន​អង់គ្លេស​Moderna ដោយសារតែ​ប្រើ​បច្ចេកវិទ្យា​ស្រដៀង​គ្នា​។ អ្នកនាំពាក្យ​ក្រុមហ៊ុន​Moderna​បាន​និយាយថា ក្រុមហ៊ុន​រំពឹង​នឹងមាន​ការរកឃើញ​បណ្ដោះអាសន្ន​ណាមួយ​ពី​ការសិក្សា​របស់ខ្លួន​ក្នុង​ខែ​នេះ​៕

 ពាក្យគន្លឹះ  កូវីដ១៩វ៉ាក់សាំង

ព័ត៌មានផ្សេងទៀត