បាញ់ប្រហារ​ភេរវកម្ម​នៅ​អូទ្រីស​ស្លាប់​មនុស្ស​២​នាក់​

03-11-2020 11:55 am 701

​មនុស្ស​ចំនួន​២​នាក់​ត្រូវបាន​បាញ់​សម្លាប់​និង​១៤​នាក់​របួស នៅក្នុង​ហេតុការណ៍​បាញ់ប្រហារ​ភេរវកម្ម នៅក្នុង​ទីក្រុង​វី​យែន​ណា​(Vienna) ប្រទេស​អូទ្រីស​នៅ​យប់​ថ្ងៃ​ចន្ទ​ទី​០២ វិច្ឆិកា ឆ្នាំ​២០២០​។  ក្រោយ​សន្ធឹក​អាវុធ​បាន​ផ្ទុះ រដ្ឋមន្ត្រីក្រសួង​មហាផ្ទៃ​លោក​Karl Nehammer បាន​ដឹកនាំ​កងកម្លាំង​ពិសេស​ជាច្រើន​រួម​គ្នា ដើម្បី​ស្វែងរក​ជន​សង្ស័យថា​ជា​គ្នីគ្នា​របស់​ក្រុម​ភេរ​វករ តែ​នៅ​មិនទាន់​កំណត់​ទីតាំង​របស់​ពួកគេ​បាន​នៅឡើយ​ទេ​។ មិនទាន់​អាច​កំណត់​ទីតាំង​បាន ពី​ព្រោះ​ក្រុម​ភេរ​វករ​ទាំងនោះ តែងតែ​ចល័ត​ទីតាំង​ជា​ញឹកញាប់ ដើម្បី​គេច​ពី​ការតាមប្រមាញ់ ហេតុដូច្នេះ​ហើយ​ទើប​ធ្វើ​ឲ្យ​ពិបាក​ក្នុង​ការចាប់​សញ្ញា​ថា​ពួកគេ​លាក់ខ្លួន​នៅទីណា​ឲ្យ​ពិតប្រាកដ​។ លោក​រដ្ឋមន្ត្រី​រូបនេះ​បាន​អះអាង​ថា ទីតាំង​ដែល​រង​ការវាយប្រហារ​មាន​ចំនួន ៦​ទីតាំង និង​ស្ថិតនៅ​ក្បែរៗ​វិហារ​អធិដ្ឋាន​របស់​សាសនា​ជ្វី​ហ្វ​។​

​ពាក់ព័ន្ធ​នឹង​ភេរវកម្ម​ដ៏​គួរឲ្យ​ភ្ញាក់ផ្អើល​នេះដែរ លោក​អធិការបតី​Sebastian Kurz វិញ បាន​និយាយថា កងទ័ព​ត្រូវ​ចេញ​ប្រតិបត្តិ​ការការពារ​ទីតាំង​នានា​នៅក្នុង​រដ្ឋធានី ដូច្នេះ​ប៉ូលិស​អាច​នឹង​ផ្តោត​លើ​ប្រតិបត្តិ​ការប្រឆាំង​ភេរវកម្ម​តែម្ដង​។ លោក​ថ្លែង​បញ្ជាក់​បន្ថែម​ទៅ​កាន់​វិទ្យុ​ORF​ថា ក្រុម​ភេរ​វករ​បំពាក់​ទៅ​ដោយ​អាវុធ​ស្វ័យប្រវត្តិ​យ៉ាង​ល្អ​ប្រណីតៗ និង​ពោរពេញ​ទៅ​ដោយ​ភាព​វ័យ​ឆ្លាត​។ ប៉ូលិស​ក៏​បាន​និយាយ​ដែរ​ថា ខ្លួន​បាន​បាញ់សម្លាប់​ភេរ​វករ​ម្នាក់​ក្នុង​ពេល​ចុះបង្ក្រាប​។ លោក​អធិការបតី​Sebastian Kurz បាន​ហៅ​ថា វា​ជា​ការវាយប្រហារ​ភេរវកម្ម​ដ៏​គួរឲ្យ​ស្អប់ខ្ពើម​បំផុត​។ 

​ឆ្លើយតប​នឹង​ភេរវកម្ម​ដ៏​ឃោរឃៅ​នេះ រដ្ឋមន្ត្រីក្រសួង​មហាផ្ទៃ​លោក​Karl Nehammer បាន​ព្រមាន​ដល់​ពលរដ្ឋ​ឲ្យនៅ​ឆ្ងាយ​ពី​ទីក្រុង​Vienna និង​ថែម​ទាំង​រឹតបន្តឹង​លើ​ការត្រួតពិនិត្យ​ព្រំដែន​។ ដើម្បី​ធានា​ដល់​សុវត្ថិភាព កុមារ​មិន​តម្រូវឲ្យ​ចូលរៀន​សាលា​រៀន​ឡើយ​នៅ​ថ្ងៃ​អង្គារ៍​នេះ​។ 

​ជា​ការកត់សំគាល់ ការវាយប្រហារ​នេះ បាន​កើតឡើង​នៅ​ប៉ុន្មាន​ម៉ោង មុនពេល​ដែល​ប្រទេស​អូទ្រីស​ដាក់​ការ​រឹតត្បិត​ថ្នាក់ជាតិ​ថ្មី ដើម្បី​ព្យាយាម​ទប់ស្កាត់​ការកើនឡើង​នូវ​ករណី​ឆ្លង​វីរុស​កូរ៉ូ​ណាឬកូវី​ដ​-១៩ ជាក់ស្ដែង​បារ​និង​ភោជនីយដ្ឋាន​ត្រូវ​បាន​បិទ​រហូតដល់​ចុង​ខែ​វិច្ឆិកា​។​

​គួរ​ជម្រាប​ថា ការវាយប្រហារ​ភេរវកម្ម​ពី​សំណាក់​ខ្មាន់កាំភ្លើង​ដែល​កើតឡើង​ក្នុង​ទីក្រុង​ដ៏​សំខាន់​របស់​ប្រទេស​អូទ្រីស​មួយ​នេះ ពុំមែន​ជា​លើក​ទី​១​ឡើយ​។ ពោល កាលពី​ឆ្នាំ​១៩៨១ មាន​មនុស្ស​២​នាក់​ត្រូវបាន​សម្លាប់ និង​១៨​នាក់​រងរបួស ក្នុង​ការវាយប្រហា​ររ​បស់​ជនជាតិ​ប៉ាឡេ​ស្ទីន​២​នាក់ នៅ​ឯ​វិហារ​អធិដ្ឋាន​សាសនា​ជ្វី​ហ្វ​ក្នុង​ទីក្រុង​Vienna​នេះ​ដូច​គ្នា​។ ក្រៅពីនេះ ក្រុម​ជ្រុលនិយម​សាសនា​ជនជាតិ​ប៉ាឡេ​ស្ទីន ក៏​បាន​សម្លាប់​ជន​ស៊ីវិល​៣​នាក់​ទៀត​នៅ​ឆ្នាំ​១៩៨៥៕ ដោយ​៖ យឺន សីហា​

ព័ត៌មានផ្សេងទៀត