លោកនាយក​រដ្ឋមន្ត្រី​ប្រាប់រដ្ឋមន្ត្រី៤រូបថាទឹក​ស្រក​ភ្លាមចុះ​សាងសង់​ជួសជុល​ភ្លាម

26-10-2020 9:17 am 1004

​លោកនាយក​រដ្ឋមន្ត្រី​ហ៊ុន សែន បាន​រម្លឹក​ដល់​រដ្ឋមន្ត្រី​ចំនួន​៤​រូប​ថា ក្នុងស្ថានភាព​រងគ្រោះ​ដោយសារ​ទឹកជំនន់ បានបង្ក​ការខូចខាត​ផ្លូវជាតិ ផ្លូវលំ ស្ពាន និង​ទំនប់​ប្រឡាយ​មួយចំនួន រដ្ឋមន្ត្រី​ទាំង​៤​រូបនេះ កុំ​បង្អង់​យូរ ទឹក​ស្រក​ភ្លាម ចុះ​សាងសង់​ជួសជុល​ភ្លាម កុំ​រង់ចាំ​ការវាយតម្លៃ​ពី​ផលប៉ះពាល់​។ ប្រមុខ​រដ្ឋាភិបាល​បាន​ថ្លែងថា សភាពការណ៍​មិន​ធម្មតា នីតិវិធី​ក៏​មិន​ធម្មតា​ដែរ​។​

​រដ្ឋមន្ត្រី​ក្រសួង​ទាំង​៤​នេះ​រួមមាន ក្រសួង​សាធារណការ និង​ដឹកជញ្ជូន ក្រសួង​ធនធានទឹក និង​ឧតុនិយម ក្រសួង​អភិវឌ្ឍន៍ជនបទ និង​ក្រសួង​កសិកម្ម រុក្ខា​ប្រមាញ់ និង​នេសាទ​។​

​លោកនាយក​រដ្ឋមន្ត្រី​បាន​សង្កត់ធ្ងន់ថា លោក​នឹង​តាមដាន​ចំពោះ​សកម្មភាព​នៃ​ការចុះ​ជួសជុល​សាងសង់​ហេដ្ឋារចនាសម្ព័ន្ធ​ដែល​រង​ការខូចខាត ហើយ​ក្រសួង​ណាមួយ​យឺតយ៉ាវ​ក្នុង​ការងារ​នេះ ក្រសួង​នោះ​នឹង​ទទួលខុសត្រូវ​ចំពោះ​រដ្ឋាភិបាល​។​

​ប្រមុខ​រដ្ឋាភិបាល​មាន​ប្រសាសន៍​យ៉ាង​ដូច្នេះ នៅក្នុង​ពិធី​បើក​ការដ្ឋាន​សាងសង់​ស្ពាន​ត​ភ្ជាប់​រាជធានី​ភ្នំពេញ ពី​ទីក្រុង​កោះ​ពេជ្រ ទៅ​កាន់​ទីក្រុង​រណប​កោះ​ន​រាហ៍ នា​ថ្ងៃ​ទី​២៦ ខែ​តុលា​នេះ​៕


ព័ត៌មានផ្សេងទៀត