​បាតុកម្ម​នៅមុខ​ស្ថានទូត​ចិន​​និង​ស្ថានទូត​អាមេរិក​​មាន​អ្នកបញ្ជា​មកពី​ក្រៅប្រទេស​​

24-10-2020 3:14 pm 1463

​លោក​នាយករដ្ឋមន្ត្រី​ហ៊ុន សែន បាន​អះអាងថា ការធ្វើ​បាតុកម្ម​នៅមុខ​ស្ថានទូត​ចិន និង​នៅ​ស្ថានទូត​អាមេរិក កាលពី​ថ្ងៃទី​២៣ ខែតុលា ឆ្នាំ​២០២០ ចំ​ថ្ងៃ​ខួប​២៩​ឆ្នាំ​នៃ​កិច្ចព្រមព្រៀង​សន្តិភាព​ទី​ក្រុងប៉ារីស ប្រទេស​បារាំង គឺមាន​ការបញ្ជា​មកពី​សហរដ្ឋអាមេរិក​។ ការអះអាង​បែបនេះ​របស់​លោកនាយក​រដ្ឋមន្ត្រី​ហ៊ុន សែន បាន​ធ្វើឡើង​នៅ​ឱកាស​ដែល​លោក​ចុះ​ជួប​សួរសុខទុក្ខ និង​ចែក​អំណោយ​ជូន​ប្រជាពលរដ្ឋ ដែល​រងគ្រោះ​ដោយសារ​ទឹកជំនន់ នៅ​ស្រុក​ម៉ាឡៃ ខេត្ត​បន្ទាយមានជ័យ នា​ព្រឹក​ថ្ងៃទី​២៤ ខែតុលា ឆ្នាំ​២០២០​។

​ប្រជាពលរដ្ឋ ដែលមាន​និន្នាការ​មិន​គាំទ្រ​រដ្ឋាភិបាល បាននាំគ្នា​ទៅ​ប្រមូលផ្ដុំ​នៅមុខ​ស្ថានទូត​ចិន ស្ថានទូត​សហរដ្ឋអាមេរិក និង​ស្ថានទូត​មួយចំនួនទៀត​ប្រចាំ​នៅ​កម្ពុជា ដើម្បី​ទាមទារ​ឱ្យ​ប្រទេស​ដែលជា​ហត្ថលេខី​នៃ​កិច្ចព្រមព្រៀង​សន្តិភាព​ទី​ក្រុងប៉ារីស ជួយ​អន្តរាគមន៍​ទៅ​រដ្ឋាភិបាល​កម្ពុជា គោរព​គោលការណ៍​សំខាន់ៗ​ក្នុង​កិច្ចព្រមព្រៀង​ជា​អន្តរជាតិ ថ្ងៃទី​២៣ ខែតុលា ឆ្នាំ​១៩៩១​។ តែ​ការប្រមូលផ្ដុំ​តវ៉ា​នេះ​ត្រូវបាន​អាជ្ញាធរ​ក្រុងភ្នំពេញ​បំបែក​ការជួបជុំ​របស់​ប្រជាពលរដ្ឋ​ខ្មែរ​ជិត​២០​នាក់​ដែល​ព្យាយាម​ដាក់​ញត្តិ​នៅ​ស្ថានទូត​ចិន​ប្រចាំ​នៅ​កម្ពុជា​។​

​មុន​មួយថ្ងៃ​នៃ​ការជួបជុំ​នេះ លោក​នាយករដ្ឋមន្ត្រី​ហ៊ុន សែន បាន​ព្រមាន​ថា​នឹង​ចាត់វិធានការ​ចំពោះ​ក្រុម​អ្នក​ប្រមូលផ្តុំ​ធ្វើបាតុកម្ម ដើម្បី​រំឭក​កិច្ចព្រមព្រៀង​សន្តិភាព​ទីក្រុង​ប៉ារីស​នេះ ដោយ​សម្អាងថា​កម្ពុជា​កំពុង​មានទុក្ខ​ដោយសារ​គ្រោះទឹកជំនន់​និង​ជំងឺ​កូវី​ដ​១៩​។ នៅក្នុង​ពិធី​ចុះ​ជួប​សួរសុខទុក្ខ និង​ចែក​អំណោយ​ជូន​ប្រជាពលរដ្ឋ ដែល​រងគ្រោះ​ដោយសារ​ទឹកជំនន់ នៅ​ស្រុក​ម៉ាឡៃ ខេត្ត​បន្ទាយមានជ័យ នា​ថ្ងៃទី​២៤ ខែតុលា ឆ្នាំ​២០២០ លោក​នាយករដ្ឋមន្ត្រី​ហ៊ុន សែន បាន​អះអាងថា ការធ្វើ​បាតុកម្ម​តវ៉ា​នេះ គឺមាន​អ្នកបញ្ជា​មកពី​សហរដ្ឋអាមេរិក​………….

​សំឡេង​៖

​ចំណែក​អតីត​គណបក្ស​សង្គ្រោះ​ជាតិ បានចេញ​សេចក្ដីថ្លែងការណ៍​ថ្កោលទោស​អាជ្ញាធរ​ក្រុងភ្នំពេញ ដែល​បាន​រារាំង បង្ក្រាប​ដោយ​ហិង្សា និង​ចាប់​ប្រជាពលរដ្ឋ​ដែល​បាន​ប្រមូលផ្ដុំ និង​ជួបជុំគ្នា​នៅមុខ​ស្ថានទូត​ចិន ក្នុង​រាជធានី​ភ្នំពេញ ដើម្បី​សម្ដែង​មតិ អបអរសាទរ និង​ទាមទារ​ឱ្យ​ប្រទេស​ចិន​គោរព​ស្មារតី​កិច្ចព្រមព្រៀង​សន្តិភាព​ទី​ក្រុងប៉ារីស​១៩៩១ នៅ​ថ្ងៃទី​២៣ ខែតុលា ឆ្នាំ​២០២០​ផងដែរ​។ នេះ​បើតាម​សេចក្ដីថ្លែងការណ៍​របស់​អតីត​គណបក្ស​សង្គ្រោះ​ជាតិ​ចុះ​ថ្ងៃទី​២៤ ខែតុលា ឆ្នាំ​២០២០​។​

​យ៉ាងណាក៏ដោយ​ការធ្វើ​បាតុកម្ម​ខួប​២៩​ឆ្នាំ​នៃ​កិច្ចព្រមព្រៀង​សន្តិភាព​ទី​ក្រុងប៉ារីស ប្រទេស​បារាំង ២៣ តុលា ១៩៩១ មិនមែន​មានតែ​ពលរដ្ឋ​នៅ​កម្ពុជា​ទេ ក្រៅពី​ពលរដ្ឋ​នៅ​ក្នុងស្រុក ពលរដ្ឋ​ខ្មែរ​នៅ​ក្រៅប្រទេស​វិញ​ក៏​ប្រកាស​ធ្វើបាតុកម្ម​នៅ​ថ្ងៃទី​២៣​តុលា​នេះដែរ ដូចជា​នៅ​ប្រទេស​បារាំង ប៊ែល​ហ្សិ​ក  ជប៉ុន កូរ៉េខាងត្បូង អូស្ត្រាលី ណូវែល​ហ្សេ​ឡង់ សហរដ្ឋអាមេរិក និង​ប្រទេស​កាណាដា​ជាដើម​។ បាតុករ​ដែល​ភាគច្រើន​ជា​សកម្មជន​បក្សប្រឆាំង​នៅ​ក្រៅប្រទេស​នោះ ពួកគេ​ដាក់​ញត្តិ​ប្រឆាំងនឹង​អ្វីដែល​គេ​ចោទថា មាន​វត្តមាន​កងទ័ព​ចិន​នៅ​កម្ពុជា​៕

ព័ត៌មានផ្សេងទៀត