បើ​ស្អប់​ចិន​យ៉ាងនេះ​ម៉េច​បាន​លោក​ត្រាំ​មាន​គណនី​ធនាគារ​ក្នុងប្រទេស​ចិន​?

23-10-2020 12:40 pm 1150

​មនុស្ស​គ្រប់គ្នា​បានដឹង​បាន​លឺថា តាំងពី​ស្បថ​ចូល​កាន់តំណែង​កាលពី​ថ្ងៃទី​២០ ខែ​មករា ឆ្នាំ​២០១៧ លោក​ដូណាល់ ត្រាំ​ប្រធានាធិបតី​ទី​៤៥​របស់​អាមេរិក បាន​ប្រើ​គោលនយោបាយ “​អាមេរិក​ដំពូង​គេ​” ឬ “America First” ក្នុង​បំណង​ធ្វើឲ្យ​អាមេរិក​អស្ចារ្យ​ម្ដងទៀត​។  និយាយ​ឲ្យ​ងាយ​យល់​គោលនយោបាយ​នេះ​អាច​ថា​លោក​ត្រាំ​អាត្មានិយម​បន្ដិច ព្រោះ​លោក​សំដៅយក​ផលប្រយោជន៍​ជាតិ​សាសន៍​អាមេរិក សំខាន់​ជាង​ជាតិ​សាសន៍​ណាៗ​ទាំងអស់​។ គោលនយោបាយ​“America First” ក៏បាន​ជំរុញ​ឲ្យ​លោកត្រាំ​ធ្វើ​រឿង​ប៉ះពាល់​ដល់​អារម្មណ៍​សម្ព័ន្ធមិត្ដ​មួយចំនួន​ផងដែរ តួយ៉ាង​ករណី​ដក​អាមេរិក​ចេញពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ចុះហត្ថលេខា​ក្នុង​ឆ្នាំ​២០១៥ ជា​កិច្ចព្រមព្រៀង​ចំណាយពេល​ជាង​១​ទសវត្ស​ទើប​ឯកភាពគ្នា​។ ក្រៅពីនេះ​លោក​បានប្រកាស​ដក​អាមេរិក​ចេញពី​កិច្ចព្រមព្រៀង​ប្រែប្រួល​អាកាសធាតុ​ទី​ក្រុងប៉ារីស កិច្ចព្រមព្រៀង​ភាពជា​ដៃគូ​អន្ដរ​-​ប៉ាស៊ីហ្វិក ពី​អង្គការ​យូនេស្កូ ពី​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ និង​បានប្រកាស​ដក​អាមេរិក​ចេញពី​អង្គការ​សុខភាព​ពិភពលោក​ថែមទៀត ក្រោយ​ចោទថា​អង្គការ​មួយ​នេះ​ថា​មាន​និន្នាការ​លម្អៀង​ទៅរក​ចិន​។ ទាំងនេះ​សុទ្ធតែ​ធ្វើឲ្យ​ប្រទេស​សម្ព័ន្ធមិត្ដ​មិន​សប្បាយចិត្ដ ហើយ​ចាប់ផ្ដើម​ស្ទាក់ស្ទើរ​ក្នុង​ការបន្ដ​កិច្ចសហប្រតិបត្ដិការ​ជាមួយ​អាមេរិក​ទៅមុខទៀត​។​

​និយាយ​ពី​ប្រទេស​ចិន លោក​ត្រាំ​បាន​បន្ទោស​ខ្លាំងៗ​ទៅលើ​គូប្រជែង​យក្ស​មួយ​នេះ  ក្រៅតែពី​រឿងរ៉ាវ​នយោបាយ លោក​បានដាក់​សម្ពាធ​យ៉ាងខ្លាំង​ផ្នែក​សេដ្ឋកិច្ច រហូត​ផ្ទុះ​សង្គ្រាម​ពាណិជ្ជកម្ម​ក្នុង​ឆ្នាំ​២០១៨​បន្ដ​រហូតដល់​បច្ចុប្បន្ន​ដោះស្រាយ​មិនទាន់​ចេញ​។ លោក​ត្រាំ​ចោទថា​ធ្វើ​ពាណិជ្ជកម្ម​ជាមួយ​ចិន​ខាតបង់ ព្រោះ​គ្មាន​តុល្យភាព​ដោយសារ​ចិន​លួច​កេងចំណេញ ហើយ​ក្រុម​ចិន​បាន​ទាំង​លួច​យក​កម្មសិទ្ធិបញ្ញា​ពី​ក្រុមហ៊ុន​ធំៗ​របស់​អាមេរិក​ទៀត​។ លោក​ត្រាំ​ចាប់ផ្ដើម​ចាត់វិធានការ​រឹតបន្ដឹង​លើ​ការរកស៊ី​ជាមួយ​ចិន និង​បានប្រកាស​កៀរគរ​ឲ្យ​ក្រុមហ៊ុន​អាមេរិក​វិល​មក​បោះទីតាំង​នៅក្នុង​ស្រុក​វិញ ដើម្បី​បង្កើត​ការងារ​សម្រាប់​ពលរដ្ឋ​អាមេរិក​ស្របតាម​គោលនយោបាយ​“America First”​។ ជារួម​លោក​ត្រាំ​មិន​គាំទ្រ​ឲ្យ​ក្រុមហ៊ុន​អាមេរិក​ចាប់ដៃ​ជាមួយ​ចិន​ទេ លុះត្រាតែ​ជា​ការរកស៊ី​ដោយ​ស្មើភាព​គ្មាន​លួច​កេងប្រវ័ញ្ច​។​

​និយាយ​ដាក់បន្ទុក​លើ​ការរកស៊ី​ជាមួយ​ចិន ហើយ​ថ្មីៗ​នេះ​បាន​ទាំង​វាយប្រហា​រលើ​បេក្ខជន​ប្រធានាធិបតី​គណបក្ស​ប្រជាធិបតេយ្យ​លោកចូ បាយ​ដិនផង ដោយ​លើក​ឧទាហរណ៍​កូនប្រុស​លោក​បាយ​ដិនផ្ទាល់ គឺ​លោក​ហាន់ធ័​រ បាយ​ដិន ថា​មាន​ទំនាក់ទំនង​រកស៊ី​មិន​ត្រឹមត្រូវ​ជាមួយ​ចិន ហើយ​ថា​លោក​បាយដិន​មាន​គោលនយោបាយ​ឱន​លំទោន​ខ្លាំងពេក​ទៅរក​ចិន ប៉ុន្ដែ​លោក​ត្រាំ​ខ្លួនឯង​ផ្ទាល់​ក៏​ត្រូវបាន​គេ​រកឃើញថា​បាន​រកស៊ី​ជាមួយ​ចិន​ច្រើន​ឆ្នាំ និង​មាន​គណនី​ធនាគារ​នៅ​ក្នុងប្រទេស​ចិន​ថែមទៀត​។ តើ​នេះ​ជា​ការពិត​ឬ​យ៉ាងណា​?

​បើតាម​របាយការណ៍​ព័ត៌មាន​ចេញផ្សាយ​ដោយ​កាសែត​New York Times លោក​ដូណាល់ ត្រាំ​ពិតជា​មាន​គណនី​ធនាគារ​ចិន ហើយ​បាន​ចំណាយពេល​ជាច្រើន​ឆ្នាំ​បន្ដ​មុខ​ជំនួញ​នៅក្នុង​ប្រទេស​ចិន​។ គណនី​ធនាគារ​នោះ​ត្រូវបាន​គ្រប់គ្រង​ដោយ​ក្រុមហ៊ុន​របស់លោក​មានឈ្មោះ​ថា​Trump International Hotels Management ហើយ​ត្រូវបាន​ប្រើប្រាស់​សម្រាប់​បង់ពន្ធ​នៅ​ចិន​ចន្លោះ​ពី​ឆ្នាំ​២០១៣​ដល់​ឆ្នាំ​២០១៥​។ New York Times​បញ្ចេញ​គណនី​ធនាគារ​ចិន បន្ទាប់ពី​ទទួលបាន​របាយការណ៍​បង់ពន្ធ​របស់លោក​ត្រាំ ដែល​ក្នុងនោះ​មាន​ទាំង​ព័ត៌មាន​ហិរញ្ញវត្ថុ​ផ្ទាល់ខ្លួន​និង​ក្រុមហ៊ុន​។ កន្លងមក​កាសែត​នេះ​ធ្លាប់​បង្ហាញ​ឲ្យដឹងថា ក្រោយ​ជាប់ឆ្នោត​ជាប្រធានាធិបតី ​ក្នុង​ឆ្នាំ​២០១៦​និង​២០១៧ លោក​ត្រាំ​បាន​បង់ពន្ធ​មួយឆ្នាំ​តែ​៧៥០​ដុល្លារ​ប៉ុណ្ណោះ​។ 

​គណនី​ធនាគារ​ចិន​របស់លោក​ត្រាំ បាន​ចំណាយ​រហូតដល់​១៨៨,៥៦១​ដុល្លារ​សម្រាប់​ការបង់ពន្ធ​នៅ​ចិន​។ កាសែត​New York Times​នៅ​បញ្ជាក់ទៀតថា លោក​ត្រាំ​បាន​វិនិយោគ​យ៉ាងតិចណាស់​ក៏​ជាង​១៩​ម៉ឺន​ដុល្លា​រដែរ​ក្នុង​ក្រុមហ៊ុន​តូចៗ​ចំនួន​៥ ដែល​បង្កើតឲ្យមានឱ​កាសពិ​សេស​ដើម្បីប​ន្ដ​គម្រោង​ពាណិជ្ជកម្ម​នៅ​ក្នុងប្រទេស​ចិន​អស់​រយៈពេល​ជាច្រើន​ឆ្នាំ​។ កិច្ចខិតខំ​ប្រឹងប្រែង​លើ​ការងារ​រកស៊ី​នេះ លោក​ត្រាំ​បាន​ពន្លឿន​ខ្លាំង​ក្នុង​ឆ្នាំ​២០១២ ជាមួយនឹង​ការបើក​ការិយាល័យ​មួយ​នៅ​សៀង​ហៃ​។ រីឯ​ក្រុមហ៊ុន​ទាំង​៥​ដែលមាន​ទំនាក់ទំនង​រកស៊ី​ជាមួយ​លោក​ត្រាំ​បាន​អះអាងថា យ៉ាងហោចណាស់​ទឹកប្រាក់​ចំនួន​៩៧,៤០០​ដុល្លារ ត្រូវបាន​ចំណាយ​ក្នុង​ការរកស៊ី​គិត​តាំងពី​ឆ្នាំ​២០១០ ក្នុងនោះ​មាន​ខ្លះ​សម្រាប់​ការបង់ពន្ធ និង​ខ្លះ​សម្រាប់​ចំណាយ​ផ្នែក​គណនេយ្យ​គិត​ត្រឹម​ឆ្នាំ​២០១៨​។  ប៉ុន្ដែ​ផែនការ​វិនិយោគ​របស់​លោក​ត្រាំ​ភាគច្រើន ត្រូវបាន​ជំរុញ​ដោយ​ក្រុមហ៊ុន​Trump International Hotels Management តាមរយៈ​ម្ចាស់​កម្មសិទ្ធិ​ផ្ទាល់​នៃ​ក្រុមហ៊ុន​ចិន​THC China Development​។​

​ដូច្នេះ ការបង្ហាញ​ឲ្យដឹង​របស់​កាសែត​New York Times ចង់​ឬ​មិន​ចង់​លោក​ត្រាំ​ពិតជា​ត្រូវ​រង​នូវ​ភាពអាម៉ាស់​មួយ ព្រោះ​លោក​បាន​ព្យាយាម​ប្រាប់​ទៅ​អ្នកដទៃ​កុំឲ្យ​ពាក់ព័ន្ធឬ​ពឹងផ្អែក​លើ​ចិន តែ​លោក​ខ្លួនឯង​បែរជា​បាន​រកស៊ី​ជាមួយ​ចិន​ទៅវិញ ដូច​ពាក្យ​គេ​ថា​ខ្លួនឯង​ធ្វើ​មិនបាន​ផង​ហ៊ាន​ទៅ​ណែនាំ​គេ​។ 

​លោក​Dan Harris​មេធាវី​មានបទពិសោធន៍​ផ្នែក​ធ្វើ​ជំនួញ​ជាមួយ​ចិន​បាន​និយាយថា ការបង្កើត​គណនី​ធនាគារ​នៅ​ក្នុងប្រទេស​ចិន​ធ្លាប់មាន​ភាពងាយស្រួល ហើយក៏​មិនមែនជា​រឿង​ចម្លែក​ដែរ​សម្រាប់​ក្រុមហ៊ុន​ដែល​ចង់​បង្កើត​។ ប៉ុន្ដែ​ព័ត៌មាន​លម្អិត​នៅតែ​ពុំ​ត្រូវបាន​លាតត្រដាង គ្រាន់តែ​ថា​វា​ហាក់ដូចជា​គណនី​ធនាគារ​លោក​ត្រាំ​ត្រូវបាន​បង្កើតឡើង​ក្នុង​គោលបំណង​រកស៊ី  វា​អាចជា​ការគ្រប់គ្រង​ដោយ​សហគ្រាស​បរទេស ឬក៏​ជា​ការវិនិយោគ​ជាមួយ​ដៃគូ​ចិន​ដែល​គេ​មិន​ស្គាល់​។ ក្នុងករណីនេះ ការដែល​មាន​គណនី​ធនាគារ​មិន​ត្រឹមតែ​មាន​ភាពស្របច្បាប់​ប៉ុណ្ណោះ​ទេ វា​ក៏​ត្រូវបាន​គេ​ណែនាំ​ឲ្យធ្វើ​ផងដែរ​។ លោក​Harris​បន្ដថា ប្រហែលជា​លោក​ត្រាំ​កំពុង​ធ្វើ​ប្រតិ​បត្ដិកា​រដោយ​ស្របច្បាប់​១០០​ភាគរយ​នៅ​ក្នុងប្រទេស​ចិន ប៉ុន្ដែ​មិន​បង្ហាញ​ឲ្យគេ​ដឹងដោយ​គិតថា​អាច​ជះឥទ្ធិពល​អាក្រក់​ដល់​លោក​។ 

​ឆ្លើយតប​ព័ត៌មាន​ដែល​ទម្លាយ​ដោយ​កាសែត​New York Times លោក​Alan Garten​មេធាវី​តំណាង​ក្រុមហ៊ុន​លោក​ត្រាំ​បាន​បញ្ជាក់ថា របាយការណ៍​នេះ​គឺជា​ការប្រមើលមើល​ដោយ​មិន​គ្រប់​ជ្រុងជ្រោយ និង​ជាការ​សន្មត់​ដែលមិន​ត្រឹមត្រូវ​។ លោក​គូសបញ្ជាក់ថា​ក្រុមហ៊ុន​Trump International Hotels Management  បាន​បើក​គណនី​ធនាគារ​ជាមួយ​ធនាគារ​ចិន​ដែលមាន​ការិយាល័យ​នៅក្នុង​សហរដ្ឋអាមេរិក ដើម្បី​សម្រាប់​ចំណាយ​លើ​ការបង់ពន្ធ​ក្នុងប្រទេស​ចិន​។ ក្រុមហ៊ុន​បាន​បើក​គណនី​ធនាគារ​នេះ​បន្ទាប់ពី​បើក​ការិយាល័យ​មួយ​នៅ​ក្នុងប្រទេស​ចិន ជា​ការិយាល័យ​ប្រើ​ស្វែងរក​កិច្ចព្រមព្រៀង​ផ្នែក​សណ្ឋាគារ​ក្នុង​តំបន់​អាស៊ី​។ ប៉ុន្ដែ​ចាប់តាំងពី​បិទទ្វារ​ក្នុង​ឆ្នាំ​២០១៥​មក ពុំមាន​ការធ្វើ​ប្រតិ​បត្ដិការឬ​សកម្មភាព​ជំនួញតាមរ​យៈគណនី​ធនាគារនេះ​ទៀត​ទេ​។ ទោះបី​គណនី​ធនាគារ​នៅ​បន្ដ​បើក តែ​មិនដែល​ប្រើប្រាស់​ក្នុង​គោលបំណង​ណាមួយ​ឡើយ​។ 

​គួរ​ជម្រាបជូន​ថា លោក​ត្រាំ​មាន​ផលប្រយោជន៍​អាជីវកម្ម​ច្រើនណាស់​ទាំង​នៅ​អាមេរិក​និង​នៅ​បរទេស​។ ទាំងនោះ​រួមបញ្ចូល​ទាំង​ក្រុមហ៊ុន​វាយ​កូន​ហ្គោល​នៅ​ស្កុត​លែន នៅ​អៀរ​ឡង់ រួមជាមួយ​ការរកស៊ី​ផ្នែក​សណ្ឋាគារ​លំដាប់​ផ្កាយ​៥​ជាច្រើន​ទៀត​។ លោក​ត្រាំ​ក៏មាន​គណនី​ធនាគារ​នៅ​អង់គ្លេស និង​អៀរ​ឡង់​ផងដែរ​ក្រៅពី​នៅ​ចិន​៕(​ដោយ​៖​ពេញ ផេង​)

ព័ត៌មានផ្សេងទៀត