លោកនាយក​រដ្ឋមន្ត្រី​ហ៊ុន សែន​អបអរ​ខួប​២៩​ឆ្នាំ​កិច្ចព្រមព្រៀង​២៣​តុលា​

23-10-2020 10:13 am 356

​លោកនាយក​រដ្ឋមន្ត្រី​ហ៊ុន សែន បាន​ផ្ញើ​សារ​អបអរសាទរ​ខួប​២៩​ឆ្នាំ​នៃ​កិច្ចព្រមព្រៀង​ទីក្រុង​ប៉ារីស​២៣​តុលា​។​

​ប្រមុខ​រដ្ឋាភិបាល​មាន​ប្រសាសន៍ថា ២៩​ឆ្នាំមុន ពោល​គឺ​នៅ​ថ្ងៃទី​២៣ តុលា ឆ្នាំ​១៩៩១ ភាគី​ទាំង​៤ របស់​កម្ពុជា​រួមមាន លោកនាយក​រដ្ឋមន្ត្រី ហ៊ុន សែន តំណាង​ឲ្យ​រដ្ឋាភិបាលក​ម្ពុ​ជា​, ចលនា​តស៊ូ​ហ្វ៊ុនស៊ីនប៉ិច ដែល​តំណាង​ដោយ សម្តេចព្រះ នរោត្តម សីហនុ និង សម្តេចក្រុមព្រះ នរោត្តម រណប្ញ​ទ្ឋិ​, រណសិរ្ស​ជាតិ​រំដោះ​ប្រជា​ពលរដ្ឋ​ខ្មែរ ដែល​តំណាង​ដោយ លោក សឺ​ន សាន និង ក្រុម​ចលនា​កម្ពុជា​ប្រជាធិបតេយ្យ (​ប៉ុលពត​)​តំណាង​ដោយ លោក ខៀវ សំផន បាន​ឈាន​ទៅ​ចុះហត្ថលេខា លើ​កិច្ចព្រមព្រៀង​សន្តិភាព នៅ​ទីក្រុង​ប៉ារីស ប្រទេស​បារាំង ក្រោម​វត្តមាន​សាក្សី​មកពី​១៨​ប្រទេស រួម​ទាំង​អគ្គលេខាធិការ​អង្គការសហប្រជាជាតិ (UN) ផងដែរ ដើម្បី​បញ្ចប់​សង្គ្រាម​ស៊ីវិល​នៅ​កម្ពុជា​។​

​លោកនាយក​រដ្ឋមន្ត្រី​មានប្រសាសន៍​បន្ត​ថា មុន​នឹង​ឈាន​មក​ដល់​កិច្ចព្រមព្រៀង​នា​ទីក្រុង​ប៉ារីស ២៣ តុលា គឺ លោកនាយក​រដ្ឋមន្ត្រី ហ៊ុន សែន បាន​ជួបពិភាក្សា​ដំបូង​បំផុត​ជាមួយ អតីត​ព្រះមហាក្សត្រ​ខ្មែរ សម្តេចព្រះ នរោត្តម សីហនុ នៅ ថ្ងៃទី ០២ ខែ​ធ្នូ ឆ្នាំ​១៩៨៧ នៅ FERE-EN-TARDENOIS នៅ​ប្រទេស​បារាំង ដែល​ការចរចា​នេះ​មាន​សេចក្តីប្រកាស​រួម​ឡាយ​ព្រះហស្តលេខា​ដោយ សម្តេចព្រះ នរោត្តម សីហនុ និង លោកនាយក​រដ្ឋមន្ត្រី ហ៊ុន សែន ដែល​ហៅថា (​ជំនួប​ចរចា សីហនុ​-​ហ៊ុន សែន នៅ FERE-EN-TARDENOIS ថ្ងៃទី​០២-០៤ ខែ​ធ្នូ ឆ្នាំ​១៩៨៧)​។ ​ហើយ​បន្ទាប់មក​ក៏មាន​កិច្ចចរចា​បន្ត​រវាង សីហនុ​-​ហ៊ុន សែន លើក​ទី ២ ប្រព្រឹត្ត​ឡើង​នៅ​ថ្ងៃទី​២០-២១ ខែ​មករា ឆ្នាំ​១៩៨៨ នៅ SAINT-GERMAIN-EN-LAYE ប្រទេស​បារាំង និង​នៅ​ទីកន្លែង​ផ្សេងៗ​មួយចំនួនទៀត​។​

​ទោះបី​មាន​កិច្ចព្រមព្រៀង សន្តិភាព​ប៉ារីស ២៣ តុលា ១៩៩១ ក៏ពិតមែន ប៉ុន្តែ​សង្គ្រាមស៊ីវិល​នៅ​កម្ពុជា​នៅ​បន្ត​ដែល​បង្ក​ដោយ​ភាគី​កម្ពុជា​ប្រជាធិបតេយ្យ (​ប៉ុលពត​)​។ 

​ក្រោម​នយោបាយ ឈ្នះ​-​ឈ្នះ របស់ លោកនាយក​រដ្ឋមន្ត្រី​ហ៊ុន សែន គឺ​បាន​បញ្ចប់​សង្គ្រាម​ស៊ីវិល​ទាំងស្រុង នៅ​ឆ្នាំ ១៩៩៨ ដែល​កម្ពុជា​ទូទាំងប្រទេស​បាន​ស្គាល់​នូវ​សន្តិភាព​ពេញលេញ និង​សំបូរ​សប្បាយ​រហូតមក​ដល់​សព្វថ្ងៃ​៕

 ពាក្យគន្លឹះ  ២៣តុលាលោកហ៊ុនសែន

ព័ត៌មានផ្សេងទៀត