លោកនាយក​រដ្ឋមន្ត្រី​ហ៊ុន សែន​៖ អ្នកនយោបាយ​ខ្លះ​មិន​និយាយ​សូម្បី​ពាក្យ​រំលែក​ទុក្ខ​

22-10-2020 3:50 pm 317

​លោកនាយក​រដ្ឋមន្ត្រី​ហ៊ុន សែន បាន​ថ្លែង​ដោយ​រិះគន់ថា អ្នកធ្វើ​នយោបាយ​ខ្លះ មិន​ដែល​និយាយ​សូម្បី​តែ​ពាក្យ​រំលែក​ទុក្ខ និង​ពាក្យ​ចូលរួម​មរណទុក្ខ ចំពោះ​ប្រជាពលរដ្ឋ ដែល​រង​គ្រោះ​ទឹកជំនន់​សោះ​។​

​ការ​ថ្លែង​រិះគន់​នេះ ធ្វើឡើង​ក្នុង​ឱកាស​ដែល​លោកនាយក​រដ្ឋមន្ត្រី​ហ៊ុន សែន បាន​បន្ត​ជួប​សួរសុខទុក្ខ និង​ផ្តល់​ស្បៀង​ជូន​ប្រជាពលរដ្ឋ​រងគ្រោះ​ដោយ​ទឹកជំនន់ ក្នុង​ស្រុក​ថ្មពួក និង​ក្រុង​ប៉ោយ​ប៉ែត នា​ថ្ងៃ​ទី​២២ ខែ​តុលា​នេះ​។ ទោះ​បី​ជា​ប្រមុខ​រដ្ឋាភិបាល មានប្រសាសន៍​មិន​ចំឈ្មោះ ក៏​គេ​អាច​កត់សម្គាល់​ថា ការរិះគន់​នេះ​សម្តៅ​ដល់​ក្រុម​អ្នក​ធ្វើ​នយោបាយ​របស់​អតីត​គណបក្ស​សង្គ្រោះ​ជាតិ ដែលកំពុងសម្ងំលាក់ខ្លួននៅក្រៅប្រទេស​។​

​ប្រមុខ​រដ្ឋាភិបាល​មានប្រសាសន៍​បន្ត​ថា លោក​គ្មាន​ទម្លាប់​ដើរចោល​ប្រជាជន នៅពេល​ដែល​ប្រជាជន​ជួប​ការលំបាក​នោះទេ​។ លោកនាយក​រដ្ឋមន្ត្រី​រំលឹកថា ពាក្យ​រួមសុខ​រួម​ទុក្ខ ស្មើ​នឹង​ពាក្យ​ខ្មែរ​យើង​ថា ជួយ​គ្នា​ក្នុង​គ្រាក្រ មិត្ត​ល្អ​ក្នុង​គ្រា​លំបាក​។​

​គួរបញ្ជាក់​ថា ក្រោយ​ប្រជាពលរដ្ឋ​កម្ពុជា​ជាង​៤១​ម៉ឺន​នាក់​បាន​រងគ្រោះ​ដោយសារ​ទឹកជំនន់ និង​មាន​អ្នកស្លាប់​ចំនួន​ជាង​៣០​នាក់​ផង​នោះ រហូតមកដល់​ពេលនេះ នៅ​មិនទាន់​ឃើញ​មាន​អតីតមន្ត្រី​នៃ​អតីត​គណបក្សប្រឆាំង​ដែល​កំពុង​រស់​នៅ​ក្រៅប្រទេស បង្ហើរ​សារ​ចូលរួម​រំលែក​ទុក្ខ ឬ​រំលែក​មរណទុក្ខ​ដល់​ពលរដ្ឋ​ខ្មែរ​ដែល​កំពុង​រងគ្រោះ​នោះឡើយ​។ 

​ប៉ុន្តែ​ផ្ទុយ​ត្រលប់​មក​វិញ​គេ​សង្កេតឃើញថា ក្នុងអំឡុង​គ្រោះទឹកជំនន់​នេះ មាន​សប្បុរសជន​ជាច្រើន រួម​មាន​មន្ត្រីរាជការ អ្នកជំនួញ និង​ប្រជាពលរដ្ឋ​ប្រកប​រប​រកស៊ី​ជា​ច្រើន បាន​ផ្តល់​ថវិកា​ដល់​រដ្ឋាភិបាល​សម្រាប់​ជួយសង្គ្រោះ​ដល់ព​លរ​ដ្ឋ​រងគ្រោះ និង​បាន​ចុះ​ចែក​អំណោយ​ដោយផ្ទាល់​ផងដែរ​។ សកម្មភាព​សប្បុរស​ទាំង​នេះ ត្រូវបាន​លោកនាយក​រដ្ឋមន្ត្រី​កោតសរសើរ​ពី​ទឹកចិត្ត​របស់​ប្រជា​ពលរដ្ឋ​ខ្មែរ ជួយ​គ្នា ក្នុង​គ្រា​លំបាក​៕


ព័ត៌មានផ្សេងទៀត