​ក្រុម​អ្នកជំនាញ​សិទ្ធិមនុស្ស​UN​​ផ្ញើលិខិត​ជូន​រដ្ឋមន្ត្រីការបរទេស​កម្ពុជា​​សួរ​រឿង​ចាប់ខ្លួន​លោក​រ៉ុង ឈុន​

20-10-2020 11:58 am 301

​លោកស្រី​រ៉ូ​ណា ស្មី​ត អ្នករាយការណ៍​ពិសេស​របស់​អង្គការសហប្រជាជាតិ​ទទួកបន្ទុក​សិទ្ធិមនុស្ស​ប្រចាំ​នៅ​កម្ពុជា បានលើកឡើង​នៅលើ​បណ្តាញ​សង្គម​របស់ខ្លួន​ដោយ​អះអាងថា ក្រុម​អ្នកជំនាញ​សិទ្ធិមនុស្ស​អង្គការសហប្រជាជាតិ បាន​ផ្ញើលិខិត​មួយច្បាប់​ជូន​រដ្ឋមន្ត្រីការបរទេស​កម្ពុជា ស្នើសុំ​ព័ត៌មាន​បន្ថែម​អំពី​មូលដ្ឋាន​ពិត និង​មូលដ្ឋាន​ច្បាប់​លើ​ការចាប់​ឃុំខ្លួន​លោក​រ៉ុង ឈុន និង​សកម្មជន​សង្គម​ជាង​១០​នាក់​ផ្សេងទៀត​។ (​

​បើតាម​ក្រុម​អ្នកជំនាញ​សិទ្ធិមនុស្ស​អង្គការសហប្រជាជាតិ របៀប​ចាប់ខ្លួន និង​ឃុំខ្លួន​នេះ ស្របតាម​និយាម និង​បទដ្ឋាន​សិទ្ធិមនុស្ស​អន្តរជាតិ ទាក់ទង​នឹង​សិទ្ធិសេរីភាព​ក្នុង​ការបញ្ចេញមតិ និង​សិទ្ធិ​ចូលរួម​ក្នុង​កិច្ចការ​សាធារណៈ​នោះឡើយ​។ ជាមួយគ្នានេះ​ក្រុម​អ្នកជំនាញ អ​.​ស​.​ប ក៏បាន​ស្នើសុំ​នូវ​ព័ត៌មាន​បន្ថែម​អំពី​ភាព​ត្រូវ​គ្នា​នៃ​ការចាប់ខ្លួន ជាមួយនឹង​សិទ្ធិសេរីភាព និង​សន្តិសុខ​បុគ្គល រាប់ទាំង​ការទទួលបាន​ការជូន​ដំណឹង​នៅពេល​ចាប់ខ្លួន​អំពី​មូលហេតុ​នៃ​ការចាប់ខ្លួន​គាត់​ផងដែរ​។​

​ក្រៅពី​បញ្ហា​ទាំងនោះ ក្រុម​អ្នកជំនាញ អ​.​ស​.​ប បាន​ស្នើសុំ​ព័ត៌មាន​បន្ថែម​អំពី​របៀប​ដែល​ការ​បំបែក​ការជួបប្រជុំ​ដោយ​សន្តិវិធី នៅ​ថ្ងៃទី​០៣ និង ថ្ងៃទី​០៥ ខែ​សីហា ឆ្នាំ​២០២០ ស្របតាម​កាតព្វកិច្ច​ផ្លូវច្បាប់​របស់​រដ្ឋាភិបាល ដែល​មានចែង​ក្នុង​មាត្រា ២១ នៃ​កតិកាសញ្ញា​អន្តរជាតិ​ស្តីពី​សិទ្ធិ​ពលរដ្ឋ និង​សិទ្ធិ​សិទ្ធិ​នយោបាយ (ICCPR) និង​ច្បាប់​កម្ពុជា និង អំពី​របៀប​បុគ្គល​ទាំងឡាយ​នៅ​ក្នុងប្រទេស ដែល​បាន​ចូលរួម​ធ្វើ​ការជួបប្រជុំ​ដោយ​សន្តិវិធី អាចអនុវត្ត​សិទ្ធិ​របស់​ពួកគេ​ដោយ​សេរី​ចំពោះ​សិទ្ធិសេរីភាព​ក្នុង​ការជួបប្រជុំ​ដោយ​សន្តិវិធី និង​ការបង្កើត​សមាគម​។​

​ពាក់ព័ន្ធ​សំណើរ​របស់​ក្រុម​អ្នកជំនាញ​សិទ្ធិមនុស្ស​អង្គការសហប្រជាជាតិ​ខាងលើនេះ សារព័ត៌មាន​វិទ្យុ​វា​យោ មិនអាច​សុំ​ការឆ្លើយតប​ពី​អ្នកនាំពាក្យ​ក្រសួងការបរទេស និង​កិច្ចសហប្រតិបត្តិការ​អន្តរជាតិ​កម្ពុជា​បានទេ ដោយ​ទូរស័ព្ទ​ចូល​ហើយ​តែ​គ្មាន​អ្នកទទួល​។​

​សូមបញ្ជាក់​ឱ្យដឹងថា ក្រុម​អ្នកជំនាញ​សិទ្ធិមនុស្ស​អង្គការសហប្រជាជាតិ ដែល​បាន​ស្នើឱ្យ​ក្រសួងការបរទេស​កម្ពុ​ជា​បំភ្លឺ​លើ​ការចាប់ខ្លួន​លោក​រ៉ុង ឈុន និង​សកម្មជន​សង្គម​ផ្សេងទៀត​នោះ គឺមាន​អ្នករាយការណ៍​ពិសេស​ស្តីពី​ការលើកកម្ពស់ និង​ការការពារ​សិទ្ធិសេរីភាព​នៃ​ការបញ្ចេញ​គំនិត និង​មតិ​។ ក្រុមការងារ​ស្តីពី​ការឃុំខ្លួន​ដោយ​បំពាន​។ អ្នករាយការណ៍​ពិសេស​ស្តីពី​ស្ថានភាព​សិទ្ធិមនុស្ស​ប្រចាំ​ប្រទេស​កម្ពុជា​។ អ្នករាយការណ៍​ពិសេស​ស្តីពី​សិទ្ធិសេរីភាព​ក្នុង​ការជួបជុំ​ដោយ​សន្តិវិធី និង​បង្កើត​សមាគម​។ អ្នករាយការណ៍​ពិសេស​ស្តីពី​ស្ថានភាព​អ្នកការពារ​សិទ្ធិមនុស្ស​។​

​គួរ​បញ្ជាក់ថា លោក​រ៉ុង ឈុន ត្រូវបាន​សមត្ថកិច្ច​ចាប់ខ្លួន​កាលពី​យប់​ថ្ងៃទី​៣១ ខែកក្កដា ឆ្នាំ​២០២០​។ បន្ទាប់មក​តុលាការ​សម្រេច​ឃុំខ្លួន​លោក ក្រោម​ការចោទប្រកាន់​ពីបទ «​ញុះញង់​បង្កឲ្យមាន​ភាពវឹកវ​រ​ធ្ងន់ធ្ងរ​ដល់​សន្តិសុខ​សង្គម​»​។ ការចាប់ខ្លួន​នេះ ធ្វើឡើង​ក្រោយ​លោក​និយាយថា វៀតណាម​រំលោភ​យក​ដី​ពលរដ្ឋ​ខ្មែរ​នៅ​ខេត្ត​ត្បូងឃ្មុំ​។ បន្ទាប់ពី​ចាប់ឃុំខ្លួន​លោក​រ៉ុង ឈុន នៅមាន​សកម្មជន​សង្គម​ជាង​១០​នាក់​ទៀត​ត្រូវ​ចាប់ឃុំខ្លួន​ផងដែរ បន្ទាប់ពី​ពួកគេ​ធ្វើបាតុកម្ម ទាមទារ​ឱ្យ​ដោះលែង​លោក​រ៉ុង ឈុន​៕


ព័ត៌មានផ្សេងទៀត