ពីរ​ថ្ងៃក្រោយ​​កូរ៉េខាងជើង​​បង្ហាញ​​មី​ស៊ី​ល​ឆ្លង​ទ្វីប​​ជប៉ុន​ប្រកាស​​ពង្រឹង​​ការការពារ​ខ្លួន​

12-10-2020 5:34 pm 357

​ត្រឹមតែ​ពីរ​ថ្ងៃ​ប៉ុណ្ណោះ​បន្ទាប់ពី​កូរ៉េខាងជើង​ប្រារព្ធ​ខួប​៧៥​ឆ្នាំ​នៃ​ការបង្កើត​គណបក្ស​ពលករ ប្រទេស​ជប៉ុន​នៅ​ថ្ងៃទី​១២​តុលា​នេះ បានប្រកាស​ពង្រឹងសមត្ថភាព​បន្ថែម ដើម្បី​ទប់ស្កាត់​ការគំរាមកំហែង​ពី​ប្រទេស​កូរ៉េខាងជើង​។ កូរ៉េខាងជើង​កាលពី​ថ្ងៃ​សៅរ៍​សប្ដាហ៍​មុន បានរៀបចំ​ព្រឹត្ដិការណ៍​ដ៏​ធំ​បំផុ​តមួយ មាន​ទាំង​ក្បួនព្យុហយាត្រា​កងទ័ព សម្ភារ​យោធា និង​មាន​បង្ហាញ​នូវ​គ្រឿង​សព្វាវុធ​ទំនើបៗ ក្នុងនោះ​ក៏​មាននូវ​មី​ស៊ី​ល​ដែល​ស្គាល់​ថា​មី​ស៊ី​ល​អន្ដរទ្វីប​ICBM​ផងដែរ​។ មី​ស៊ី​ល​នេះ​មាន​សមត្ថភាព​អាច​បាញ់​ឆ្លង​ទ្វីប​បាន ដោយ​កូរ៉េខាងជើង​មិនដែល​បង្ហាញឲ្យឃើញទេ ពោលគឺ​តាំងពី​មាន​ទំនាក់ទំនង​ល្អប្រសើរ​ជាមួយ​អាមេរិក​និង​កូរ៉េខាងត្បូង​ក្នុង​ឆ្នាំ​២០១៨​។ 

​យ៉ាងណាក៏ដោយ​មី​ស៊ី​ល​អន្ដរទ្វីប​ICBM​បាន​លេច​វត្ដ​មាន​ជាថ្មី ចន្លោះពេល​កំពុង​ជាប់គាំង​នៃ​កិច្ចព្រមព្រៀង​រំលាយ​នុយក្លេអ៊ែរ ដែល​កូរ៉េខាងជើង​បាន​ឯកភាព​ជាមួយ​សហរដ្ឋ​អាមេរិក​។ ក្នុងជំនួប​កាលពី​ថ្ងៃទី​១២ ខែមិថុនា ឆ្នាំ​២០១៨​នៅក្នុង​ប្រទេស​សិង្ហ​បុរី កូរ៉េខាងជើង​និង​អាមេរិក​បាន​ឈានដល់​កិច្ចព្រមព្រៀង​រំលាយ​កម្មវិធី​នុយក្លេអ៊ែ​រ រួម​នឹង​ការប្ដេជ្ញាចិត្ដ​មួយចំនួ​ន​ទៀត ដើម្បី​ស្ដារ​ទំនាក់ទំនង​ការទូត​ឡើងវិញ​។ ប៉ុន្ដែ​មិនបាន​ប៉ុន្មាន កិច្ចព្រមព្រៀង​ត្រូវ​នៅ​ហ្នឹង​ថ្កល់​ដោយសារ​ខ្វែងគំនិត​ជុំវិញ​ការបន្ធូរបន្ថយ​ទណ្ឌកម្ម​។​

​តាំងពី​ជំនួប​លើក​ទី​ពីរ​ក្នុង​ខែកុម្ភៈ​ឆ្នាំ​២០១៩​ក្នុង​ទីក្រុង​ហាណូយ​ប្រទេស​វៀតណាម ដែល​លោក​គីម ជុង​អ៊ុន​និង​លោក​ដូណាល់ ត្រាំ មិន​ចុះសម្រុង​លើ​ការដោះដូរ​ទណ្ឌកម្មសេដ្ឋកិច្ច ដោយ​លោក​គីម​ចង់ឲ្យ​លោកត្រាំ​ដក​ទណ្ឌកម្មសេដ្ឋកិច្ច​ចេញ​ខ្លះ តែ​លោក​ត្រាំ​ថាឲ្យ​លោក​គីម​រំលាយ​កម្មវិធី​នុយក្លេអ៊ែ​រ​ជាមុនសិន​។ ទីបំផុត​កិច្ច​ជំនួប​កាលនោះ​បញ្ចប់​ទាំង​គ្មាន​លទ្ធផល ជាហេតុ​ធ្វើឲ្យ​ដំណើរការ​រំលាយ​នុយក្លេអ៊ែរ​ត្រូវក​ល់ជាប់​មួយកន្លែង​។​

​បន្ទាប់ពីនោះ​មក​ទោះ​តិចតួច​ក្ដី​កូរ៉េខាងជើង​ហាក់​អន់ចិត្ដ​នឹង​អាមេរិក មិន​ថា​លោក​ត្រាំ​បង្ហាញ​សុទិដ្ឋិនិយម​លើ​កិច្ចព្រមព្រៀង​រំលាយ​នុយក្លេអ៊ែរ​ក៏ដោយ​។ កូរ៉េខាងជើង​ក៏​ធ្លាប់បាន​ធ្វើតេស្ដ​មី​ស៊ី​ល​រយៈ​ចម្ងាយ​ខ្លី​ជា​ច្រើនលើកច្រើនសារ ជា​សកម្មភាព​ដែល​អន្ដរជាតិ​មិន​ចង់បាន​។ គាប់​ជូន​នៅក្នុង​ព្រឹត្ដិការណ៍​រម្លឹ​ក​ខួប​៧៥​ឆ្នាំ​នៃ​ការបង្កើត​គណបក្ស​ពលករ​កាលពី​ថ្ងៃ​សៅរ៍​សប្ដាហ៍ កូរ៉េខាងជើង​បានបង្ហាញ​នូវ​មី​ស៊ី​ល​ដ៏​មាន​អានុភាព​ថែមទៀត ជា​អាវុធ​សង្ស័យថា​ទើប​អភិវឌ្ឍ​ថ្មី​អាច​បាញ់​ចេញពី​នាវាមុជទឹក​បាន​។ ឥរិយាបថ​បែបនេះ ចង់​ឬ​មិន​ចង់​កូរ៉េខាងជើង​ត្រូវបាន​គេ​មើលឃើញថា កំពុង​ព្យាយាម​បង្អួត​សាច់ដុំ​សព្វាវុធ​ជាថ្មី​។​

​សម្រាប់​ប្រទេស​ជប៉ុន ឆ្លើយតប​នឹង​អ្វីដែល​ខ្លួន​ចាត់ទុកថា​ជា​ការគំរាមកំហែង និង​ភាពស្មុគស្មាញ​នៃ​ការអភិវឌ្ឍ​អាវុធ​របស់​កូរ៉េខាងជើង មន្ដ្រីជាន់ខ្ពស់​ជប៉ុន​លោក​កា​ត្សឹ​ណូ​ប៊ូ កា​តូ​បានធ្វើ​សន្និសីទកាសែត​បញ្ជាក់​ជំហ​រថា ជប៉ុន​នឹង​បង្កើន​ការប្រុងប្រយ័ត្ន​ចំពោះ​សមត្ថភាព​ទប់ស្កាត់​មី​ស៊ី​ល​ផ្លោង​។ ដ្បិត​មិន​បង្ហាញ​លម្អិត​ថា​ត្រូវ​បង្កើន​សមត្ថភាព​យ៉ាងម៉េច ប៉ុន្ដែ​លោក​ថា​ជប៉ុន​នឹង​បន្ដ​សហការ​ជាមួយ​អាមេរិក​និង​ប្រទេស​ពាក់ព័ន្ធ ដើម្បី​ការពារ​សុវត្ថិភាព​ប្រជាជន​ជប៉ុន​។​

​គួរ​ជម្រាបជូន​ថា ស្ថិតក្រោម​ការដឹកនាំរ​បស់​លោក​ស៊ីន​ហ្ស៊ូ អាបេ​អស់​រយៈពេ​លជិត​៨​ឆ្នាំ ជប៉ុន​បាន​ពង្រីក​តួនាទី​យោធា​ជា​អន្ដរជាតិ​ស្ថិតក្រោម​សម្ព័ន្ធភាព​ជប៉ុន​-​អាមេរិក ចន្លោះពេល​កើនឡើង​ការគំរាមកំហែង​ពី​កូរ៉េខាងជើង​និង​ចិន​។ ទីក្រុង​តូ​ក្យូ​បានចាត់ទុក​ប្រទេស​ទាំងពីរ​គំរាមកំហែង​ដល់​សន្ដិសុខ​ប្រទេស​ខ្លួន ហើយ​ជប៉ុន​កំពុង​សិក្សា​ពី​លទ្ធភាព​នៃ​ការផ្លាស់ប្ដូរ​គោលនយោបាយ​ដ៏​សំខាន់​មួយ ដែល​អាច​រួមបញ្ចូល​លទ្ធភាព​នៃ​ការអភិវឌ្ឍ​សមត្ថភាព​វាយប្រហារ​លើ​សត្រូវ​លើកដំបូង​ផងដែរ​៕(​ដោយ​៖​ពេញ ផេង​)

ព័ត៌មានផ្សេងទៀត