ភ្លើង​ឆេះ​ព្រៃ​នៅ​អ៊ុយ​ក្រែន​សម្លាប់​មនុស្ស​៨​នាក់​និង​រងរបួស​១០​នាក់​

01-10-2020 5:25 pm 525

​ទីភ្នាក់ងារ​គ្រប់គ្រង​គ្រោះមហន្តរាយ​អ៊ុយ​ក្រែន​នៅ​ថ្ងៃ​ព្រហស្បត្តិ៍​ទី​០១ តុលា ឆ្នាំ​២០២០​នេះ ឲ្យដឹងថា មនុស្ស ៨​នាក់ បាន​ស្លាប់​និង ១០​នាក់​ផ្សេង​ទៀត ត្រូវបាន​បញ្ជូន​ទៅកាន់​មន្ទីរពេទ្យ ក្នុង​ហេតុការណ៍​ភ្លើង​ឆេះ​ព្រៃ​មួយ ស្ថិត​នៅ​ភាគ​ខាងជើង​នៃ​តំបន់​Luhansk ប្រទេស​អ៊ុ​យក្រែន​។​

​ក្នុង​សេចក្តីថ្លែងការណ៍​ទីភ្នាក់ងារ​គ្រប់គ្រង​គ្រោះមហន្តរាយ​អគ្គិភ័យ​បញ្ជាក់ថា អគ្គិភ័យ​បាន​គំរាមកំហែង​ដល់​លំនៅឋាន​ចំនួន ២២​កន្លែង និង​បាន​ឡោម​ព័ទ្ធ​តំបន់​រងគ្រោះ​ប្រមាណ ៩,៣០០​ហិកតា ខណៈ​មនុស្ស ១២០​នាក់​ត្រូវបាន​ជម្លៀសចេញ​។ អាជ្ញាធរ​មូលដ្ឋាន​បាន​និយាយថា​មាន​កន្លែង​ឆាបឆេះ​សរុប​ចំនួន ១៤៦​កន្លែង ហើយ​ក្នុងនោះ​មាន​៨២​កន្លែង​ត្រូវ​បាន​ពន្លត់​។​

​ទាក់ទង​មូលហេតុ​នៃ​ភ្លើង​ឆេះ​ព្រៃ​នេះដែរ អាជ្ញាធរ​ក្នុង​តំបន់​បាន​និយាយថា អគ្គិភ័យ​នេះ​អាច​បណ្តាលមកពី​ការបាញ់​គ្រាប់ផ្លោង​ចេញពី​តំបន់​ក្បែរ​នោះ ដែល​គ្រប់គ្រង​ដោយ​ក្រុម​បំបែក​ខ្លួន​គាំទ្រ​ដោយ​រុស្ស៊ី​៕

​ដោយ​៖ យឺន សីហា​

ព័ត៌មានផ្សេងទៀត