ច្បាប់​ក្នុង​កម្មវិធី​ជជែក​ដេញដោល​បេក្ខជន​ប្រធានាធិបតី​អាមេរិក​នឹងត្រូវ​ផ្លាស់ប្តូរ​

01-10-2020 5:07 pm 341

​គណៈកម្មការ​ត្រួតពិនិត្យ​កម្មវិធី​ជជែក​ដេញដោល​ប្រធានាធិបតី​អាមេរិក ហៅ​កាត់​ថា​CPD និយាយ​នៅក្នុង​សេចក្តីថ្លែងការណ៍​ថា នឹងមាន​ការផ្លាស់ប្តូរ​ច្បាប់ នៅក្នុង​កម្មវិធី​ជជែក​ដេញដោល​បេក្ខជន​ប្រធានាធិបតី​អាមេរិក​ជុំ​ទី​ពីរ ដើម្បីឲ្យ​ដំណើរកា​រជជែក​ដេញដោល មាន​សណ្តាប់ធ្នាប់​ជាង​ជុំ​ទី​១​។ គណៈកម្មការ​ត្រួតពិនិត្យ​លើ​កម្មវិធី​ជជែក​ដេញដោល​បញ្ជាក់ថា វិធានការ​ថ្មី​នេះ​ផ្តោត​សំខាន់​ទៅលើ​ការបិទ​សំឡេង​មេក្រូ របស់​ភាគី​ម្ខាង​ណា ដែល​ព្យាយាម​និយាយ​បង្អាក់​ភាគី​ម្ខាង​ទៀត ឬ​បង្ក​ការរំខាន​ដល់​អ្នកសម្របសម្រួល​។ ពោល ប្រសិនបើ​បេក្ខជន​រូប​ណា និយាយ​កាត់​ភាគី​ទៀត​ដែល​កំពុងតែ​និយាយ គេ​នឹង​កាត់ផ្តាច់​ម៉ៃក្រូ​ហ្វូន​ភ្លាមៗ​តែម្តង​។ 

​គណៈកម្មការ​ត្រួតពិនិត្យ​កម្មវិធី​ជជែក​ដេញដោល​ប្រធានាធិបតី នឹង​បញ្ជាក់​ពី​ច្បាប់​ថ្មី​នេះ ទៅកាន់​បេក្ខជន​ប្រធានាធិបតី​ទាំង​ពីររូប​គឺ លោក​ដូណាល់ ត្រាំ​បេក្ខជន​ប្រធានាធិបតី​មកពី​គណបក្ស​សាធារណរដ្ឋ និង​លោកចូ​បាយ ដិន​បេក្ខជន​ប្រធានាធិបតី​មកពី​គណក្ស​ប្រជាធិបតេយ្យ ឲ្យបាន​ដឹងមុន ការជជែក​ដេញដោល​ជុំ​ទី​ពីរ​។ 

​ផែនការ​ផ្លាស់ប្តូរ​ច្បាប់​នៅក្នុង​កម្មវិធី​ជជែក​ដេញដោល​ប្រធានាធិបតី​នេះ ធ្វើឡើង​ភ្លាមៗ ក្រោយពី​មាន​ជជែក​តឹងសរសៃក​ដាក់គ្នា រវាង​លោក​ត្រាំ​និង​លោក​បាយ​ដិន នៅក្នុង​ការជជែក​ដេញដោល​ជុំ​ទី​១​កាលពី​រាត្រី​ថ្ងៃ​អង្គារ​។ នៅ​ក្នុងនោះ​ក៏មាន​ការប្រើ​ពាក្យសំដី​ប្រមាថ​គ្នា​ផងដែរ​។ មធ្យោបាយ​នៃ​ការជជែក​ដេញដោល​ប្រធានាធិបតី​លើកដំបូង ត្រូវបាន​គេ​រិះគន់​ទូទាំង​សហរដ្ឋអាមេរិក​និង​នៅ​ជុំវិញ​ពិភពលោក​។  តាម​សង្កេតមើល​នៅក្នុង​ការជជែក​ដេញដោល​ជុំ​ទី​១ លោក​ត្រាំ​តែងតែ​រំខាន​លោក​បាយ​ដិន ដែល​ជាហេតុ​នាំឲ្យ​មានការ ប៉ះទង្គិច​ពាក្យសំដី​គ្នា​ទៅវិញទៅមក​។ 

​ផែនការ​រឹតបន្តឹង​ច្បាប់​នៅក្នុង​កម្មវិធី​ការជជែក​ដេញដោល​ប្រធានាធិបតី ត្រូវបាន​ក្រុម​ខាង​ភាគី​លោក​ត្រាំ​រិះគន់​។ នាយក​ផ្នែក​ទំនាក់ទំនង​នៃ​យុទ្ធនាការ​ឃោសនា​របស់​លោក​ត្រាំ គឺ​លោក Tim Murtaugh បាន​ពិពណ៌នា​ការជជែក​ដេញដោល​គ្នា​យ៉ាង​ក្តៅគគុក​កាលពី​រាត្រី​ថ្ងៃ​អង្គារ​ថា​ជា ការផ្លាស់ប្តូរ​គំនិត​ដោយ​សេរី និង​បាន​រិះគន់​ផែនការ​ផ្លាស់ប្តូរ​ច្បាប់​នៅក្នុង​កម្មវិធី​ជជែក​ដេញដោល​នេះ​។ លោក Tim Murtaugh បានលើកឡើង​ហាក់​ចោទ គណៈកម្មការ​ត្រួតពិនិត្យ​លើ​កម្មវិធី​ជជែក​ដេញដោល​លម្អៀង​ទៅរក​ភាគី​ម្ខាង​ទៀតថា ដោយសារតែ​លោក​បាយ​ដិន រង​នូវ​ការវាយលុក​ខ្លាំងពេក​ពី​លោក​ត្រាំ ទើបបានជា​ផ្លាស់ប្តូរ​ច្បាប់​ជជែក​ដេញដោល​ដូច្នេះ​។​

ចំណែក​លោកស្រី Kate Bedingfield នាយករង​នៃ​យុទ្ធនាការ​របស់លោក​បាយដិន​វិញ​និយាយថា អតីត​អនុ​ប្រធានាធិបតី​លោក​បាយ​ដិន នឹងចូលរួម​អនុវត្ត​តាមច្បាប់ ដែល​បង្កើតឡើង​ដោយ​គណៈកម្មការ ដើម្បី​ព្យាយាម​ទប់ស្កាត់​ឥរិយាបទ​ខុស​ប្រក្រតី​របស់លោក​ដូណាល់ ត្រាំ​។​

​សូមបញ្ជាក់ថា ការជជែក​ដេញដោល​រវាង​លោក​ត្រាំ​និង​លោក​បាយ​ដិន ត្រូវធ្វើឡើង​ចំនួន​៣​លើក មុន​ការបោះឆ្នោត​ឈានចូល​មកដល់ នៅ​ថ្ងៃទី​៣​ខែវិច្ឆិកា​ឆ្នាំ​២០២០​។ នៅក្នុង​នោះ​ការជជែក​ដេញដោល​លើក​ទី​១ បាន​បិទ​បញ្ចប់​ហើយ នៅ​ថ្ងៃទី​៣០​ខែកញ្ញា​ឆ្នាំ​២០២០ ហើយ​ការជជែក​ដេញដោល​ជុំ​ទី​ពីរ នឹង​ធ្វើឡើង​នៅ​ថ្ងៃទី​១៥​ខែតុលា​ឆ្នាំ​២០២០ និង​លើក​ទី​បី​នៅ​ថ្ងៃទី​២២​ខែតុលា​ឆ្នាំ​២០២០៕ ​ដោយ​៖​អ៊ុន សុខ​ឡា​

 ពាក្យគន្លឹះ  អាមេរិកការបោះឆ្នោត

ព័ត៌មានផ្សេងទៀត