អ្នកនាំពាក្យ​ក្រសួង​ព័ត៌មាន​​ឆ្លើយតប​សង្គម​ស៊ីវិល​ពាក់ព័ន្ធ​​នឹង​សេចក្តីព្រាងច្បាប់​សិទ្ធិ​ទទួល​ព័ត៌មាន​​

01-10-2020 2:39 pm 160

​លោក​មាស សុភ័ណ្ឌ អនុរដ្ឋលេខាធិការ និង​ជា​អ្នកនាំពាក្យ​ក្រសួង​ព័ត៌មាន បាន​ឆ្លើយតប​ចំពោះ​សេចក្ដីថ្លែងការណ៍​របស់​អង្គការ​សង្គម​ស៊ីវិល​មួយចំនួន ពាក់ព័ន្ធ​នឹង​សេចក្ដីព្រាងច្បាប់​សិទ្ធិ​ទទួល​ព័ត៌មាន ដែល​បាន​ចេញផ្សាយ​កាលពី​ថ្ងៃទី​២៨ ខែកញ្ញា​កន្លងទៅ ដោយ​លោក​បាន​ថ្លែងថា សេចក្ដីព្រាងច្បាប់​នេះ កំពុងស្ថិត​ក្នុងដំណាក់កាល​ពិគ្រោះ​យោបល់​ជាមួយ​ក្រសួងយុត្តិធម៌ និង​ឈានទៅ​ការបញ្ជូន​ទៅកាន់​ទីស្តីកា​រ​គណៈរដ្ឋមន្ត្រី​នាពេលខាងមុខ​នេះ​តាម​នីតិវិធី​។​

​លោក​មាស សុភ័ណ្ឌ បានបញ្ជាក់​ផងដែ​រថា កន្លងមក​ការរៀបចំ​តាក់តែង​សេចក្តី​ព្រាង​ច្បាប់​នេះ ក្រសួង​ព័ត៌មាន​បាន​អនុញ្ញាតឱ្យ​មាន​ការចូលរួម​ពិភាក្សា និង​ផ្តល់យោបល់​យ៉ាង​ទូលំទូលាយ​ពី​ក្រសួង ស្ថាប័ន ទីភ្នាក់ងារ​អង្គការសហប្រជាជាតិ​ប្រចាំ​នៅ​កម្ពុជា (​អង្គការ​UNESCO និង​ការិយាល័យ​ឧត្តមស្នងកា​រ​អង្គការសហប្រជាជាតិទ​ទួលបន្ទុក​សិទ្ធិមនុស្ស ប្រចាំ​នៅ​កម្ពុជា​) និង​អង្គការ​សង្គម​ស៊ីវិល​មួយចំនួន​ដែល​បានចេញ​សេចក្តីថ្លែងការណ៍​នេះ តាមរយៈ​ការបង្កើត​នូវ​ក្រុមបច្ចេកទេស​មួយ ដែល​ហៅថា “​ក្រុមការងារ​បច្ចេកទេស​រៀបចំតាក់តែង​សេចក្តី​ព្រាង​ច្បាប់​សិទ្ធិ​ទទួល​ព័ត៌មាន (TWG-A2I)” ដោយ​ប្រើ​រយៈពេល​ជិត​បី​ឆ្នាំ​។ 

អនុរដ្ឋលេខាធិការ​រូបនេះ បាន​អះអាង​ទៀតថា ពាក់ព័ន្ធ​ទៅនឹង​ចំណុច​ទាំងឡាយ​ដែល​បានលើកឡើង​ក្នុង​សេច ក្តី​ថ្លែងការណ៍​នេះ គឺ​ត្រង់ចំណុច​ទាំងនោះ​ត្រូវបាន​លើកយក​មក​ពិភាក្សា និង​ផ្លាស់ប្តូរ យោបល់​គ្នា​ក្នុង​កិច្ចប្រជុំ​ក្រុម​ការ​បច្ចេកទេស TWG-A2I យ៉ាង​ផុសផុល និង​បានបញ្ជាក់​ហេតុ និង​ផល​យ៉ាង​ច្បាស់លាស់​ពាក់ព័ន្ធ​នឹង​ចំណុច​នី​មួយៗ​។ ទន្ទឹមនេះ សមាជិក​នៃ​អង្គប្រជុំ​ក្រុម​ការ​បច្ចេកទេស TWG-A2I ក៏បាន​ឯកភាពគ្នា​លើ​ចំណុច​ទាំងនោះ​ផងដែរ​។ ប៉ុន្តែ​នៅពេលដែល​សេចក្តីព្រាងច្បាប់​នេះ​ត្រៀម​នឹង​បញ្ជូនទៅ​ស្នើសុំ​ការអនុម័ត​តាម​នីតិវិធី បែរជា​អង្គការ​សង្គម​ស៊ីវិល​ទាំងនោះ បាន​សេចក្តីថ្លែងការណ៍​ដោយ​លើកឡើង​នូវ​ចំណុច​ទាំងនោះ​ឡើងវិញ និង​អត្ថាធិប្បាយ​បន្ថែមថា​សេចក្តីព្រាងច្បាប់​នេះ​មិន​ស្របទៅតាម​ស្តង់ដារ អន្តរជាតិ​ទៅវិញ​។​

​លោក​សង្កត់ធ្ងន់ថា តាមរយៈ​ការលើកឡើង​ចំណុច​ត្រង់នេះ យើង​អាច​សន្និដ្ឋានបានថា ការដែល​អង្គការ​សង្គម​ស៊ីវិល​ទាំងនោះ បានចេញ​នូវ​សេចក្តីថ្លែងការណ៍​នេះ គឺ​ហាក់ដូចជា​បំភ្លេចចោល​នូវ​តួនាទី​ភារកិច្ច​របស់ខ្លួន​ដែល​បាន​ចូលរួម​ពិភាក្សា ផ្តល់យោបល់ និង​ឯកភាព លើ​សេចក្តីព្រាងច្បាប់​នេះ​នា​ពេលកន្លងមក​។ លោក​អនុរដ្ឋលេខាធិការ​បាន​បន្ដថា នេះ​គឺជា​ការទាក់ទាញ​នូវ​ការចាប់អារម្មណ៍​ការគាំទ្រ និង​ទាញយក​ប្រជា ប្រិយភាព​សម្រាប់​ខ្លួន​ឬ ក្រុម​ខ្លួន​តែប៉ុណ្ណោះ​។ ជាមួយគ្នានេះ តាមរយៈ​សេចក្ដីថ្លែងការណ៍​នេះ ក៏​អាចជា​យុទ្ធសាស្ត្រ​ដើម្បី​ទទួលបាន​ការគាំទ្រ​ជា​ហិរញ្ញវត្ថុ ឬ​មូ​និធិ​ផ្សេងៗ​ពី​ប្រភព​ផ្សេងៗ​ក្នុង​ការធ្វើសកម្មភាព​របស់ខ្លួន​ឬ​ក្រុម​ខ្លួន​តែប៉ុណ្ណោះ​។​

​លោក​មាស សុភ័ណ្ឌ ក៏​បានបញ្ជាក់​បន្ថែមថា សេចក្តីព្រាងច្បាប់​សិទ្ធិ​ទទួល​ព័ត៌មាន​នេះ ត្រូវបាន​រៀបចំតាក់តែង​ឡើង ដោយបាន​សិក្សា​ស្រាវជ្រាវ​ច្បាប់ និង​លិខិតបទដ្ឋាន​គតិយុត្តិ​ជាតិ និង​បាន​សិក្សា​ស្រាវជ្រាវ​លើ​ច្បាប់​សិទ្ធិ​ទទួល​ព័ត៌មាន​បណ្តា​ប្រទេស​នានា​ទាំង​ក្នុង​តំបន់ និង​ពិភពលោក ព្រមទាំង​អនុលោម​ទៅតាម​គោលការណ៍​ទាំង​៩​ដែល ពាក់ព័ន្ធ​នឹង​សិទ្ធិ​ទទួល​ព័ត៌មាន និង​គោលការណ៍​Three- part tests ផងដែរ​។ លោក​បន្តថា ចំពោះ​សេចក្តីព្រាងច្បាប់​សិទ្ធិ​ទទួល​ព័ត៌មាន​គឺ​ជា​ការបេ្តជ្ញាចិត្ត​របស់​ក្រសួងព័ត៌មាន ក៏ដូចជា​រាជរដ្ឋាភិបាល​កម្ពុជា ចង់ឃើញ​សេចក្តីព្រាងច្បាប់​នេះ​ត្រូវ​បានអនុម័ត​នៅក្នុង​ឆ្នាំ​២០២០ នេះ​៕

ព័ត៌មានផ្សេងទៀត