លោក​គីម ជុង​អ៊ុន​​សុំទោស​​កូរ៉េខាងត្បូង បង្ហាញ​ពី​ឥរិយាបថ​​កាន់តែ​ទន់ភ្លន់​?

29-09-2020 5:45 pm 385

​កូរ៉េខាងត្បូង​និង​កូរ៉េខាងជើង​ថ្មីៗ​នេះ​មាន​បញ្ហា​មួយទៀត​ជាមួយគ្នា នោះ​គឺ​ទាហាន​កូរ៉េខាងជើង​បាន​បាញ់សម្លាប់​មន្ដ្រី​កូរ៉េខាងត្បូង​ម្នាក់​នៅ​តំបន់​ព្រំដែន​ទឹក​។ ប៉ុន្ដែ​ក្រោយ​ផ្ទុះ​ករណីនេះ លោក​គីម ជុង​អ៊ុន​បាន​ចេញមុខ​សុំទោស​ជា​សាធារណៈ ដែល​នេះ​ជា​ករណី​កម្រ​បំផុត​។ កន្លងមក​កូរ៉េ​ទាំងពីរ​បាន​ផ្ទុះ​កំហឹង​ដាក់គ្នា​រាប់មិនអស់ ហើយក៏​មាន​សកម្មភាព​បង្កហេតុ​ពី​កូរ៉េខាងជើង​ដែរ ប៉ុន្ដែ​លោក​គីម ជុង​អ៊ុន​មិន​ចេញមុខ​សុំទោស​ដាច់ខាត​។ ការសុំ​ទោស​របស់លោក​គីម​បែបនេះ ជា​រឿង​ល្អ​ទេ​សម្រាប់​កូរ៉េខាងជើង​? ហេតុអ្វី​ទើប​លោក​គីម​ចេញមុខ​សុំទោស​នៅពេលនេះ​?

​កាលពី​សប្ដាហ៍​មុន​កូរ៉េខាងជើង​បាន​បាញ់សម្លាប់​មន្ដ្រីជលផល​កូរ៉េខាងត្បូង​ម្នាក់ ដែល​ហេតុការណ៍​នេះ​កើតឡើង​នៅ​តំបន់​ព្រំដែន​ទឹក​។ កូរ៉េខាងត្បូង​បញ្ជាក់ថា បុរសរងគ្រោះ​អាយុ​៤៧​ឆ្នាំ​ជា​មន្ដ្រី​នៃ​នាយកដ្ឋាន​ជលផល ស្ថិតនៅលើ​ទូក​ចម្ងាយ​ប្រមាណ​១០​គីឡូម៉ែត្រ​ពី​ព្រំដែន​កូរ៉េខាងជើង ក្បែរ​កោះ​យ៉ុន​ព្យុង​(Yeonpyeong) កំពុង​បំពេញការងារ​។ បន្ទាប់មក​បុរស​រូប​នោះបាន​បាត់​ខ្លួន ដោយ​គេ​ប្រទះឃើញ​តែ​ស្បែកជើង​របស់លោក​នៅលើ​ទូក​ល្បាត​។ គេ​សន្និដ្ឋានថា ស្បែកជើង​នេះ​បន្សល់ទុក​ខណៈដែល​បុរសរងគ្រោះ​ព្យាយាម​រត់គេច​ពី​ការបាញ់សម្លាប់​។ តាម​ការអះអាង​ពី​កូរ៉េខាងត្បូង ក្រោយ​បាញ់សម្លាប់​ទាហាន​កូរ៉េខាងជើង​បាន​ដុត​សាកសព​ចោល​តែម្ដង ប៉ុន្ដែ​កូរ៉េខាងជើង​ថា​មិន​បានធ្វើ​ដូច្នេះ​ឡើយ​។ ករណីនេះ​នៅតែ​ជា​ភាពចម្រូងចម្រាស​រវាង​កូរ៉េ​ទាំងពីរ ហើយ​ប្រតិ​ប​ត្ដិ​ការស្វែងរ​កសាក​សព​ក៏​នៅ​បន្ដធ្វើ​នៅឡើយ​។​

​ចន្លោះពេល​មាន​ការយល់ឃើញ​ផ្សេងគ្នា មេដឹកនាំ​កូរ៉េខាងជើង​លោក​គីម ជុង​អ៊ុន​បានចេញ​លិខិត​សំ​ទោស​កូរ៉េខាងត្បូង​ដោយផ្ទាល់ ដែល​នេះ​ជា​ករណី​កម្រ​បំផុត​។ លោក​គីម​បញ្ជាក់ថា ឧប្បត្ដិហេតុ​នេះ​មិនគួរ​កើតឡើង​ទេ ហើយ​លោក​មាន​អារម្មណ៍​សោកស្ដាយ​ជាខ្លាំង​។ លោក​គីម ជុង​អ៊ុន​ទទួលស្គាល់​កូរ៉េខាងជើង​ពិតជា​បាន​បាញ់ប្រហារ​ទៅលើ​មន្ដ្រី​កូរ៉េខាងត្បូង ប៉ុន្ដែ​មិនបាន​ដុត​សាកសព​ចោល​ដូច​ការសន្និដ្ឋាន​ទេ​។ អំឡុងពេល​កើតហេតុ​យោធា​កូរ៉េខាងជើង​មិនបាន​ស្គាល់​អត្ដ​សញ្ញាណ​បុរសរងគ្រោះ​ឡើយ ដឹង​ត្រឹម​ថា​រូបគេ​បាន​ចូលក្នុង​ដែនទឹក​កូរ៉េខាងជើង​រួច​ក៏​ព្យាយាម​រត់គេច ប៉ុន្ដែ​ត្រូវ​កងទ័ព​កូរ៉េខាងជើង​បាញ់​ជាង​១០​គ្រាប់​។ លោក​នៅតែ​អះអាងថា​មិនបាន​ដុត​សាកសព​បុរស​រូបនោះ​ចោល គឺ​ដុត​តែ​សម្ភារៈ​ការពារ​ការឆ្លង​រាតត្បាត​នៃ​ជំងឺ​កូវី​ដ​-១៩​។ កូរ៉េខាងជើង​ក៏​បានប្រគល់​លទ្ធផល​នៃ​ការស៊ើបអង្កេត​លើ​ឧប្បត្ដិ​ហេតុនេះ​ឲ្យទៅ​ភាគី​កូរ៉េខាងត្បូ​ង​ផងដែរ ខណៈ​កូរ៉េខាងត្បូង​ជំរុញ​ឲ្យ​កូរ៉េខាងជើង​ស៊ើបអង្កេត​បន្ថែម​។ 

​ការសុំ​ទោស​ជា​សាធារណៈ​ទៅកាន់​កូរ៉េខាងត្បូង​ពី​សំណាក់​លោក​គីម ជុង​អ៊ុន គឺជា​រឿង​មួយ​ដែល​មិន​ធ្លាប់​កើតមាន​ទេ ទោះបី​កន្លងមក​ផ្ទុះ​ភាព​តានតឹង​នឹង​គ្នា​ខ្លាំង​យ៉ាងណាក៏ដោយ​។ ជារួម​សម្រាប់​កូរ៉េខាងជើង​មាន​ម្ដង​ដែរ​ដែល​ចង់​សុំទោស គឺ​ក្នុងអំឡុង​ឆ្នាំ​២០០៨​នៅពេល​មាន​ការបាញ់សម្លាប់​អ្នកទេសចរ​ម្នាក់​នៅលើ​ភ្នំ​គុម​កាង​ក្នុងប្រទេស​កូរ៉េខាងជើង​។ ក្នុង​ឆ្នាំ​២០១០​មានការ​បង្កហេតុ​ពី​កូរ៉េខាងជើង រហូត​ឈានដល់​ការប្រកាស​ចង់​ធ្វើសង្គ្រាម​។ ក៏​មានឧប្បត្ដិ​ហេតុរវា​ង​ទាហាន​កូរ៉េខាងជើង​និង​អាមេរិក​ឈរជើង​នៅ​កូរ៉េខាងត្បូង​ផងដែរ​។ នៅ​ឆ្នាំ​២០១៥ ទាហាន​កូរ៉េខាងត្បូង​ពីរ​នាក់​បាន​ពិការ​ដោយសារ​គ្រាប់មីន ដែល​ទាហាន​កូរ៉េខាងជើង​ដាក់​នៅក្នុង​តំបន់​គ្មាន​យោធា​។ ប៉ុន្ដែ​ហេតុការណ៍​កើតឡើង​ទាំង​អ​ប្បាល​ម៉ាន ពុំមាន​ការសុំ​ទោស​ណាមួយ​ពី​កូរ៉េខាងជើង​ឡើយ​។ 

​ដូច្នេះ​តើ​ហេតុអ្វី​បានជា​លោក​គីម ជុង​អ៊ុន​ចេញមុខ​សុំទោស​នៅពេលនេះ​? តើ​វា​ជា​សញ្ញា​ល្អ​ទេ​?

​ជាការ​ពិតណាស់​ឥរិយាបថ​របស់លោក​គីម ជុង​អ៊ុន​ពេលនេះ​ជា​រឿង​កាន់តែ​ល្អប្រសើរ​។ នោះ​គឺជា​កាយវិការ​ទន់ភ្លន់​យល់​ពី​កាលៈទេសៈ​ជាមួយ​កូរ៉េខាងត្បូង​។ វា​នឹង​រឹងរឹតតែ​ល្អប្រសើ​របើ​លោក​គីម​ព្រម​បន្ទន់ឥរិយាបថ​ជុំវិញ​កម្មវិធី​នុយក្លេអ៊ែរ គឺ​ថយក្រោយ​មួយ​ជំហាន​ឈានទៅ​អនុវត្ដ​តាម​កិច្ចព្រមព្រៀង​ជាមួយ​អាមេរិក ដើម្បី​ដោះដូរ​នឹង​ទណ្ឌកម្មសេដ្ឋកិច្ច​។ លោក​ដូណាល់ ត្រាំ​ប្រធានាធិបតី​អាមេរិក​ធ្លាប់​ប្ដេជ្ញា​ថា ប្រសិន​កូរ៉េខាងជើង​ព្រម​បោះបង់​កម្មវិធី​នុយក្លេអ៊ែ​រ លោក​នឹង​ជួយ​ឲ្យ​កូរ៉េខាងជើង​ក្លាយជា​ប្រទេស​មាន​សេដ្ឋកិច្ច​រីកចម្រើន​។ ប៉ុន្ដែ​ជារួម​ដំណើរការ​រំលាយ​នុយក្លេអ៊ែរ​ត្រូវ​ជាប់គាំង ដោយសារតែ​គ្មាន​ការយោគយល់​និង​ការ​បន្ទន់ឥរិយាបថ​ដាក់គ្នា​។ បើ​លោក​គីម ជុង​អ៊ុន​ទម្លាក់​ជំហរ​ដាច់ខាត​តែ​បន្ដិច​ដូច​ធ្វើ​ជាមួយ​កូរ៉េខាងត្បូង​ក្នុង​កាលៈទេសៈ​នេះ កូរ៉េខាងជើង​ក៏​មិន​ប្រឈម​សម្ពាធ​កាន់តែខ្លាំង​ពី​អាមេរិក​និង​អង្គការសហប្រជាជាតិ​ដែរ​។​

​ចំពោះ​ហេតុផល​ដែល​លោក​គីម​សុំទោស​កូរ៉េខាងត្បូង ទោះបីជា​មានមតិ​ខ្លះ​ថា​ធ្វើឡើង​ដោយ​គ្មាន​ចិត្ដ​ស្មោះ ប៉ុន្ដែ​ក៏​ជា​ឥរិយាបថ​ចៀសវាង​ភាព​តានតឹង​ជាមួយ​កូរ៉េខាងត្បូង​។ រដ្ឋាភិបាល​កូរ៉េខាងត្បូង​មុនៗ​ភាគច្រើន ប្រកាន់​គោលជំហរ​ធ្វើសង្គ្រាម​ជាមួយ​កូរ៉េខាងជើង ដោយឡែក​តែ​រដ្ឋាភិបាល​ស្ថិតក្រោម​ការដឹកនាំ​រប​ស់លោ​កមូន ជែ​អ៊ីន​បច្ចុប្បន្នមិន​ធ្វើ​ដូច្នេះឡើយ​។ លោក​មូន​តែងតែ​ស្វែងរ​កកិច្ចសហការ​ជាមួ​យ​គ្នា និង​មានបំណង​ចង់បាន​ការ​សម្បទាន​ទៅវិញទៅមក​។ 

​ម្យ៉ាងវិញទៀត​លោក​គីម ជុង​អ៊ុន​ចេញមុខ​សុំទោស​នៅពេលនេះ ក៏​ទំនងជា​ចង់ឲ្យ​ក្រុមអ្នកនយោបាយ​មាន​និន្នាការ​គាំទ្រ​កូរ៉េខាងជើ​ង​ក្នុងប្រទេស​កូរ៉េខាងត្បូង អាច​បន្ដសកម្មភាពរ​បស់​ពួកគេ​គាំទ្រ​កូរ៉េខាងជើង​។ ជាក់ស្ដែង​ក្រុម​ឆ្វេងនិយម​កូរ៉េខាងត្បូង​ធ្លាប់បាន​និយាយថា កូរ៉េខាងជើង​មិនអាក្រក់​ដូចជា​ការគិត​ឡើយ ហើយ​កូរ៉េខាងត្បូង​និង​កូរ៉េខាងជើង​មាន​អត្ដ​សញ្ញាណ​ដូចគ្នា ដែល​គួរតែ​អាច​បង្រួបបង្រួម​គ្នា​បាន​។ តែ​សម្រាប់​ក្រុម​ស្ដាំនិយម​វិញ​គិត​ផ្ទុយ​ពីនេះ រីឯ​ក្រុម​អ្នក​អភិរក្សនិយម​បាន​រិះគន់​លោក​មូន ជែ​អ៊ីន ចំពោះ​ភាព​យោគយល់​ខ្លាំងពេក​ជាមួយ​កូរ៉េខាងជើង និង​ថា​លោក​មូនជា​កូនអុ​ករបស់​កូរ៉េខាងជើង​ថែមទៀត​ផង​។ 

​មែនទែនទៅ​រដ្ឋាភិបាល​លោក​មូនមាន​ជម្រើស​ក្នុង​កាត់បន្ថយ​ភាព​តានតឹង​ជាមួយ​កូរ៉េខាងជើង ដោយ​អាច​ព្យាយាម​បញ្ជាក់​ទៅ​កូរ៉េខាងជើង​ថា អំពើហិង្សា​ដែល​គេ​ធ្វើ​កន្លងមក​នៅតាម​ព្រំដែន ជាពិសេស​សកម្មភាព​ប្រឆាំងនឹង​ប្រជាជន ជា​រឿង​មិនអាច​ទទួលយកបាន​។ កូរ៉េខាងត្បូង​អាច​ទាញយក​ហេតុផល​ថា នៅពេល​មាន​ពលរដ្ឋ​កូរ៉េខាងជើង​រត់គេចខ្លួន​ទៅ​កូរ៉េខាងត្បូង ឬក៏​អ្នកនេសាទ​បំពាន​ចូល​ដែនសមុទ្រ​កូរ៉េខាងត្បូង កូរ៉េខាងត្បូង​មិនដែល​ធ្វើ​ដូច​កូរ៉េខាងជើង​ទេ​។ ការធ្វេសប្រហែស​របស់​កូរ៉េខាងជើង​ទំនងជា​ហេតុផល​ធ្វើឲ្យ​ទាហាន​កូរ៉េខាងជើង​ជ្រុលដៃ ប៉ុន្ដែ​នោះ​មិនមែន​ជាការ​ដោះសារ​ពិតប្រាកដ​ឡើយ​។ ច្បាប់​សម្រាប់​អនុវត្ដ​នៅ​សមុទ្រ​លឿង ត្រូវតែ​សម្រួល​ឲ្យ​រឹតតែ​ស្រួល​អនុវត្ដ​ជាង​នេះ ដោយ​ពុំ​ចាំបាច់​មាន​ការពាក់ព័ន្ធ​ពី​ភាគី​អន្ដរជាតិ​ទេ តួយ៉ាង​មាន​អាមេរិក​និង​អង្គការសហប្រជាជាតិ​ជាដើម ប៉ុន្ដែ​អាច​ដោះស្រាយ​រវាង​កូរ៉េ​ទាំងពីរ​។ លោក​មូននិង​គីមគួរ​តែច​រចា​គ្នា​ដោយផ្ទាល់ ដែល​នោះ​អាចជា​ការប្ដេជ្ញាចិត្ដដ៏ល្អ​បំផុត​របស់​ទីក្រុង​ព្យុងយ៉ាង​ក្នុង​ការកាត់បន្ថ​យ​ការប្រឈមមុខ​ដាក់គ្នា​៕(​ដោយ​៖​ពេញ ផេង​)

ព័ត៌មានផ្សេងទៀត