អភិបាលក្រុង​ថា​គ្មាន​សិទ្ធិ​អន្តរាគមន៍​រឿង​លុប​ស្រះ​នៅ​ហ្គ្រេ​ន​ភ្នំពេញ​ទេ​

29-09-2020 11:42 am 595

​លោក​ឃួង ស្រេង  អភិបាល​រាជធានី​ភ្នំពេញ​នៅ​ថ្ងៃទី​២៨ ខែ​កញ្ញា បាន​ចេញ​សេចក្តីជូនដំណឹង​ថា ស្រះ​ដែល​ស្ថិត​នៅក្នុង​ទីក្រុង​រណប «​ហ្គ្រេ​ន​ភ្នំពេញ​» គឺជា​កម្មសិទ្ធិ​របស់​លោក​ឧកញ៉ា លាង ឃុន និង​លោក​ឧកញ៉ា លាង ម៉េង ពុំ​មាន​ជា​ទ្រព្យសម្បត្តិ​សាធារណៈ របស់​សាលា​រាជធានី​ភ្នំពេញ​ទេ​។​

​លោក​អភិបាល​សង្កត់ធ្ងន់ថា «​ការអន្តរាគមន៍​រក្សា​ទុក និង​ទប់ស្កាត់​ការ​លុប​ស្រះ​ទឹក​ខាង​លើ​របស់​រដ្ឋបាល​រាជធានី​ភ្នំពេញ ក្លាយ​ជា​ទង្វើ​រំលោភ​មាត្រា​៨៥ និង​មាត្រា​៨៨ នៃ​ច្បាប់​ភូមិបាល ហេតុ​ដូច្នេះ​រដ្ឋបាល​រាជធានី​ភ្នំពេញ ពុំ​មាន​មូលដ្ឋាន​ច្បាប់​គ្រប់គ្រាន់ ក្នុង​ការអន្តរាគមន៍​រក្សាទុក និង​ទប់ស្កាត់​បាន​ឡើយ​»​។​

​ការបញ្ជាក់​ពី​លោក​អភិបាល​រាជធានី​ភ្នំពេញ ធ្វើឡើង​បន្ទាប់​ពី​មាន​ប្រជាពលរដ្ឋ​ចំនួន​១៤០​នាក់​រស់នៅ​ក្នុង​បុរី​ទីក្រុង​រណប អន្តរជាតិ​ហ្គ្រេ​ន​ភ្នំពេញ បាន​ដាក់​លិខិត​ស្នើ​សុំ​អន្តរាគមន៍​រក្សាទុក និង​ទប់ស្កាត់​ការ​លុប​ស្រះ​ទឹក ដែល​មាន​បណ្ដោយ​ប្រវែង​ប្រមាណ​៤២៣​ម៉ែត្រ និង​ទទឹង​ប្រវែង​ប្រមាណ​២៤៥​ម៉ែត្រ ស្ថិតនៅតាម​បណ្ដោយ​វិថី​ហ្គ្រេ​ន កែង​ផ្លូវ​ខាងលិច​ស្រះ​ទឹក ក្នុង​ទីតាំង​បុរី​ទីក្រុង​រណប អន្តរជាតិ​ហ្គ្រេ​ន​ភ្នំពេញ​។​

​ក្រោយ​ទទួល​លិខិត​នេះ រដ្ឋបាល​រាជធានី​ភ្នំពេញ​បាន​ចាត់​មន្ត្រី​ចុះ​ស្រាវជ្រាវ និង​រក​ឯកសា​រពាក់​ព័ន្ធ ពិនិត្យឃើញថា ស្រះ​ទឹក​ខាងលើនេះ ពុំមែន​ជា​ទ្រព្យសម្បត្តិ​សាធារណៈ​របស់​រដ្ឋបាល​រាជធានី​ភ្នំពេញ​ឡើយ ហើយ​ឯកសារ ទៀតសោត ស្រះ​ទឹក​នេះ​មាន​បណ្ណ​សម្គាល់​សិទ្ធិ​កាន់កាប់ អចលនវត្ថុ របស់​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​រាជធានី​ភ្នំពេញ ដែល​ជា​កម្មសិទ្ធិ​របស់​លោក​ឧកញ៉ា លាង ឃុន និង​លោក​ឧកញ៉ា លាង ម៉េង ដែល​បាន​ទិញ​ពី​ក្រុមហ៊ុន​វ៉ា​យ អិល ភី គ្រុប កាលពី​ឆ្នាំ​២០០៩៕

ព័ត៌មានផ្សេងទៀត