ក្រសួង​ធនធានទឹក​​ឲ្យ​ប្រុងប្រយ័ត្ន​បាតុភូត​ផ្គរ​រន្ទះ​ និង​ខ្យល់​កន្ត្រាក់​​

29-09-2020 8:33 am 571

​ក្រសួង​ធនធានទឹក និង​ឧតុនិយម​នៅ​ថ្ងៃទី​២៩ ខែ​កញ្ញា ឆ្នាំ​២០២០​នេះ បានចេញ​សេចក្ដីជូនដំណឹង​ស្ដីពី​ស្ថានភាព​ធាតុ​អាកាស ចាប់ពី​ថ្ងៃទី​៣០ ខែ​កញ្ញា ដល់​ថ្ងៃទី​៦ ខែតុលា ឆ្នាំ​២០២០​។​

​ក្រសួង​បាន​បញ្ជាក់ថា តាមរយៈ​ការតាមដាន​នៃ​ការវិវត្ត និង​ប្រែប្រួល​ជា​បន្តបន្ទាប់​នៃ​ស្ថានភាព អាកាសធាតុ​សង្កេតឃើញ​ថា ចាប់ពី​ថ្ងៃទី​៣០ ខែ​កញ្ញា ដល់​ថ្ងៃទី​៦ ខែតុលា ឆ្នាំ ប្រព័ន្ធ​សម្ពាធ​ទាប​នឹង​បន្ត​អូសបន្លាយ​ឆ្លងកាត់​លើ​កម្ពុជា ដោយ​ភ្ជាប់​ជាមួយ​សម្ពាធ​ទាប​មួយ នៅលើ​សមុទ្រ​ចិន​ខាងត្បូង​។ 

​ជាមួយគ្នានេះ​ក្រសួង​បាន​អំពាវនាវ​ឲ្យ​ប្រជាពលរដ្ឋ មាន​ការប្រុងប្រយ័ត្ន​ខ្ពស់ ចំពោះ​បាតុភូត​ផ្គរ​រន្ទះ ខ្យល់​កន្ត្រាក់ និង​ជំនន់​ទឹកភ្លៀង ជាពិសេស​ប្រជាពលរដ្ឋ​រស់នៅ​ទី​ទំនាប​ក្បែរ​ផ្លូវទឹក ជាប់​តំបន់ភ្នំ​នៃ​បណ្ដា​ខេត្ត​ភាគ​ពាយ័ព្យ​ជាប់​ប្រទេស​ថៃ បណ្ដា​ខេត្ត​នៅ​តំបន់​មាត់សមុទ្រ និង​បណ្ដា​ខេត្ត​ជាប់​ជួរ​ភ្នំក្រវាញ​។ សម្រាប់​អ្នកនេសាទ និង​អ្នកដំណើរ​សមុទ្រ ប្រុងប្រយ័ត្ន​ចំពោះ​ភ្លៀងខ្យល់​បក់​ខ្លាំង និង​រលក​សមុទ្រ​ខ្ពស់ៗ ចាប់ពី​ថ្ងៃទី​៣ ដល់​ថ្ងៃទី​៦ ខែតុលា​៕


ព័ត៌មានផ្សេងទៀត