របាយការណ៍​៖​១០​ក្នុងចំណោម​​១៥​ឆ្នាំមុន​​លោក​ត្រាំ​​មិនបាន​​បង់ពន្ធ​ប្រាក់​ចំណូល​ទេ​

28-09-2020 4:22 pm 325
ប្រធានាធិបតីអាមេរិកលោកដូណាល់ ត្រាំ

​កាសែត​The New York Times​បាន​ចុះផ្សាយ​ថា លោក​ប្រធានាធិបតី​ដូណាល់ ត្រាំ​មិនបាន​បង់ពន្ធ​លើ​ប្រាក់ចំណូល​ទេ គឺ​រយៈពេល​១០​ឆ្នាំ​ក្នុងចំណោម​១៥​ឆ្នាំមុន មុនពេល​លោក​ជាប់ឆ្នោត​ជា​ប្រធានាធិបតី​។ កាសែត​អាមេរិក​ដដែល​បញ្ជាក់ថា ខ្លួន​បានទទួល​របាយការណ៍​បង់ពន្ធ​មាន​រយៈពេល​ជាង​២០​ឆ្នាំ​របស់លោក​ត្រាំ​និង​ក្រុមហ៊ុន​របស់លោក​។ នេះ​បើតាម​ការចុះផ្សាយ​កាលពី​ថ្ងៃអាទិត្យ​។ 

នៅក្នុង​របាយការណ៍​ឲ្យដឹង​ដែរថា លោក​ត្រាំ​បាន​ចំណាយ​៧៥០​ដុល្លារ​ប៉ុណ្ណោះ​សម្រាប់​ពន្ធ​លើ​ប្រាក់ចំណូល​នៅក្នុង​ឆ្នាំ​២០១៦ និង​៧៥០​ដុល្លារ​ទៀត​ក្នុង​ឆ្នាំ​២០១៧ ប៉ុន្ដែ​១០​ឆ្នាំ​ក្នុងចំណោម​១៥​ឆ្នាំមុន លោក​មិនបាន​បង់ពន្ធ​ទេ ដោយសារ​ចំណូល​រកបាន​ទាប​ជាង​ការចំណាយ​។ ការ​សែត​The New York Times​បាន​អះអាងថា ភាគច្រើន​នៃ​មុខ​ជំនួញ​របស់លោក​ត្រាំ ដូចជា​ទីលាន​វាយ​កូន​ហ្គោល​និង​សណ្ឋាគារ ខាត​ប្រាក់​រាប់លាន​ដុល្លារ​ពីមួយ​ឆ្នាំទៅ​មួយឆ្នាំ​។ កត្ដា​នេះហើយ​ដែល​ធ្វើឲ្យមាន​ការប្រែប្រួល​ផ្នែក​ហិរញ្ញវត្ថុ​។ ម្យ៉ាង​លោក​ត្រាំ​ប្រើប្រាស់​ប្រាក់ចំណូល​ទៅ​ទិញ​និង​ធ្វើ​អាជីវកម្ម​ប្រថុយប្រថាន បន្ទាប់មក​នៅពេល​ខាតបង់​ច្រើន​ក៏​ចាប់ផ្ដើម​គេច​មិន​បង់ពន្ធ​។​

​លើសពីនេះទៅទៀត លោក​ត្រាំ​ក៏ត្រូវ​ទទួលខុសត្រូវ​ចំ​ពោះ​ប្រាក់កម្ចី​ជាង​៣០០​លាន​ដុល្លារ ដែល​នឹង​គ្រោង​ធ្វើឡើង​នៅក្នុង​រយៈពេល​៤​ឆ្នាំ​ខាងមុខ​។ The New York Times​បន្ដ​ចោទ​មុខ​ជំនួញ​មួយចំនួន​របស់លោក​ត្រាំ បានទទួល​ប្រាក់​ពី​អ្នក​បញ្ចុះបញ្ចូល ពី​មន្ដ្រី​ការបរទេស និង​អ្នក​ផ្សេងទៀត​ដែល​ចង់បាន​ការចូលចិត្ដឬ​ការមើ​ល​ឃើញ​ពី​លោក​ប្រធានាធិបតី​។ ដោយឡែក​បើ​សម្អាង​លើ​របាយការណ៍​បង់ពន្ធ​ពី​ឆ្នាំ​១៩៨៥​ដល់​១៩៩៤ បង្ហាញថា​លោក​ត្រាំ​ខាតបង់​ច្រើន​ដែល​ធ្វើឲ្យ​លោក​គេចពន្ធ​៨​ឆ្នាំ​ក្នុងចំណោម​១០​ឆ្នាំ​កាលនោះ​។ ចំពោះ​ឯកសារ​ពាក់ព័ន្ធ​នឹង​ការបង់ពន្ធ​របស់លោក​ត្រាំ កាសែត​មួយ​នេះ​ថា​នឹង​ចេញផ្សាយ​នៅពេល​បន្ដបន្ទាប់​ទៀត​។​

​យ៉ាងណាមិញ​សម្រាប់​លោក​ដូណាល់ ត្រាំ បាន​ច្រានចោល​ទាំងស្រុង​នូវ​របាយការណ៍​ដែល​កាសែត​New York Times​ចេញផ្សាយ​។ ថ្លែង​ទៅកាន់​អ្នកសារព័ត៌មាន​ក្នុង​សេត​វិមាន​កាលពី​ថ្ងៃអាទិត្យ លោក​ថា​របាយការណ៍​នោះ​គឺ​ក្លែងក្លាយ​។ លោក​បន្ថែមថា​តាមពិត​លោក​បាន​បង់ពន្ធ​ច្រើនណាស់ ហើយ​លោក​នឹង​បង្ហាញ​ឲ្យ​ច្បាស់លាស់​នៅពេល​បញ្ចប់​ការត្រួតពិនិត្យ​។ ស្របពេល​ជាមួយគ្នា​ក្រុមហ៊ុន​របស់លោក ក៏​ចេញមុខ​បដិសេធ​ចំពោះ​ការចោទប្រកាន់​ដូច​បាន​ចុះផ្សាយ​នៅក្នុង​កាសែត​New York Times​ដែរ​។​

​គួរ​បញ្ជាក់ថា ការចេញផ្សាយ​របាយការណ៍​នេះ ធ្វើឡើង​តែ​ប៉ុន្មាន​ថ្ងៃ​ប៉ុណ្ណោះ​មុនពេល​លោក​ដូណាល់ ត្រាំ​ចូលរួម​កម្មវិធី​ការជជែក​ដេញដោល​នៃ​បេក្ខជន​ប្រធានាធិបតី ជាមួយ​គូប្រជែង​ជា​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​លោកចូ បាយ​ដិន​។ ម្យ៉ាង​ក៏​ស្របពេល​ការបោះឆ្នោត​អាមេរិក​នឹង​ចូល​មកដល់​នៅ​ថ្ងៃទី​០៣​វិច្ឆិកា​ខាងមុខ​៕(​ដោយ​៖​ពេញ ផេង​)

ព័ត៌មានផ្សេងទៀត