កូរ៉េខាងត្បូង​ចោទ​យោធា​កូរ៉េខាងជើង​ថា​បាញ់សម្លាប់​មន្ត្រីជលផល​របស់​ខ្លួន​ម្នាក់​

24-09-2020 3:46 pm 587

​មន្ត្រី​របស់​កូរ៉េ​ខាងត្បូង​ឲ្យដឹងថា មន្ត្រីជលផល​ម្នាក់​របស់ខ្លួន ត្រូវបាន​យោធា​របស់​កូរ៉េខាងជើង​បាញ់សម្លាប់ និង​ដុត​សាកសព​ចោល​។ រដ្ឋាភិបាល​ទីក្រុង​សេ​អ៊ូ​ល​និយាយថា មន្ត្រី​របស់​ខ្លួន​ម្នាក់​នោះ​បាន​បាត់​ខ្លួន​ពី​ទូក​ល្បាត​មួយ​នៅ​ជិត​ព្រំដែន ហើយ​ក្រោយមក​ត្រូវបាន​គេ​រកឃើញ​សាកសព នៅក្នុង​ដែនទឹក​របស់​កូរ៉េខាងជើង​។ ទីក្រុង​សេ​អ៊ូ​ល​អះអាងថា ទាហាន​កូរ៉េ​ខាងជើង​បាន​បាញ់សម្លាប់​បុរសរងគ្រោះ រួចហើយ​បាន​ចាក់​ប្រេង​ដុត​ចោល​តែ​ម្ដង​។ 

​ការបាញ់​សម្លាប់​មន្ត្រីជលផល​មួយ​រូប​របស់​កូរ៉េ​ខាងត្បូង​នេះ ធ្វើឡើង​ក្រោយ​ពី​ទូក​ល្បាត​របស់​កូរ៉េខាងជើង តាម​រក​ឃើញ​បុរស​រងគ្រោះ​នៅលើ​ផ្ទៃ​សមុទ្រ​នៅ​ម៉ោង​ប្រហែល ១៥៖៣០​នាទី​ថ្ងៃ​អង្គារ៍​ទី​១៥​កញ្ញា​(​ម៉ោង​នៅ​កូរ៉េខាងត្បូង​)​។ ក្រោយ​បាញ់សម្លាប់​យោធា​កូរ៉េ​ខាងជើង​បាន​ចាក់​ប្រេង​ដុត​សាកសព​បុរស​រងគ្រោះ​ចោល​តែ​ម្ដង​។ ការសន្និដ្ឋាន​នេះ​មន្ត្រី​កូរ៉េខាងត្បូង​ថា ដោយ​ផ្អែក​លើ​ការវិភាគ​ស្រាវជ្រាវ​ដ៏​ឈ្លាសវៃ​របស់​ខ្លួន​។ 

​ជុំវិញ​ករណី​នេះ​ភាគី​កូរ៉េខាងជើង មិន​បាន​អត្ថាធិប្បាយ​អ្វី​ទាំងអស់​។ ការចោទប្រកាន់​របស់​កូរ៉េខាងត្បូង ស្របពេល​ដែល​កូរ៉េ​ខាងជើង​បាន​កំពុង​រឹតបន្តឹង​ច្រក​ព្រំដែន​របស់​ខ្លួន ដោយ​បាន​អនុវត្ត​វិធានការ​បាញ់សម្លាប់ នៅ​នឹង​កន្លែង​ដើម្បី​ទប់ស្កាត់​ការចម្លង​វីរុស​កូវី​ដ​-១៩​។​

​អាជ្ញាធរ​កូរ៉េខាងត្បូង​បញ្ជាក់ថា បុរស​រងគ្រោះ​មាន​អាយុ​៤៧​ឆ្នាំ ជា​មន្ត្រី​នៃ​នាយកដ្ឋាន​ជលផល​បាន​ស្ថិតនៅលើ​ទូក​ល្បាត​របស់គាត់​ចម្ងាយ​ប្រហែល ១០​គីឡូម៉ែត្រ ពី​ព្រំដែន​ខាងជើង​ក្បែ​រកោះ​Yeonpyeong​។ បន្ទាប់មក​បុរស​នេះ​ក៏​បាន​បាត់​ខ្លួន​កាលពី​ថ្ងៃ​ច័ន្ទ​ទី​១៤​កញ្ញា​។ គេ​បាន​ប្រទះ​ឃើញ​ស្បែកជើង​ចោល​របស់​បុរសរងគ្រោះ​នៅ​លើ​ទូក​ល្បាត​។ គេ​សន្និដ្ឋាន​ថា​ស្បែកជើង​នេះ​បន្សល់​ទុក​ខណៈ​ដែល​បុរសរងគ្រោះ​ព្យាយាម​រត់គេច​ពី​ការបាញ់សម្លាប់​។​

​យ៉ាងណាក៏ដោយ នេះ​មិនមែន​ជា​លើក​ទី​១​ឡើយ ដែល​កូរ៉េ​ខាងជើង​បាន​បាញ់សម្លាប់​ពលរដ្ឋ​កូរ៉េខាងត្បូង​។ ពោល កាលពី​ឆ្នាំ​២០០៨ អ្នកទេសច​រក​កូរ៉េខាងត្បូង​ម្នាក់​ក៏​ត្រូវបាន​ទាហាន​កូរ៉េខាងជើង​បាញ់សម្លាប់ យ៉ាង​ព្រៃផ្សៃ​ដូចគ្នា នៅលើ​ភ្នំ​Kumgang ខេត្ត​Gangwon-do ក្នុង​ប្រទេស​កូរ៉េខាងជើង​៕

​ដោយ​៖ យឺន សីហា​

ព័ត៌មានផ្សេងទៀត