ចិន​៖​​វ៉ាក់សាំង​​កូវី​ដ​-១៩​​គួរ​ផ្ដល់​ឲ្យ​អ្នក​​ប្រឈម​ហានិភ័យ​ខ្ពស់​​មុន​ចាក់​​លើ​​មនុស្ស​គ្រប់គ្នា​

15-09-2020 9:40 am 226

​បើតាម​ការលើកឡើង​ពី​មន្ដ្រី​សុខាភិបាល​ជាន់ខ្ពស់​មួយរូប​របស់​ចិន ពលរដ្ឋ​នៅ​ក្នុងប្រទេស​ចិន​ពុំ​ចាំបាច់​ត្រូវ​ទទួល​វ៉ាក់សាំង​ប្រឆាំង​កូវី​ដ​-១៩​គ្រប់គ្នា​នោះទេ ខណៈដែល​ទីក្រុង​ប៉េកាំង​កំពុង​សម្លឹង​ពី​អាទិភាព​សម្រាប់​អ្នក​នៅ​ជួរមុខ និង​អ្នក​ដែល​ប្រឈម​ហានិភ័យ​ខ្ពស់​ពី​ជំងឺ​កូវី​ដ​-១៩​។ លោក​Gao Fu​ប្រធាន​មជ្ឈមណ្ឌល​គ្រប់គ្រង​និង​បង្ការ​ជំងឺឆ្លង​ចិន បាន​និយាយ​ក្នុង​កិច្ចប្រជុំ​ស្ដីពី​វ៉ាក់សាំង​ប្រឆាំង​កូវី​ដ​-១៩​ក្នុងពេល​ថ្មីៗ​នេះ​ថា ចាប់តាំងពី​ប្រទេស​ចិន​ផ្ទុះ​ជំងឺ​កូវី​ដ​-១៩​លើកដំបូង​ក្នុង​ទីក្រុង​វូ​ហាន ចិន​បាន​រស់រាន​ពី​ឥទ្ធិពល​អាក្រក់​នៃ​កូវី​ដ​-១៩​ជាច្រើនលើក​ហើយ​។ 

​ការសួរដេញដោល​ពី​ការផ្ដល់​វ៉ាក់សាំង​ជា​សាធារណៈ គឺជា​តុល្យភាព​មួយ​ថ្លឹងថ្លែង​ពី​ហានិភ័យ​និង​គុណប្រយោជន៍ ដោយ​វា​ពាក់ព័ន្ធ​នឹង​តម្លៃ​ផង​ក៏ដូចជា​ផល​អាក្រក់​នៃ​វ៉ាក់សាំង​ផង​។ នេះ​បើតាម​ការ​បញ្ជាក់បន្ថែម​របស់លោក​Gao​។ លោក​ថា​បច្ចុប្បន្ន​ពុំទាន់​ដល់ពេល​ចាំបាច់​ឡើយ ក្នុង​ការផ្ដល់​វ៉ាក់សាំង​ទ្រង់ទ្រាយ​ធំ ប៉ុន្ដែ​ត្រូវ​ផ្ដល់​អាទិភាព​ដល់​អ្នក​បំពេញ​ការងារ​នៅ​ជួរមុខ ដូចជា​បុគ្គលិក​សុខាភិបាល ពលរដ្ឋ​ចិន​ដែល​ធ្វើការ​ក្នុង​តំបន់​ប្រឈម​ការឆ្លង​ខ្ពស់​នៅ​ក្រៅប្រទេស ក៏ដូចជា​អ្នក​ដែល​បំពេញការងារ​ក្នុង​ទីតាំង​មាន​ហានិភ័យ​ខ្ពស់​ដូចជា​ក្នុង​ភោជនីយដ្ឋាន សាលារៀន ឬ​ផ្នែក​សេវាកម្ម​សម្អាត​ជាដើម​។​

​ចំពោះ​អ្វីដែល​មន្ដ្រី​សុខាភិបាល​ជាន់ខ្ពស់​ចិន​លើកឡើង​ដូច្នេះ ហាក់​ផ្ទុយ​បន្ដិច​ពី​គោលនយោបាយ​ប្រយុទ្ធប្រឆាំង​កូវី​ដ​-១៩​របស់​ប្រទេស​លោកខាងលិច​។ សូម្បីតែ​ប្រទេស​អូស្ដ្រាលី​ក៏​បានបង្ហាញ​ពី​ផែនការ​ផ្ដល់​វ៉ាក់​ប្រឆាំង​កូវី​ដ​-១៩​ជា​សាធារណៈ​ដែរ នៅពេល​រកឃើញ​វ៉ាក់សាំង​ដែល​អនុញ្ញាតឲ្យ​ប្រើប្រាស់​ជា​ផ្លូវការ​។​

​ទោះបីជា​យ៉ាងណាក៏ដោយ​ចិន​បាន​ក្លាយជា​ប្រទេស​ដែល​ដើរតួនាទី​សំខាន់បំផុត​មួយ នៅក្នុង​ការស្រាវជ្រាវរ​ក​វ៉ាក់សាំង​ប្រឆាំង​កូវី​ដ​-១៩​។ ចិន​គឺជា​អ្នក​ផលិត​ហើយក៏​ជា​អ្នកប្រើប្រាស់​វ៉ាក់សាំង​ដ៏​ធំ​បំផុត​ក្នុង​ពិភពលោក​។ ចិន​អាច​ផ្គត់ផ្គង់​វ៉ាក់សាំង​បាន​ជាង​១​ពាន់​លាន​ដូស​(doses)​ក្នុង​មួយឆ្នាំៗ ពី​ក្រុមហ៊ុន​ផលិត​ប្រមាណ​៤០​ទូទាំងប្រទេស នេះ​បើ​យោងតាម​របាយការណ៍​ឧស្សាហកម្ម​វ៉ាក់សាំង​សម្រាប់​មនុស្ស​ឆ្នាំ​២០១៨-២០២២​។ ក្នុងចំណោម​វ៉ាក់សាំង​ប្រឆាំង​កូវី​ដ​-១៩​ប្រមាណ​៣០​ប្រភេទ​កំពុង​ធ្វើតេស្ដ​លើ​មនុស្ស​ទូទាំង​ពិភពលោក ៩​ប្រភេទ​យកមក​ពី​ចិន​ដែលជា​ចំនួន​ដ៏​ច្រើន​បំផុត​ប្រៀបធៀប​នឹង​ប្រទេស​ផ្សេង​។ ក្នុងចំណោម​៩​ប្រភេទ​នោះ​ទៀតសោត មាន​៤​ប្រភេទ​ក្រុមហ៊ុន​ចិន​ជា​អ្នក​ផលិត​ដោយផ្ទាល់​តែម្ដង​។​ ពេលនេះកំពុង​រង់ចាំ​លទ្ធផលនៃការធ្វើ​តេស្ដលើមនុស្ស​ដំណាក់​កាល​ចុងក្រោយ​ ដើម្បីវាយតម្លៃ​និងប្រកាសអនុញ្ញាតឲ្យ​ប្រើប្រាស់ជាផ្លូវការ។

​សូមបញ្ជាក់ថា ប្រទេស​ចិន​មាន​ករណី​ឆ្លង​ថ្មី​កូវី​ដ​-១៩​តិចតួច​បំផុត​ក្នុង​ពេលនេះ ហើយ​ភាគច្រើន​គឺជា​ករណី​នាំចូល​។ បច្ចុប្បន្ន​ចិន​មាន​ករណី​ឆ្លង​សរុប​៨៥,១៩៤​នាក់ ស្លាប់​៤,៦៣៤​នាក់ ព្យាបាល​ជាសះស្បើយ​៨០,៤១៥​នាក់ និង​កំពុង​សម្រាក​ព្យាបាល​១៤៥​នាក់​។ បើ​គិតពី​ចំនួន​មនុស្ស​ឆ្លង​ទូទាំង​ពិភពលោក​វិញ​មាន​ជិត​៣០​លាន​នាក់ ស្លាប់​ជាង​៩៣​ម៉ឺន​នាក់ ជាសះស្បើយ​ជាង​២១​លាន​នាក់ និង​កំពុង​សម្រាក​ព្យាបាល​ជាង​៧​លាន​នាក់​៕(​ដោយ​៖​ពេញ ផេង​)​

 ពាក្យគន្លឹះ  ចិនកូវីដ១៩វ៉ាក់សាំង

ព័ត៌មានផ្សេងទៀត