មនុស្ស​កន្លះ​លាន​​នាក់​​ជម្លៀស​ខ្លួន​​ក្នុង​រដ្ឋ​Oregon​​ដោយសារ​​ភ្លើង​ឆេះ​ព្រៃ​

11-09-2020 4:23 pm 2258
រូបភាព​ភ្លើងឆេះព្រៃ​នៅអាមេរិក

​មនុស្ស​កន្លះ​លាន​នាក់​ត្រូវ​ជម្លៀស​ចេញពី​លំនៅឋាន​ក្នុង​រដ្ឋ​Oregon​សហរដ្ឋអាមេរិក ដោយសារតែ​ភ្លើង​ឆេះ​ព្រៃ​មិន​ធ្លាប់មាន បាន​កើតឡើង​នៅតាម​បណ្ដោយ​ឆ្នេរសមុទ្រ​ភាគ​ខាងលិច​សហរដ្ឋអាមេរិក​។ នេះ​បើតាម​ការបញ្ជាក់​ពី​អាជ្ញាធរ​។ នៅក្នុង​សេចក្ដីថ្លែងការណ៍​មួយ​បានឲ្យដឹងថា ក្រុម​ពន្លត់​អគ្គិភ័យ​កំពុង​សង្គ្រោះ​ជីវិត​មនុស្ស ខណៈដែល​ពួកគេ​ក៏កំពុង​តតាំង​នឹង​ភ្លើង​ដែល​កំពុង​ឆេះ​ព្រៃ​ក្នុង​ទំហំ​ជាង​៣៦​ម៉ឺន​ហិកតា​។ 

​តាម​របាយការណ៍​ប៉ូលិស​បញ្ជាក់ថា ក្នុង​រយៈពេល​៤៨​ម៉ោង​មាន​មនុស្ស​៤​នាក់​បាន​ស្លាប់ ដោយសារតែ​ភ្លើង​ឆេះ​ព្រៃ​នៅ​រដ្ឋ​California ខណៈ​មនុស្ស​៤​នាក់​ទៀត​ស្លាប់​នៅក្នុង​រដ្ឋ​Oregon និង​ក្មេងប្រុស​អាយុ​មួយឆ្នាំ​ម្នាក់​ស្លាប់​នៅ​រដ្ឋ​Washington​។ មនុស្ស​រាប់ពាន់នាក់​កំពុង​ប្រឈម​នឹង​ការជម្លៀសចេញ​ពី​រដ្ឋ​ទាំងបី​នេះ​។ 

​សូមបញ្ជាក់ថា រដ្ឋ​Oregon​បាន​រងគ្រោះ​ដោយសារ​ភ្លើង​ឆេះ​ព្រៃ​យ៉ាង​សន្ធោសន្ធៅ ដែល​កំពុង​រាលដាល​នៅ​តំបន់​ភាគ​ខាងលិច​សហរដ្ឋអាមេរិក​ក្នុង​សប្ដាហ៍​នេះ​។ ក្រុម​ពន្លត់ភ្លើង​ប្រមាណ​៣​ពាន់​នាក់​ត្រូវបាន​បញ្ជូនទៅ​តំបន់​រងគ្រោះ ខណៈ​មន្ដ្រី​ជំនាញ​និយាយថា​ត្រូវការ​កម្លាំង​ទ្វេដង ទើប​អាច​គ្រប់គ្រង​ភ្លើង​កំពុង​ឆេះ​បាន​៕(​ដោយ​៖​ពេញ ផេង​)

 ពាក្យគន្លឹះ  អាមេរិកភ្លើងឆេះព្រៃ

ព័ត៌មានផ្សេងទៀត