កូរ៉េខាងត្បូង​​រាយការណ៍​​ពី​ករណី​​ឆ្លងកូវី​ដ​-១៩​ថ្មី​​ខ្ពស់បំផុត​​គិតពី​ខែមីនា​

23-08-2020 3:11 pm 439

​កូរ៉េខាងត្បូង​នៅ​ថ្ងៃទី​២៣​សីហា​នេះ បាន​រាយការណ៍​ពី​ចំនួន​មនុស្ស​ឆ្លងកូវី​ដ​-១៩​ថ្មី​កើនឡើង​ខ្ពស់បំផុត​មិន​ធ្លាប់មាន​គិតពី​ខែ​មីនា​។ តាម​ការបញ្ជាក់​ពី​មជ្ឈមណ្ឌល​បង្ការ​និង​គ្រប់គ្រង​ជំងឺឆ្លង​កូរ៉េខាងត្បូង​បានឲ្យដឹងថា ចំនួន​ករណី​ឆ្លងកូវី​ដ​-១៩​ថ្មី​មាន​រហូតដល់​៣៩៧​នាក់ គិត​ត្រឹម​ពាក់កណ្ដាល​យប់​ថ្ងៃ​សៅរ៍​។ ករណី​ឆ្លង​ថ្មី​ច្រើន​ដូច្នេះ​ធ្វើឲ្យ​ចំនួន​ឆ្លងស​រុបនៅ​កូរ៉េខាងត្បូង​កើន​ដល់​១៧,៣៩៩​នាក់ ស្លាប់​៣០៩​នាក់​។ ប៉ុន្ដែ​ក្នុងនោះ​មាន​ជាសះស្បើយ​១៤,២០០​នាក់ កំពុង​សម្រាក​ព្យាបាល​សល់​២,៨៩០​នាក់​។​

​កន្លងមក​កូរ៉េខាងត្បូង​ទទួលជោគជ័យ​ក្នុង​ការទប់ស្កាត់​ករណី​ឆ្លង​រាតត្បាត​ក្នុង​សហគមន៍ ប៉ុន្ដែ​បាន​ផ្ទុះ​ការឆ្លង​ជា​រលក​ទី​ពីរ​ក្នុងពេល​ថ្មីៗ រហូត​រដ្ឋាភិបាល​ដាក់ចេញ​នូវ​វិធានការ​ទប់ស្កាត់​ជាថ្មី​យ៉ាង​តឹងរ៉ឹង​បំផុត​។ ចាប់ពី​ថ្ងៃទី​២៣​សីហា​នេះ​ទៅ រដ្ឋាភិបាល​បាន​ដាក់ចេញ​នូវ​វិធានការ​រក្សា​គម្លាត​សង្គម​ថ្នាក់​ទី​ពីរ ក្នុង​តំបន់​ស្ថិតនៅ​ខាងក្រៅ​ទីក្រុង​សេ​អ៊ួ​ល​ដោយ​ហាមឃាត់​ការជួបជុំ​នៅក្នុង​ព្រះវិហារ និង​បិទ​ក្លឹប​រាត្រី ហាង​កាហ្វេ ហាង​អាហារ​ប៊ូ​ហ្វេ​ជាដើម​។ អាជ្ញាធរ​សុខាភិបាល​បាន​និយាយថា វិធានការ​រក្សា​គម្លាត​សង្គម​ថ្នាក់​ទី​បី​អាច​នឹងត្រូវ​ដាក់ចេញ​បន្ថែម​ក្នុងពេល​ឆាប់ៗ ដែល​ជំរុញ​ឲ្យ​សាលា​រៀននិង​អាជីវកម្ម​ផ្សេងៗ​ត្រូវ​បិទទ្វារ​បណ្ដោះអាសន្ន ប្រសិនបើ​អត្រា​នៃ​ការឆ្លង​បន្ដ​កើនឡើង​មិន​ធ្លាក់ចុះ​វិញ​ទេ​៕(​ដោយ​៖​ពេញ ផេង​)

ព័ត៌មានផ្សេងទៀត