អាមេរិក​សម្រេច​ព្យួរ​សន្ធិសញ្ញា​បត្យាប័ន​ជា​មួយ​ហុងកុង​

20-08-2020 4:23 pm 478

​អាជ្ញាធរ​អាមេរិក​នៅ​ថ្ងៃទី​១៩​ខែសីហា​ឆ្នាំ​២០២០ បាន​ជូនដំណឹង​ជា​ផ្លូវការ​ដល់​ទីក្រុង​ហុងកុង​រួចហើយ​ថា សហរដ្ឋអាមេរិក​បាន​ព្យួរ​ឬ​បញ្ចប់​កិច្ចព្រមព្រៀង​និង​សន្ធិសញ្ញា​ទ្វេភាគី​ចំនួន ៣ ជាមួយ​ទីក្រុង​ហុងកុង​។ ក្នុងចំណោម​សន្ធិសញ្ញា​និង​កិច្ចព្រមព្រៀង​ទាំង​៣​នោះ ក៏មាន​សន្ធិសញ្ញា ស្តីពី ការធ្វើ​បត្យាប័ន​ទ្វេភាគី​ជាមួយ​ហុងកុង​ផងដែរ​។ ក្រសួងការបរទេស​អា​មេរិក​និយាយថា វិធានការ​ទាំងនេះ​បញ្ជាក់​ពី​ការព្រួយបារម្ភ​យ៉ាង​ជ្រាលជ្រៅ​របស់​អាមេរិក ទាក់ទង​នឹង​ការសម្រេចចិត្ត​របស់​ទីក្រុង​ប៉េកាំង ក្នុង​ការដាក់ចេញ​នូវ​ច្បាប់​សន្តិសុខ​ជាតិ ដែល​បាន​បំបិទ​សិទ្ធិសេរីភាព​របស់​ប្រជាជន​ហុងកុង​។​

​ក្រសួងការបរទេស​ចិន និយាយ​នៅ​ថ្ងៃទី​២០​ខែសីហា​ឆ្នាំ​២០២០​នេះ​ថា ហុងកុង​នឹង​ផ្អាក​កិច្ចសហប្រតិបត្តិការ​ផ្នែក​ច្បាប់​មួយចំនួន ជាមួយ​សហរដ្ឋអាមេរិក​វិញ ដើម្បី​ឆ្លើយតប​ទៅ​ទីក្រុង​វ៉ាស៊ីនតោន ដែល​បញ្ចប់​កិច្ចព្រមព្រៀង​មួយចំនួន​ជាមួយ​ហុងកុង​។​

​ចាប់តាំងពី​ចិន​អនុម័ត​សេចក្តីព្រាងច្បាប់​សន្តិសុខ​សម្រាប់​អនុវត្ត​នៅ​ហុងកុង​មក អាមេរិក​បាន​ដាក់ចេញ​វិធានការ​ចម្បងៗ​មួយចំនួន ក្នុង​បំណង​ប្រឆាំងនឹង​ចិន​។ នៅក្នុង​នោះ​មានដូចជា ការផ្តាច់​ការអនុគ្រោះ​ពាណិជ្ជកម្ម​ពិសេស​ជាមួយ​ហុងកុង​ជាដើម ខណៈ​កាលពី​ដើមខែ​នេះ​រដ្ឋបាល​លោក​ត្រាំ បាន​ដាក់ទណ្ឌកម្ម​លើ​នាយក​ប្រតិបត្តិ​ហុងកុង​លោកស្រី​ខា​រី ឡា​ម​និង​មន្ត្រីជាន់ខ្ពស់​១០​នាក់​ផ្សេងទៀត មកពី​ហុងកុង​និង​ចិនដីគោក​។​

​ច្បាប់​សន្តិសុខ​ជាតិ​ថ្មី​ដែល​អនុម័ត​ឲ្យប្រើ​ប្រា​ស់ជា​ផ្លូវការ​នៅ​ថ្ងៃទី​៣០​ខែមិថុនា​ឆ្នាំ​២០២០​នោះ ផ្តល់​សិទ្ធិអំណាច​ដល់​ក្រុង​ប៉េកាំង ក្នុងការ​ចាប់បញ្ជូន​ជនសង្ស័យ​ប្រព្រឹត្ត​បទល្មើស​ទាក់ទិន​នឹង​សន្តិសុខ​ជាតិ ទៅ​អនុវត្ត​ច្បាប់​នៅ​ចិន​ដីគោក ហើយ​ច្បាប់​នេះ​ក៏​បើកផ្លូវ​ឲ្យ​ចិន បង្កើត​ការិយាល័យ​សន្តិសុខ​ជាតិ​ចិន ប្រចាំ​នៅ​ហុងកុង​ដោយផ្ទាល់​ជា​លើកដំបូង​។ អាជ្ញាធរ​ចិន​និង​ហុងកុង អះអាងថា​ច្បាប់​នេះ​គ្រាន់តែ​ចូលមក​រៀបចំ​សណ្តាប់ធ្នាប់​ហុងកុង​ឡើងវិញ ក្រោយ​ផ្ទុះ​នូវ​មហា​បាតុកម្ម​និង​ការតវ៉ា​អស់​រយៈពេល​ជាច្រើន​ខែ​។​

​យ៉ាងណាក៏ដោយ ក្រោយ​ចិន​យក​ច្បាប់​សន្តិសុខ​ថ្មី​មក​អនុវត្ត​នៅ​ហុងកុង ប្រទេស​មួយចំនួន​ដែល​ធ្លាប់មាន​សម្ព័ន្ធភាព​ជិតស្និទ្ធ​ជាមួយ​ហុងកុង បាន​ចាត់ទុកថា​ហុងកុង​លែង​ដូច​ពីមុន ពោល ហុងកុង​និង​ចិន​គឺ​តែមួយ​។ ជា​ការពិត​ហុងកុង​ជា​របស់​ចិន ប៉ុន្តែ​មិនទាន់​ដល់​ពេលដែល​ចិន ត្រូវ​ធ្វើបែបនេះ​ចំពោះ​ហុងកុង​នៅឡើយ​ទេ យ៉ាងហោចណាស់​ចាំ​រំកិល​ដល់​ឆ្នាំ​២០៤៧​សិន​ដែរ ទើប​ចិន​មាន​សិទ្ធិ​។ ដូច្នេះ​ទើបបានជា​ធ្វើឲ្យ​ប្រទេស​មួយចំនួន​សម្តែង​នូវ​ការខកចិត្ត​ចំពោះ​ចិន និង​អាណិតអាសូរ​ប្រជាជន​ហុងកុង​ខ្លាំង​។​

​គួរ​ជម្រាបជូន​ថា ក្រៅតែពី​អាមេរិក មាន​ប្រទេស​ផ្សេងៗ​ទៀត​ដែល​បាន​ព្យួរ​សន្ធិសញ្ញា ស្តីពី ការធ្វើ​បត្យាប័ន​ជាមួយ​ហុងកុង រួម​មានដូចជា អូស្ត្រាលី កាណាដា អង់គ្លេស ណូវែល​ហ្សេ​ឡង់ និង​អាល្លឺម៉ង់​។ នៅក្រោម​កិច្ចព្រមព្រៀង​បត្យាប័ន​នេះ ប្រទេស​ជា​សមាជិក​អាច​បញ្ជូន​ជនសង្ស័យ​ដែល​ប្រព្រឹត្ត​បទល្មើស​ណាមួយ ពី​ប្រទេសមួយ​ទៅ​ប្រទេស​មួយទៀត ដោយ​ផ្អែក​ទៅតាម​ការស្នើសុំ​របស់​ប្រទេស​សាមី​៕ ដោយ​៖​អ៊ុន សុខ​ឡា​

ព័ត៌មានផ្សេងទៀត