សេដ្ឋកិច្ច​ថៃ​​ធ្លាក់ចុះ​​ជាង​១២​ភាគរយ​​ក្នុង​ត្រីមាស​ទី​ពីរ​​ដោយសារកូ​វីដ​-១៩

17-08-2020 8:59 pm 572

​តាម​តួលេខ​បង្ហាញ​នៅ​ថ្ងៃទី​១៧​សីហា​នេះ​បានឲ្យដឹងថា សេដ្ឋកិច្ច​របស់​ប្រទេស​ថៃ​បាន​ធ្លាក់ចុះ​ដ៏​អាក្រក់​បំផុត​គិត​ក្នុង​រយៈពេល​ជាង​២​ទសវត្ស​កន្លងមក ដោយសារតែ​ជំងឺ​កូវី​ដ​-១៩​បាន​បំផ្លាញ​ឧស្សាហកម្ម​ទេសចរណ៍​ដ៏​សំខាន់​របស់​ប្រទេស​នេះ​។ ថៃ​បាន​រួចផុត​ពី​ករណី​ឆ្លង​ធ្ងន់ធ្ងរ​ដោយសារកូ​វីដ​-១៩ តាមរយៈ​ការចាត់វិធានការ​រឹតបន្ដឹង​និង​ការបិទទ្វារ​ប្រទេស​ជាដើម ប៉ុន្ដែ​វិធានការ​នេះ​ក៏បង្ក​ផលប៉ះពាល់​ដល់​សេដ្ឋកិច្ចជាតិ​។ 

​ការិយាល័យ​ក្រុមប្រឹក្សា​អភិវឌ្ឍ​សេដ្ឋកិច្ចជាតិ​និង​សង្គម បានបង្ហាញ​ឲ្យដឹងថា​ការបិទទ្វារ​ក្នុង​ចន្លោះពេល​ឆ្លងកូវី​ដ​-១៩ បានធ្វើឲ្យ​សេដ្ឋកិច្ច​ថៃ​ធ្លាក់ចុះ​ដល់​១២.២​ភាគរយ​ក្នុង​ត្រីមាស​ទី​ពីរ​ក្នុងឆ្នាំនេះ ជា​ការធ្លាក់ចុះ​អាក្រក់​បំផុត​គិត​តាំងពី​មាន​វិបត្ដិ​ហិរញ្ញវត្ថុ​នៅ​អាស៊ី​ក្នុង​ឆ្នាំ​១៩៩៨​។ ក្រុមប្រឹក្សា​បាន​ព្យាករណ៍​ពី​ការធ្លាក់ចុះ​ក្នុង​ឆ្នាំ​២០២០​គឺ​៧.៥​ភាគរយ​។​

​ភ្ញៀវទេសចរ​ប្រមាណ​៤០​លាន​នាក់​រំពឹង​នឹង​មក​កម្សាន្ដ​នៅ​ប្រទេស​ថៃ​ក្នុងឆ្នាំនេះ ប៉ុន្ដែ​វិស័យ​ឧស្សាហកម្ម​ដឹកជញ្ជូន​ត្រូវ​រងគ្រោះ​មុនគេ នៅពេល​មាន​វិធានការ​បិទទ្វារ​ប្រទេស​កាលពី​ខែមីនា​។ អ​វត្ដ​មាននៃ​ភ្ញៀវទេសចរ​បាន​ធ្វើឲ្យប៉ះពាល់​ដល់​វិស័យ​ផ្សេងៗ​ជាច្រើន រាប់​ចាប់តាំងពី​ផ្ទះសំណាក់ សណ្ឋាគារ ភោជនីយដ្ឋាន ការលក់ដូរ​ជាដើម​។ បច្ចុប្បន្ន​រដ្ឋាភិបាល​ថៃ​កំពុង​ព្យាយាម​ជំរុញ​វិស័យ​ទេសចរណ៍​ក្នុងស្រុក ដោយ​ទុក​មួយផ្នែក​នៃ​ហិរញ្ញវត្ថុ​ដែល​បានអនុម័ត សម្រាប់​ផ្ដល់​ជា​មូលនិធិ​ដល់​វិស័យ​ធ្វើដំណើរ​៕​(ដោយ​៖​ពេញ ផេង​)

 ពាក្យគន្លឹះ  សេដ្ឋកិច្ចថៃកូវីដ១៩

ព័ត៌មានផ្សេងទៀត