អាមេរិក​​នឹង​ដាក់ទណ្ឌកម្ម​​ជាថ្មី​​លើ​អ៊ីរ៉ង់​​ឆាប់ៗ​​ទោះ​UN​មិន​គាំទ្រ​

16-08-2020 4:59 pm 848

​ក្រុមប្រឹក្សាសន្ដិសុខ​អង្គការសហប្រជាជាតិ​កាលពី​ថ្ងៃ​សុក្រ បាន​ច្រានចោល​សំណើ​របស់​អាមេរិក​ដែល​ចង់ឲ្យ​បន្ដ​ការដាក់ទណ្ឌកម្ម​ប្រឆាំង​អ៊ីរ៉ង់​។ ប៉ុន្ដែ​ទោះបីជា​ក្រុមប្រឹក្សាសន្ដិសុខ​អង្គការសហប្រជាជាតិ​មិន​ឯកភាព ប្រធានាធិបតី​អាមេរិក​លោក​ដូណាល់ ត្រាំ​បាន​និយាយថា ទណ្ឌកម្ម​ដាក់​លើ​អ៊ីរ៉ង់​ជាថ្មី​នឹង​ចាប់ផ្ដើម​ឡើងវិញ​ក្នុងពេល​ឆាប់ៗ គឺអាច​នៅ​សប្ដាហ៍​ថ្មី​នេះហើយ​។ 

​នៅក្នុង​សន្ដិ​សីទ​កាសែត​ពី​រដ្ឋ​New Jersey លោក​ត្រាំ​កត់សម្គាល់ថា “​យើង​ដឹង​ហើយ​ថា​ការបោះឆ្នោត​នឹង​ទៅជា​យ៉ាងណា ប៉ុន្ដែ​យើង​នឹង​ត្រឡប់ក្រោយ​វិញ​ងាក​ដាក់ទណ្ឌកម្ម​លើ​អ៊ីរ៉ង់ ដែល​អ្នកនឹង​ឃើញ​នៅ​សប្ដាហ៍​ក្រោយ​។​” លោក​ត្រាំ​បន្ថែមថា លោក​ក៏​គ្មាន​បំណង​ចូលរួម​ក្នុង​សន្និសីទ​តាម​ប្រព័ន្ធ​វីដេអូ ដែលជា​ការស្នើសុំ​របស់​ប្រធានាធិបតី​រុស្ស៊ី​វ្លា​ឌី​មៀ ពូ​ទីន​ដែរ​។​

​អគ្គរដ្ឋទូត​អាមេរិក​ប្រចាំ​អង្គការសហប្រជាជាតិ​អ្នកស្រី​ឃែ​លី ក្រា​ហ្វ បាន​និយាយ​ក្នុង​សេចក្ដីថ្លែងការណ៍​នា​ថ្ងៃ​សុក្រ​ថា អាមេរិក​មាន​សិទ្ធិ​គ្រប់យ៉ាង​ក្នុង​ការចាប់ផ្ដើម​អនុវត្ដ​ឡើងវិញ​នូវ​សេចក្ដីសម្រេច​របស់​ក្រុមប្រឹក្សាសន្ដិសុខ​អង្គការសហប្រជាជាតិ​ពីមុន​។ ក្នុងពេល​ប៉ុន្មាន​ថ្ងៃ​ខាងមុខនេះ​អាមេរិក​នឹង​ធ្វើតាម​ការប្ដេជ្ញាចិត្ដ គឺ​បញ្ឈប់​អ្វី​ទាំងអស់​បន្ដ​ពង្រីក​ទណ្ឌកម្ម​អាវុធ​លើ​ប្រទេស​អ៊ីរ៉ង់​។ 

​អាមេរិក​បាន​ដើរ​ចេញពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ក្នុង​ឆ្នាំ​២០១៨ ហើយ​ការឈានទៅរក​ការដាក់ទណ្ឌកម្ម​ជា​ឯកតោ​ភាគី បាន​បង្ក​ជា​ការសង្ស័យ​និង​ការព្រួយបារម្ភ​ថា អាច​នឹងមាន​ការបញ្ចប់​នូវ​កិច្ចព្រមព្រៀង​នុយក្លេអ៊ែរ​នេះ​។ ស្ថិតក្រោម​កិច្ចព្រមព្រៀង​ចុះហត្ថលេខា​ក្នុង​ឆ្នាំ​២០១៥​រវាង​អ៊ីរ៉ង់​ជាមួយ​ប្រទេស​មហាអំណាច​៥+១ ការហាមឃាត់​អាវុធ​លើ​ប្រទេស​អ៊ីរ៉ង់​ដែល​កំណត់​ជា​ផ្លូវការ​នោះ​នឹង​ផុតកំណត់​នៅ​ពាក់កណ្ដាល​ខែតុលា​ខាងមុខ​ហើយ​។ អស់​រយៈពេល​ជាច្រើន​ខែ​ដែល​រដ្ឋបាល​លោក​ដូណាល់ ត្រាំ បាន​ព្យាយាម​ពង្រីក​ការដាក់ទណ្ឌកម្ម​នេះ ទោះបីជា​បាន​ដើរ​ចេញពី​កិច្ចព្រមព្រៀង​ក៏ដោយ​៕(​ដោយ​៖​ពេញ ផេង​)

ព័ត៌មានផ្សេងទៀត