សូម​ប្រយ័ត្ន​!​សារ​ឈ្នះ​រង្វាន់​ទូរស័ព្ទ​បោកប្រាស់​!

22-07-2020 3:11 pm 334

​ក្រោយ​ទទួលបាន​សារ​ចោទ​ជា​សំណួរ និង​ចម្ងល់​ជាច្រើន​ពី​សំណាក់​ប្រជាពលរដ្ឋ​ទាក់ទង​នឹង​សារ​ឈ្នះ​រង្វាន់​ទូរស័ព្ទ​ដែល​ពួក​គាត់​ទទួលបាន​រួច នាយកដ្ឋាន​ប្រឆាំង​បទល្មើស​បច្ចេកវិទ្យា​តាមរយៈ​ទំព័រ​ហ្វេ​សប៊ុក​ផ្លូវការ​នៅ​ថ្ងៃ​ទី​២២ កក្កដា ឆ្នាំ​២០២០​នេះ បានបញ្ជាក់​ថា សារ​ទាំងនោះ​ជា​សារ​បោកប្រាស់​ដែល​ត្រូវបាន​ផ្ញើ​ទៅកាន់​ទូរស័ព្ទ​របស់​អ្នកប្រើប្រាស់ ដោយ​ភ្ជាប់​ជាមួយនឹង​តំណ​ភ្ជាប់​ឬ​លី​ង​(Link) ព្រមទាំង​ពាក្យ​បោក​បញ្ឆោត​ថា “​ឈ្នះ​រង្វាន់​ទូរ​សព្ទ​មួយ​គ្រឿង​ដោយ​គ្រាន់តែ ចុច​ចូលទៅក្នុង​តំណ​ភ្ជាប់​ឬ​លីង​” របស់​វេបសាយ​ដោយ​ប្រើ​ស្លាកស​ញ្ញា​(logo) របស់​ក្រុមហ៊ុន​ពិតៗ ដែល​បាន​បង្កើតឡើង​ដោយ​ក្រុម​បណ្តាញ​ឧក្រិដ្ឋជន ឬ​ក្រុម​Hacker​។​

​បើ​តាម​ការស្រាវជ្រាវ​បឋម​នាយកដ្ឋាន​បាន​រកឃើញថា សារ​បោក​បញ្ឆោត​ទាំងនេះ​ជា​ប្រភេទ​នៃ​ការបោកប្រាស់ (Scam) ស្រដៀង​គ្នា​នឹង​ការបោកប្រាស់​ខ​ល​បែគ​(Call back) ដែល​ទាមទារ​ឱ្យ​ជនរងគ្រោះ​យក​លេខ​ទូរ​សព្ទ​របស់ខ្លួន​ហៅ​ទៅ​លេខ​ក្រៅ​ប្រទេស​មួយចំនួន​នោះ ដែល​បញ្ហា​នេះ​ក៏​ធ្លាប់បាន​កើតឡើង​ក្នុងប្រទេស​កម្ពុជា​យើង​រួចមកហើយ​។​

​គួរបញ្ជាក់​ថា​ការបោកប្រាស់​នេះ អ្នកប្រើប្រាស់​នឹង​ត្រូវ​ខាតបង់​លុយ​ជា​ច្រើន​នៅពេលដែល​ពួកគេ​បាន​យក​លេខ​ទូរ​សព្ទ​របស់​ខ្លួន​ហៅ​ទៅកាន់​លេខ​នោះ ដោយសារ​តម្លៃ​សេវា​គឺ​មាន​តម្លៃ​ថ្លៃ និង​កាត់​ពី​គណនី​ទូរ​សព្ទ​ជនរងគ្រោះ​ដោយ​ស្វ័យប្រវត្តិ​។ លេខ​ទូរ​សព្ទ​ដែល​តម្រូវ​ឱ្យ​ហៅ​ទៅ​នោះ​ដែរ គឺ​មាន​ក្បាល​លេខ (+216) មកពី​ប្រទេស​ទុយ​នី​ស៊ី​។​

​ជាមួយ​គ្នា​នាយកដ្ឋាន​ប្រឆាំង​បទល្មើស​បច្ចេកវិទ្យា បាន​ណែនាំ​ប្រជាពលរដ្ឋ​ទាំងអស់​កុំ​ជឿ​លើ​ការ​បោក​បញ្ឆោត​ដោយ ការ​ឈ្នះ​រង្វាន់ ការលក់ទំនិញ​ថោក​ក្រោម​តម្លៃ​ទីផ្សារ​ផ្សេងៗ​ឡើយ ដោយ​មិន​ត្រូវ​ចុច​លើ​តំណ​ភ្ជាប់​ឬ​លីង​(Link)​ដែល​បាន​ផ្ញើ​ចូលក្នុង​ទូរស័ព្ទ ដែល​មិន​បាន​ស្នើសុំ ព្រោះ​តំណ​ទាំងនោះ​អាច​ភ្ជាប់​មក​ជាមួយ​វេបសាយ​មាន​ផ្ទុក​Adware ដែល​ជា​មេរោគ​អាច​ផ្សព្វផ្សាយ​ពាណិជ្ជកម្ម​រញ៉េរញ៉ៃ ព្រមទាំង​អាច​លួច​យក​លេខ​សម្ងាត់​បាន​ថែម​ទៀត​ផង​៕ ដោយ​៖ យឺន សីហា​

ព័ត៌មានផ្សេងទៀត