មេដឹកនាំ​សហគមន៍​អឺរ៉ុប​ព្រមព្រៀងលើ​កញ្ចប់​ថវិកា​សង្គ្រោះ​សេដ្ឋកិច្ច​

21-07-2020 5:48 pm 770

​មេដឹកនាំ​នៃ​សហគមន៍​អឺរ៉ុប​បាន​ទម្លុះ​ភាពជាប់គាំង ក្រោយ​ឆ្លងកាត់​ការចរចា​អស់​រយៈពេល​៤​ថ្ងៃ ដោយ​ព្រមព្រៀងគ្នា​ផ្តល់ជំនួយ​និង​ប្រាក់កម្ចី​ចំនួន​៨៥៩​ពាន់​លាន​ដុល្លារ ដើម្បី​ទប់​ទល់នឹង​ផលប៉ះពាល់​សេដ្ឋកិច្ច ដោយសារតែ​ការ​រាតត្បាត​នៃ​វីរុស​កូវី​ដ​-១៩ នៅក្នុង​ប្លុក​នៃ​ប្រទេស​សហគមន៍​អឺរ៉ុប​ចំនួន​២៧​ប្រទេស​។ កិច្ចព្រមព្រៀង​នេះ​ក៏​ផ្តោតទៅលើ​កម្មវិធី​ជំនួយឥតសំណង​ដែល​នឹង​ផ្តល់ឲ្យ រដ្ឋ​ជា​សមាជិក​សហភាព​អឺរ៉ុប ដែល​រង​ផលប៉ះពាល់​ខ្លាំង​បំផុត​ដោយ​ជំងឺ​រាតត្បាត ចំនួន​ប្រមាណ​ជាង​៤៩០ពាន់​លាន​ដុល្លារ​ផងដែរ​។ សហភាព​អឺរ៉ុប​ក៏​ព្រមព្រៀងគ្នា ទម្លាក់​ថវិកា​ចំនួន​ប្រមាណ​ជិត​១.៤​ទ្រី​លាន​ដុល្លារ ដែលជា​ថវិកា​ស្នូល​សម្រាប់​ប្លុក​នេះ ក្នុង​រយៈពេល​៧​ឆ្នាំ​ទៅមុខទៀត​។​

​ការចរចា​ដែល​ចំណាយពេល​យូរ ចាប់តាំងពី​ថ្ងៃ​សុក្រ​រហូតដល់​ថ្ងៃ​អង្គារ​ទើប​ចេញ​លទ្ធផល ដោយសារតែ​ការមិនចុះសម្រុង​គ្នា​លើ​ចំណុច​មួយចំនួន​។ នៅ​ក្នុងនោះ​ក៏មាន​ការខ្វែងគំនិត​គ្នា រវាង​ប្រទេស​ដែល​រងគ្រោះ​ស្រាល​និង​ធ្ងន់​ពី​វីរុស​កូវី​ដ​-១៩ នៅក្នុង​ការ​ផ្តល់ជំនួយ​ឥត​សំណង​ផងដែរ​។ ប្រទេស​ស៊ុយអែត ដា​ណា​ម៉ាក អូទ្រីស​រួម​ជាមួយនឹង​ហ្វាំង​ឡ​ង់ បាន​ជំទាស់​មិន​សុខចិត្ត នៅក្នុង​ការ​ផ្តល់ជំនួយ​ឥត​សំណង​ច្រើនពេក ចំនួន​ប្រមាណ​ជាង​៦៣០​ពាន់​លាន​ដុល្លារ ដើម្បី​ជួយ​ប្រទេស​ដែល​រងគ្រោះ​ខ្លាំង​ឡើយ ខណៈ​ក្រុម​ប្រទេស​ដឹកនាំ​ដោយ​ហូ​ឡង់ កំណត់​ត្រឹម​ជាង​៤៧០​ពាន់​លាន​ដុល្លារ​។ តែ​ប្រទេស​ដែល​រងគ្រោះ​ខ្លាំង​ដូចជា អេ​ស្ប៉ាញ​និង​អ៊ីតាលី មិន​ចង់ឲ្យ​ការផ្តល់​ជំនួយឥតសំណ​ង​នោះ ក្រោម​ជាង​៥០០​ពាន់​លាន​ដុល្លារ​ឡើយ​។ ទីបំផុត​ក៏មាន​ការសម្របសម្រួល មក​នៅត្រឹម​តួលេខ​ជាង​៤៩០​ពាន់​លាន​ដុល្លារ​៕

 ពាក្យគន្លឹះ  EUកូវីដ១៩

ព័ត៌មានផ្សេងទៀត