រដ្ឋអាជ្ញា​កូរ៉េខាងត្បូង​​បើក​ការស៊ើប​អង្កេត​​ប្អូនស្រី​​លោក​គីម ជុង​អ៊ុន​​លើ​ករណី​មួយ​

17-07-2020 5:58 pm 565

​បើតាម​ការបញ្ជាក់​ពី​មន្ដ្រី​កូរ៉េខាងត្បូង​កាលពី​ថ្ងៃ​ព្រហស្បតិ៍​បានឲ្យដឹងថា រដ្ឋអាជ្ញា​ក្រុង​សេ​អ៊ួ​លបាន​បើ​កការស៊ើបអង្កេ​ត​ទៅលើ​ប្អូនស្រី​បង្កើត​លោក​គីម ជុង​អ៊ុន អ្នកស្រី​គីម យ៉ូ​ជុង ជុំវិញ​ការបញ្ជាឲ្យ​បំផ្ទុះ​ការិយាល័យ​ទំនាក់ទំនង​អន្ដរ​កូរ៉េ​ចោល​កាលពី​ខែ​មុន​។ សកម្មភាព​នេះ​ទំនងជា​ធ្វើឲ្យមាន​ការ​ខឹងសម្បា​ដល់​កូរ៉េខាងជើ​ង​បន្ថែមទៀត ខណៈ​ភាគី​ទាំងពីរ​កំពុង​ផ្ទុះ​ភាព​តានតឹង ហើយ​កូរ៉េខាងជើង​បាន​ថ្កោលទោស​កូរ៉េខាងត្បូង​ក្នុងពេល​ថ្មីៗ មាន​ទាំង​តិះដៀល​ដល់​ប្រធានាធិបតី​កូរ៉េខាងត្បូង​លោក​មូន ជែ​អ៊ីន​ថែមទៀត​។ 

​តាម​អ្នកនាំពាក្យ​រដ្ឋអាជ្ញា​កូរ៉េខាងត្បូង​បានឲ្យដឹងថា រដ្ឋអាជ្ញា​បានទទួល​បណ្ដឹង​ព្រហ្មទណ្ឌ​ប្រឆាំង​អ្នកស្រី​គីម យ៉ូ​ជុង ពី​មេធាវី​ដែលមាន​មូលដ្ឋាន​នៅ​ទីក្រុង​សេ​អ៊ួ​ល ហើយ​បានចាប់ផ្ដើម​ការងារ​ស៊ើបអង្កេត​។ នៅក្នុង​ពាក្យបណ្ដឹង​មេធាវី​លី ខ្យុង​ជែបាន​អះអាងថា ការិយាល័យ​ទំនាក់ទំនង​អន្ដរ​កូរ៉េ​ដែល​ត្រូវបាន​បំផ្លាញចោល គឺជា​ទ្រព្យសម្បត្ដិ​របស់​កូរ៉េខាងត្បូង ហើយ​ការកែច្នៃ​ឡើងវិញ​ប្រើប្រាស់​មូលនិធិ​រដ្ឋាភិបាល​កូរ៉េខាងត្បូង ទោះបីជា​ការិយាល័យ​នោះ​ស្ថិតនៅ​ក្នុងប្រទេស​កូរ៉េខាងជើង​ក៏ដោយ​។​

​មេធាវី​កូរ៉េខាងត្បូង​បានបញ្ជាក់​ក្នុង​ពាក្យបណ្ដឹង​ទៀតថា កូរ៉េខាងជើង​បាន​ប្រើប្រាស់​គ្រឿងផ្ទុះ​បំផ្លាញ​អគារ​បេសកកម្ម​ការទូត​តំណាង​របស់​កូរ៉េខាងត្បូង ដែល​បម្រើឲ្យ​ផលប្រយោជន៍​សាធារណៈ​។ លោក​មេធាវី​ដដែល​បាន​ដាក់ពាក្យ​ប្ដឹង​ប្រធាន​ផ្នែក​បុគ្គលិក​ទូទៅ​នៃ​កងទ័ព​កូរ៉េខាងជើង​ឈ្មោះ​ប៉ាក ចុង​ជុន​ផងដែរ​។ យោងតាម​ក្រមព្រហ្មទណ្ឌ​កូរ៉េខាងត្បូង លោក​មេធាវី​លី​សង្កត់ធ្ងន់ថា​ការធ្វើឲ្យ​ខូចខាត​ទ្រព្យសម្បត្ដិឬ​រំខាន​ដល់​សន្ដិភាព​ដោយ​ប្រើ​គ្រឿង​ផ្ទុះ ត្រូវ​ផ្ដន្ទាទោស​ដល់​ស្លាប់​ឬ​ជាប់ពន្ធនាគារ​យ៉ាងហោច​ណាស់​៧​ឆ្នាំ​។ 

​យ៉ាងណាមិញ​សម្រាប់​ស្ថានភាព​ជាក់ស្ដែង មិន​អាចទៅរួច​ទេ​សម្រាប់​មន្ដ្រី​ទីក្រុង​សេ​អ៊ួ​ល​ក្នុង​ការដាក់ទណ្ឌកម្ម​អ្នកស្រី​គីម យ៉ូ​ជុង​ឬក៏​លោក​ប៉ាក​នោះ ប៉ុន្ដែ​មេធាវី​កូរ៉េខាងត្បូង​ប្រាប់​ទីភ្នាក់ងារ​សារព័ត៌មា​ន​យ៉ុន​ហា​ប​ថា លោក​ដូច្នេះ​ព្រោះ​ចង់​ជូនដំណឹង​ដល់​ប្រជាជន​កូរ៉េខាងជើង​អំពី​ការ​លាក់ពុត​នៃ​មេដឹកនាំ​របស់​ពួកគេ​។ 

​សូម​រម្លឹកថា កាលពី​ខែ​មុន​មានការ​បំផ្ទុះ​ចោល​ការិយាល័យ​ទំនាក់ទំនង​អន្ដរ​កូរ៉េ​នៅ​តំបន់​ព្រំដែន គឺ​តែ​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​អ្នកស្រី​គីម​ដែលជា​ទីប្រឹក្សា​ម្នាក់​របស់លោក​គីម ជុង​អ៊ុន​ផង​នោះ បាន​និយាយថា​ការិយាល័យ​នេះ​គ្មាន​ប្រយោជន៍ ហើយ​នឹងត្រូវ​បំផ្លាញចោល​ទាំងស្រុង​ក្នុងពេល​ឆាប់ៗ​។​

​មុនពេល​បំផ្លាញ​ការិយាល័យ​ទំនាក់ទំនង​អន្ដរ​កូរ៉េ​ចោល កូរ៉េខាងជើង​បានចេញ​ការ​ថ្កោលទោស​ជាច្រើន​ដល់​កូរ៉េខាងត្បូង ករណី​មានការ​បង្ហោះ​ខិត្ដបណ្ណ​រិះគន់​ក្រុង​ព្យុងយ៉ាង​ចូលទៅ​កូរ៉េខាងជើង ពី​សំណាក់​ពលរដ្ឋ​កូរ៉េខាងជើង​ដែលរ​ត់ទៅ​នៅ​កូរ៉េខាងត្បូង​។ កូរ៉េខាងជើង​បាន​ទាំង​គំរាម​ប្រើ​យោធា​ប្រឆាំង​កូរ៉េខាងត្បូង​ផង ប៉ុន្ដែ​ក្រោយមក​ប្រកាស​ផ្អាក​រាល់​ផែនការ​ជំរុញ​ឲ្យ​កើនឡើង​ភាព​តានតឹង​។​

​ទំនាក់ទំនង​អន្ដរ​កូរ៉េ​តានតឹង​ជាថ្មី​បន្ទាប់ពី​កិច្ចប្រជុំ​រវាង​លោក​ដូណាល់ ត្រាំ​និង​លោក​គីម ជុង​អ៊ុន​នៅក្នុង​ប្រទេស​វៀតណាម​បិទ​បញ្ចប់​ដោយ​បរាជ័យ​។ នោះ​គឺជា​ការបរាជ័យ​ជុំវិញ​ការរំលាយ​អាវុធ​នុយក្លេអ៊ែរ​ដែល​កូរ៉េខាងជើង​បាន​សន្យា​នឹង​រំលាយចោល ដើម្បី​ដោះដូរ​ការដក​ទណ្ឌកម្ម​ពី​អន្ដរជាតិ​៕

​ដោយ​៖​ពេញ ផេង​

ព័ត៌មានផ្សេងទៀត