ហុងកុង​ខិត​​កាន់តែ​ជិត​​ទី​អវសាន​​នៃ​គោលការណ៍​​ប្រទេសមួយ​​ប្រព័ន្ធ​ពីរ​?

14-07-2020 6:21 pm 1094

​បន្ទាប់ពី​ច្បាប់​សន្ដិសុខ​ថ្មី​ត្រូវបាន​ចិន​អនុម័ត​កាលពី​ថ្ងៃទី​៣០​មិថុនា មានមតិ​យល់ឃើញ​ផ្សេងៗ​គ្នា​ពី​ជោគវាសនា​របស់​ហុងកុង​។ អ្នកខ្លះ​ថា​ហុងកុង​ត្រូវ​ដល់​ទីបញ្ចប់​នៃ​គោលការណ៍​ប្រទេសមួយ​ប្រព័ន្ធ​ពី​រហើយ ខណៈ​អ្នកខ្លះ​ទៀតថា​ពលរដ្ឋ​ហុងកុង​នឹង​ព្យាយាម​គ្រប់​មធ្យោបាយ ដើម្បី​ទាមទារ​ឲ្យ​រក្សា​សេរីភាព​ដូច​មុន​។ ការទាមទារ​គឺ​តាមរយៈ​ការស្នើសុំ​អន្ដរាគមន៍​ពី​អន្ដរជាតិ ឬក៏​ធ្វើ​សកម្មភាព​នានា​ដើម្បី​ប្រឆាំង តែ​ក៏​ទំនង​ពិបាក​ឆ្លង​ផុតពី​ការរារាំង​ដោយ​ច្បាប់​សន្ដិសុខ​ថ្មី​។ ដូច្នេះ​ហុងកុង​ពិតជា​ដល់ទី​អវសាន​នៃ​គោលការណ៍​ប្រទេសមួយ​ប្រព័ន្ធ​ពីរ​មែនឬ​យ៉ាងណា​?

​ទីក្រុង​ហុងកុង​បន្ទាប់ពី​ត្រូវបាន​អង់គ្លេស​ប្រគល់​មកឲ្យ​ចិន​វិញ​នៅ​ថ្ងៃទី​០១ ខែកក្កដា ឆ្នាំ​១៩៩៧  ក្រុង​មួយ​នេះ​ជា​តំបន់​រដ្ឋបាល​ពិសេស​ពាក់កណ្ដាល​ស្វយ័ត ស្ថិតក្រោម​គោលការណ៍​ប្រទេសមួយ​ប្រព័ន្ធ​ពីរ​។ ហុងកុង​មាន​ប្រព័ន្ធ​រដ្ឋបាល សេដ្ឋកិច្ច និង​ប្រព័ន្ធតុលាការ​ដាច់ដោយឡែក​ពី​ចិន លើកលែងតែ​វិស័យ​ពីរ​ប៉ុណ្ណោះ​ដែល​ត្រូវ​ពឹកពាក់​ចិន នោះ​គឺ​វិស័យ​យោធា​និង​ទំនាក់ទំនង​ការបរទេស​។ តាម​កិច្ចព្រមព្រៀង​ចុះ​ថ្ងៃទី​១៩ ខែ​ធ្នូ ឆ្នាំ​១៩៨៤ ហុងកុង​ត្រូវ​អនុវត្ដ​តាម​គោលការណ៍​ប្រទេសមួយ​ប្រព័ន្ធ​ពីរ​រយៈពេល​៥០​ឆ្នាំ ពោលគឺ​ចាប់ពី​ឆ្នាំ​១៩៩៧​ដល់​ឆ្នាំ​២០៤៧​។ ប៉ុន្ដែ​តាមរយៈ​កិច្ចខិតខំ​ប្រឹងប្រែង​ជា​បន្ដបន្ទាប់​របស់​រដ្ឋ​បាល​លោក​ស៊ី ជីន​ពីង ចិន​ត្រូវបាន​គេ​មើលឃើញថា​កំពុង​ព្យាយាម​បន្ដិច​ម្ដងៗ ក្រសោប​យក​ហុងកុង​មក​គ្រប់គ្រង​ទាំងស្រុង​មិន​ចាំ​ដល់​ឆ្នាំ​២០៤៧​ទេ​។ 

​អ្វីដែល​គេ​ជឿជាក់​កាន់តែខ្លាំង គឺ​នៅពេល​ទីក្រុង​ប៉េកាំង​បាន​បង្កើត​ច្បាប់​សន្ដិសុខ​ថ្មី​ដាក់ឲ្យ​អនុវត្ដនៅ​ហុង​កុងកា​លពី​ដើម​ខែកក្កដា​នេះ​។ ចិន​លើក​ទឡ្ហីករណ៍​ថា​ច្បាប់​សន្ដិសុខ​ថ្មី​សម្រាប់​ទប់ស្កាត់​សកម្មភាព​ផ្ដួលរំលំ​រដ្ឋអំណាច ប្រឆាំង​អំពើ​ភេរវកម្ម ការ​ផ្ដាច់ខ្លួន និង​ការ​គប់គិត​ជាមួយ​កង​ម្លាំង​បរទេស​ជាដើម ដែល​ទង្វើ​ទាំងអស់នេះ​ជា​រឿង​ប៉ះពាល់​ធ្ងន់ធ្ងរ​ដល់​សន្ដិសុខ​ជាតិ​។ ច្បាប់​សន្ដិសុខ​ថ្មី​គ្មាន​បំណង​ដាក់ទោស​ពលរដ្ឋ​ហុងកុង​ទេ គឺ​សំដៅ​តែ​បុគ្គល​មួយ​ក្ដាប់​តូច​តែង​បង្កចលាចល​ប៉ុណ្ណោះ​។ 

​ប៉ុន្ដែ​ការបកស្រាយ​របស់​ចិន​មិន​ត្រូវបាន​ក្រុមគាំទ្រ​ប្រជាធិបតេយ្យ​ហុងកុង និង​បណ្ដា​ប្រទេស​មួយចំនួន​មាន​អាមេរិក អង់គ្លេស​ជាដើម​ជឿជាក់​ឡើយ​។ មាន​មន្ទិល​ជាច្រើន​កើតឡើង​ជុំវិញ​ច្បាប់​សន្ដិសុខ​ថ្មី ហើយក៏​ពុំមាន​ការជឿជាក់​ណាមួយ​ថា ច្បាប់​ដែល​អនុម័ត​ទាំង​ចម្រូងចម្រាស​ដោយ​រដ្ឋាភិបាល​កណ្ដាល​ក្រុង​ប៉េកាំង​នេះ​នឹងមាន​ព្រំដែន​កំណត់​ឡើយ ពោល​គឺជា​បទបញ្ជា​ដើម្បី​បង្ក្រាប​ក្រុមប្រឆាំង​ហុងកុង​តែម្ដង​។​

​បើតាម​ការបកស្រាយ​ពី​ក្រឹត្យក្រម​នៅក្នុង​ច្បាប់​សន្ដិសុខ​ថ្មី ការប្រព្រឹត្ដ​អំពើ​ឧក្រិដ្ឋ​កម្ម ការធ្វើ​អបគមន៍ ការធ្វើ​វិទ្ធង្សនា ការប្រព្រឹត្ដ​អំពើ​ភេរវកម្ម​ជាដើម អាចមាន​ទោសទណ្ឌ​ធ្ងន់​បំផុត​ជាប់ពន្ធនាគារ​រហូតដល់​មួយជីវិត​។ ម្យ៉ាងវិញទៀត​កងកម្លាំង​សន្ដិសុខ​មាន​សិទ្ធិ​គ្រប់គ្រាន់​ក្នុង​ការស្រាវជ្រាវ​ឬ​ស្វែងរក​ភស្ដុតាង​នានា និង​អាច​បញ្ឈប់​មិនឲ្យ​ពលរដ្ឋ​ចាកចេញ​ពី​ហុងកុង​បាន និង​តម្រូវឲ្យ​អង្គកា​រនិង​ទី​ភ្នាក់ងារបរទេ​ស​រួមទាំង​កោះ​តៃវ៉ាន់ ត្រូវ​ផ្ដល់ព័ត៌មាន​ជុំវិញ​សកម្មភាព​ទាក់ទង​នឹង​ហុងកុង​។​

​ចិន​បានសម្រេច​បង្កើត​ច្បាប់​សន្ដិសុខ​ថ្មី​ដោយ​ពុំបាន​ឆ្លងកាត់​ការបោះឆ្នោត​នៅក្នុង​សភា​ហុងកុង​ទេ ទោះបី​សភា​ហុងកុង​ជា​អ្នកមាន​សិទ្ធិ​ក្នុង​ការអនុម័ត​លើ​ច្បាប់​នៅ​ហុងកុង​។ ក្រោយ​ច្បាប់​សន្ដិសុខ​ត្រូវ​ដាក់ឲ្យ​ប្រើជា​ផ្លូវការ ចិន​បាន​បើក​ការិយាល័យ​សន្ដិសុខ​មួយ​ភ្លាម​នៅ​ហុងកុង​គឺ​កាលពី​ថ្ងៃទី​០៨​កក្កដា​។ ដូច្នេះ​អ្វីដែល​ចិន​បានធ្វើ​ដូច​បាន​រៀបរាប់​នេះ អាច​សបញ្ជាក់​បាន​ថា​ចិន​ចាប់ផ្ដើម​អនុវត្ដ​យ៉ាង​ពេញលេញ​ក្នុង​ចេតនា​ទប់ស្កាត់​រាល់​សកម្មភាព​ប្រឆាំង​នៅ​ហុងកុង​។ 

​ករណីនេះ​ហើយ​ទើប​ធ្វើឲ្យមាន​ការព្រួយបារម្ភ​ពី​យុគ​សម័យ​ផ្ដាច់ការមួយ​នៅក្នុង​ទីក្រុង​ហុងកុង បញ្ចប់​គោលការណ៍​ប្រទេសមួយ​ប្រព័ន្ធ​ពីរ ដែល​ហុងកុង​ធ្លាប់មាន​សិទ្ធិសេរីភាព​ពេញលេញ​ក្នុង​ការបញ្ចេញមតិ​ឬ​ការតវ៉ា​ប្រឆាំងនឹង​អ្វីដែល​ពលរដ្ឋ​ចាត់ទុកថា​មិន​ត្រឹមត្រូវ តួយ៉ាង​មាន​ការតវ៉ា​ទ្រង់ទ្រាយ​ធំ​បំផុត​កាលពី​ឆ្នាំ​២០១៩ ប្រឆាំង​សេចក្ដីព្រាងច្បាប់​ធ្វើ​បត្យាប័ន​។​

​សម្រាប់​អាមេរិក​បានប្រកាសថា ហុងកុង​លែង​ជា​ទីក្រុង​ទទួលបាន​ស្វ័យភាព​ពី​ចិន​ទៀតហើយ ដូច្នេះ​អាមេរិក​ប្រកាស​ដកចេញ​នូវ​សិទ្ធិ​ពិសេស​មួយចំនួន​ពី​ហុងកុង​។ រីឯ​អង់គ្លេស​វិញ​ចាត់ទុក​ច្បាប់​សន្ដិសុខ​ថ្មី​នៅ​ហុងកុង ជា​ការរំលោភ​យ៉ាងធ្ងន់ធ្ងរ​លើ​កិច្ចព្រមព្រៀង​ឆ្នាំ​១៩៨៤​។ អង់គ្លេស​បានប្រកាស​អា​ច​ផ្ដល់​សញ្ជាតិ​ឲ្យ​ពលរដ្ឋ​ហុងកុង​រហូតដល់​៣​លាន​នាក់ ដែល​កាណាដា​ក៏​ទំនង​ដើរ​តាម​ជំហាន​របស់​អង់គ្លេស​។ 

​ងាក​មក​មើល​ពី​ជោគវាសនា​របស់​ហុងកុង ថា​ពិតជា​ដល់ទី​អវសាន​នៃ​គោលការណ៍​ប្រទេសមួយ​ប្រព័ន្ធ​ពីរ​ឬ​យ៉ាងណា បច្ចុប្បន្ន​ពិតជា​ពិបាក​ក្នុងការ​វាយតម្លៃថា​ជា​ទីបញ្ចប់​ទាំងស្រុង​។ ប៉ុន្ដែ​បើតាម​ស្ថានភាព​ជាក់ស្ដែង ភាព​តឹងរ៉ឹង​នៃ​ច្បាប់​សន្ដិសុខ​ថ្មី​នៅ​ហុងកុង ពិតជា​មិនអាច​ប្រកែង​បាន​ទេថា​រាល់​ការតវ៉ា​ប្រឆាំង​នានា  មិនអាច​ធ្វើបាន​ដោយ​សេរី​ដូច​មុន​ទៀតឡើយ​។ សិទ្ធិសេរីភាព​ពេញបរិបូរណ៍​ដែល​ហុងកុង​ធ្លាប់មាន​ពីមុន ទំនង​នឹងត្រូវ​ស្ថិតក្រោម​ច្បាប់​សន្ដិសុខ​ថ្មី ហើយ​នៅពេល​ពលរដ្ឋ​ហុងកុង​ភាគច្រើន​មិន​ពេញចិត្ដ​និង​រើ​បម្រាស​ប្រឆាំង​ឬ​ស្នើសុំ​ឲ្យ​អន្ដរជាតិ​ជួយ ពួកគេ​ប្រាកដជា​ត្រូវមាន​ទោស​អនុលោម​តាមច្បាប់​នេះ​។ ដូច្នេះ​ពួកគេ​នឹងត្រូវ​អាជ្ញាធរ​ចាប់ខ្លួន ហើយ​មិនអាច​បន្ទោស​បាន​ទៀតឡើយ​ថា អាជ្ញាធរ​ធ្វើ​ខុសច្បាប់​ឬ​រំលោភ​លើ​សិទ្ធិសេរីភាព​ដូច​ឆ្នាំ​២០១៩​។​

​ជារួម​ទោះ​មិនទាន់​អាច​គ្រប់គ្រង​បាន​ទាំងស្រុង បន្ដិច​ម្ដងៗ​ហុងកុង​នឹង​បាត់បង់​សិទ្ធិសេរីភាព ហើយ​ប្រហែល​មិន​ដល់​ឆ្នាំ​២០៤៧ ចិន​នឹង​អាច​គ្រប់គ្រង​ទីក្រុង​មួយ​នេះ​បាន បើទោះជា​មិនបាន​មួយរយ​ភាគរយ​ក៏​លែងមាន​សកម្មភាព​ប្រឆាំង​ទ្រង់ទ្រាយ​ធំ​ដូច​មុន​ទៀតហើយ ព្រោះ​ចិន​ក៏​មិន​ចង់ឲ្យមាន​ការបែងចែ​ក​ទឹកដី ហើយក៏​មិន​ចង់ឲ្យ​ហុងកុង​ដូច​តៃវ៉ាន់​៕

(​ដោយ​៖​ពេញ ផេង​)

ព័ត៌មានផ្សេងទៀត