ឥណ្ឌា​៖​​ការបា​ន​២​​ថ្ងៃ​កូនកំលោះ​​ស្លាប់​​ដោយសារកូ​វីដ​-១៩​​​និង​​ភ្ញៀវ​ជិត១០០​នាក់ឆ្លង​

03-07-2020 9:25 am 558

​កូនកំលោះ​នៅក្នុង​គ្រួសារ​មួយ​នៅ​ប្រទេស​ឥណ្ឌា បាន​ស្លាប់បាត់​បង់ជីវិត​ក្នុង​រយៈពេល​តែ​២​ថ្ងៃ​ប៉ុណ្ណោះ​បន្ទាប់ពី​រៀបការ ក្រោយ​លោក​បាន​ឆ្លង​វីរុស​កូរ៉ូ​ណាឬកូវី​ដ​-១៩​។ ដោយឡែក​មនុស្ស​ជិត១០០​នាក់​ផ្សេងទៀត​ត្រូវបាន​ធ្វើតេស្ដ​វិជ្ជ​មានកូ​វីដ​-១៩​ផងដែរ​។ ភ្ញៀវ​ដែល​បាន​ចូលរួម​សរុប​៤០០​នាក់​ត្រូវបាន​ធ្វើតេស្ដ​រក​វីរុស​កូរ៉ូ​ណាឬកូវី​ដ​-១៩ ក្រោយ​ចូលរួម​ពិ​ធី​អាពាហ៍ពិពាហ៍​ធ្វើឡើង​កាលពី​ពីរ​សប្ដាហ៍​មុន​នៅ​ក្នុងភូមិ​មួយ​នៃ​រដ្ឋ​Bihar​។​

​ចំពោះ​អ្នក​ដែល​បាន​ធ្វើតេស្ដ​វិជ្ជ​មានកូ​វីដ​-១៩ ត្រូវបាន​បញ្ជូនទៅ​សម្រាក​ព្យាបាល​នៅ​មជ្ឈមណ្ឌល​ថែទាំ នេះ​បើតាម​ប្រធាន​សុខាភិបាល​ប្រចាំ​តំបន់​បញ្ជាក់ប្រាប់​បណ្ដាញ​សារព័ត៌មាន​CNN​។ 

​កូនកំលោះ​ដែល​ស្លាប់​ក្រោយ​រៀបការ​បាន​ពីរ​ថ្ងៃនោះ មាន​អា​ការៈមិន​ស្រួល​តាំងពី​មុនពេល​ថ្ងៃ​រៀបការ​កាលពី​ថ្ងៃទី​១៥​មិថុនា​មកម្ល៉េះ ហើយ​ស្ថានភាព​របស់គេ​កាន់តែ​អាក្រក់​ទៅៗ​។ ក្រុមគ្រួសារ​ក៏បាន​បញ្ជូន​លោក​ទៅកាន់​មន្ទីរពេទ្យ​ដើម្បី​ពិនិត្យ​ដែរ ប៉ុន្ដែ​គ្រូពេទ្យ​មិនបាន​ជូនដំណឹង​ណាមួយ​ទៅកាន់​អាជ្ញាធរ​ក្នុងស្រុក​លោក​រស់នៅ​ឡើយ ហើយ​លោក​ក៏​មិនបាន​ធ្វើតេស្ដ​រក​វីរុស​កូវី​ដ​-១៩​ដែរ​គ្រាន់​ពិនិត្យ​សុខភាព​ធម្មតា​។ ក្រុមគ្រួសារ​របស់លោក​ទៅទៀត​ក៏​មិនបាន​ប្រាប់​នរណា​ពី​ស្ថានភាព​សុខភាព​របស់លោក​។​

​លក្ខខណ្ឌ​សុខភាព​បុរស​វ័យ៣០ឆ្នាំ​កាន់តែ​យ៉ាប់យ៉ឺន​បន្ទាប់ពី​រៀបការ​រួច ហើយ​ក្រុមគ្រួសារ​ក៏បាន​នាំ​លោក​ទៅ​មន្ទីរពេទ្យ​នៅក្បែរ​ផ្ទះ​ម្ដងទៀត ប៉ុន្ដែ​លោក​បាន​ដួល​នៅតាម​ផ្លូវ​ហើយ​ត្រូវបាន​ប្រកាសថា​ស្លាប់​ពេលមកដល់​មន្ទីរពេទ្យ​។​

​ក្រោយ​ទទួលបាន​ព័ត៌មាន​ច្បាស់លាស់​ជុំវិញ​ការស្លាប់​របស់​កូនកំលោះ អាជ្ញាធរ​ក៏​ចាប់ផ្ដើម​ប្រកាស​ស្វែងរក​អ្នក​ដែល​បាន​ចូលរួម​ក្នុង​ពិធីមង្គលការ​មក​ធ្វើតេស្ដ​រក​វីរុស​កូវី​ដ​-១៩​។ ជា​លទ្ធផល​មាន​មនុស្សជិត១០០​នាក់​បាន​ឆ្លង ​និងអ្នកខ្លះបានឆ្លងនៅពេល​ទាក់ទង​ជាមួយ​ភ្ញៀវ​ដែល​ចូលរួមមង្គលការ​។​

​គួរ​ជម្រាបជូន​ថា ប្រទេស​ឥណ្ឌា​នៅពេលនេះ​មាន​មនុស្ស​ស្លាប់​ជាង​១៨,០០០​នាក់​ហើយ​ដោយសារកូ​វីដ​-១៩ និង​ឆ្លង​ជិត​៦៣​ម៉ឺន​នាក់​៕

​ដោយ​៖​ពេញ ផេង​​

ព័ត៌មានផ្សេងទៀត