ដកហូត​សត្វ​បក្សី​ជិត​៤០០​ក្បាល​ដែល​ដាក់​លក់​តាម​បណ្ដោយ​ផ្លូវជាតិ​លេខ​៥

01-07-2020 9:39 am 252

​កាលពី​ពេល​ថ្មីៗ​កន្លងទៅនេះ ក្រុម​សង្គ្រោះ​សត្វព្រៃ​បន្ទាន់ (WRRT) របស់​អង្គការ​សម្ព័ន្ធមិត្ត​សត្វព្រៃ​តាម​រយៈ​ទំព័រ​ហ្វេ​សប៊ុក​ផ្លូវការ បាន​ធ្វើ​ការដកហូត​សត្វ​បក្សី​ជិត ៤០០​ក្បាល​ដែល​បាន​កំពុង​ដាក់លក់​នៅតាម​បណ្តោយ​ផ្លូវជាតិ​លេខ​៥ ដែល​ស្ថិត​នៅក្នុង​ខេត្ត​កំពង់ឆ្នាំង​។ ក្នុងចំណោម​សត្វ​បក្សី​ដែល​ដកហូត​បាន រួម​មាន​បក្សី​ងាប់​ចំនួន ៣៦៥​ក្បាល សត្វ​ព្រាប​ងាប់​ចំនួន​០៩​ក្បាល ចំណែកឯ​សត្វ​ព្រាប​ចំនួន​២២​ក្បាល​ដែល​នៅរស់​ត្រូវបាន​ដោះ​លែងឲ្យ​ចូលទៅ​ក្នុង​ព្រៃ​វិញ​។​

​ក្រុម​សង្គ្រោះ​សត្វព្រៃ​បន្ទាន់ (WRRT) បញ្ជាក់ថា​ក្នុង​ការចាប់​អ្នកលក់​សត្វ​ខុសច្បាប់​គឺ​មាន​ភាព​ពិបាក​ណាស់ ដោយសារតែ​អ្នកលក់​ទាំងនោះ​តែងតែ​យក​សត្វព្រៃ​ទៅ​លាក់ទុក​នៅក្នុង​ព្រៃ​ក្បែរ​នោះ ហើយ​អ្នកលក់​សត្វព្រៃ​ទាំងនោះ​បាន​រត់គេចខ្លួន​បាត់​នៅ​ពេល​ដែល​ដឹង​ថា​សមត្ថកិច្ច​សត្វព្រៃ​បាន​ចុះមក​ធ្វើការ​បង្ក្រាប​។ 

​ជាមួយ​គ្នា​អង្គការ​សម្ព័ន្ធមិត្ត​សត្វព្រៃ​បាន​អំពាវនាវ​ទៅ​ដល់​ប្រជាពលរដ្ឋ​កម្ពុជា​ឲ្យ​បញ្ឈប់​ការបរិភោគ​សាច់​សត្វព្រៃ​។ ជាក់ស្ដែង​ការ​យក​សត្វព្រៃ​ទៅ​ធ្វើ​ជា​សត្វ​ចិញ្ចឹម ឬ​ការប្រើប្រាស់​សាច់​សត្វព្រៃ​មានន័យថា​ជា​ការបំផ្លាញ​សម្បត្តិ​ធម្មជាតិ ដូច្នេះ​ត្រូវតែ​រួមគ្នា​ការពារ​សត្វព្រៃ​សម្រាប់​មនុស្ស​ជំនាន់​ក្រោយ​ឲ្យបាន​ស្គាល់​៕
​ដោយ​៖ យឺន សីហា​

ព័ត៌មានផ្សេងទៀត