កូរ៉េខាងត្បូង​និង​អាមេរិក​ប្រារព្ធ​ខួប​លើក​ទី​៧០​នៃ​ការផ្ទុះ​សង្គ្រាម​កូរ៉េ​

25-06-2020 4:49 pm 339

​នៅ​ថ្ងៃទី​២៥​ខែមិថុនា​ឆ្នាំ​២០២០ ជា​ខួប​លើក​ទី​៧០​ឆ្នាំ​គត់ នៃ​ការផ្ទុះ​សង្គ្រាម​កូរ៉េ​នៅ​ថ្ងៃទី​២៥​ខែមិថុនា​ឆ្នាំ​១៩៥០​។ អាមេរិក​ដែល​បាន​លើក​កងទ័ព​ទៅ​ជួយ​កូរ៉េខាងត្បូង នៅក្នុង​សង្គ្រាម​កាលនោះ បាន​ប្រារព្ធ​ខួប​នៃ​ការផ្ទុះ​សង្គ្រាម​កូរ៉េ ជាមួយ​ប្រទេស​កូរ៉េខាងត្បូង នៅ​ថ្ងៃទី​២៥​ខែមិថុនា​ឆ្នាំ​២០២០ ដោយ​បានចេញ​សេចក្តីថ្លែងការណ៍​រួមមួយ​ផងដែរ​។​

នៅក្នុង​សេចក្តីថ្លែងការណ៍​រួម សម្ព័ន្ធមិត្ត​ទាំង​ពីរបាន​ចូលរួម​គោរព នូវ​ការលះបង់ ភាពក្លាហាន​និង​កេរ្តិ៍ដំណែល​របស់​អ្នក​ដែល​បាន​ពលី​ជីវិត​ដើម្បី​ការពារ​សេរីភាព ប្រជាធិបតេយ្យ​និង​វិបុលភាព​ឲ្យ​ប្រទេស​កូរ៉េខាងត្បូង​។ ក្រសួង​ការពារជាតិ​កូរ៉េខាងត្បូង​និយាយថា នៅក្នុង​ជម្លោះ​យោធា​នោះ បណ្តាលឲ្យ​យោធា​កូរ៉េខាងជើង​ស្លាប់​ចំនួន​៥២​ម៉ឺន​នាក់ យោធា​កូរ៉េខាងត្បូង​ស្លាប់​១៣៧,០០០​នាក់ និង​ជនជាតិ​អាមេរិក​ស្លាប់​ចំនួន​៣៧,០០០​នាក់​។ តាមរយៈ​សេចក្តីថ្លែងការណ៍​អាមេរិក​និង​កូរ៉េខាងត្បូង នៅតែ​ប្តេជ្ញាចិត្ត​យ៉ាង​មុតមាំ ក្នុង​ការការពារ​សន្តិ​ភាព​បានមក​ដោយ​លំបាក​នៅ​ឧបទ្វីប​កូរ៉េ​។​

​សូម​រម្លឹកថា សង្គ្រាម​កូរ៉េ​បាន​ផ្ទុះឡើង​នៅពេលដែល​កូរ៉េខាងជើង លើកទ័ព​ឈ្លានពាន​ខ្សែបន្ទាត់​ព្រំដែន ខណ្ឌ​ចែក​ជាមួយ​ប្រទេស​កូរ៉េខាងត្បូង នៅ​ថ្ងៃទី​២៥​ខែមិថុនា​ឆ្នាំ​១៩៥០ ដើម្បី​ក្រសោប​យក​ដែនដី​នេះ​មក​បង្រួបបង្រួម ជា​ប្រទេស​កូរ៉េខាងជើង​តែមួយ​។ អាមេរិក​ដែល​មិន​ចូលចិត្ត​ប្រទេស​កាន់​របប​កុ​ម្មុយ​នី​ស ក្រោយ​ឃើញបែបនេះ ក៏បាន​លើកទ័ព​ទៅ​ជួយ​សម្ព័ន្ធមិត្ត​កូរ៉េខាងត្បូង ជាមួយ​អង្គការសហប្រជាជាតិ​។ ចំណែក កងទ័ព​ចិន​បាន​ចូល​អន្តរាគមន៍​ជួយ​ខាង​កូរ៉េខាងជើង​។ 

​សង្គ្រាម​បានអូសបន្លាយ​រហូតដល់​ឆ្នាំ​១៩៥៣​ទើប​បញ្ចប់ តែ​ការបញ្ចប់​កាលនោះ ពុំមាន​ការចុះ​កិច្ចព្រមព្រៀង​សន្តិភាព​ជា​ផ្លូវ​ការណ៍​ឡើយ ដោយ​គ្រាន់តែ​ប្រកាស​បទ​ឈប់​បាញ់​គ្នា រហូតមកទល់​បច្ចុប្បន្ន​។ សង្គ្រាម​រយៈពេល​៣​ឆ្នាំ​បាន​បណ្តាលឲ្យ​មនុស្សជិត​៥​លាន​នាក់​ស្លាប់ ក្នុងនោះ​ជាង​ពាក់កណ្តាល​ជា​ជន​ស៊ីវិល​។ ក្រោយ​សង្គ្រាម​កូរ៉េ​រលត់​ទៅ អាមេរិក​បន្ត​រក្សា​កង​ទ័ព​ទុក​ក្នុងប្រទេស​កូរ៉េខាងត្បូង ដើម្បី​ការពារ​សម្ព័ន្ធមិត្ត ពី​ការ​ជ្រែ​ត​ជ្រែក​ដោយ​ប្រទេសជិតខាង​។ បច្ចុប្បន្ន​កងទ័ព​អាមេរិក​ចំនួន​២៨,៥០០​នាក់​មាន​វត្ត​មាននៅ​ឧបទ្វីប​កូរ៉េ​៕ ដោយ​៖​អ៊ុន សុខ​ឡា​

 ពាក្យគន្លឹះ  សង្រ្គាមកូរ៉េ

ព័ត៌មានផ្សេងទៀត