លោក​គីម ជុង​អ៊ុន​សម្រេច​ផ្អាក​សកម្មភាព​យោធា​ប្រឆាំង​នឹង​កូរ៉េខាងត្បូង​

24-06-2020 5:24 pm 1725

​ប្រព័ន្ធ​ផ្សព្វផ្សាយ​រដ្ឋ​របស់​កូរ៉េខាងជើង បញ្ជាក់​នៅ​ថ្ងៃ​ពុធ​នេះ​ថា លោក​គីម ជុង​អ៊ុន​ប្រធានាធិបតី​កូរ៉េខាងជើង បាន​សម្រេច​បញ្ឈប់​សកម្មភាព​យោធា ដើម្បី​ប្រឆាំង​សងសឹក​ទៅនឹង​ប្រទេស​កូរ៉េខាងត្បូង​។ ការ​សម្រេ​ផ្អាក​សកម្មភាព​យោធា​របស់​កូរ៉េខាងជើង ធ្វើឡើង​នៅក្នុង​កិច្ចប្រជុំ​គណៈកម្មាធិកា​យោធា​កណ្ដាល​នៅ​ថ្ងៃ​អង្គារ៍​ទី​២៣​ខែ​មិថុនា​ឆ្នាំ​២០២០​។ 

​ការសម្រេច​ផ្អាក​សកម្មភាព​យោធា​ប្រឆាំង​ទៅ​នឹង​កូរ៉េខាងត្បូង​នេះ ធ្វើឡើង​បន្ទាប់​ពី​កូរ៉េខាងជើង ធ្លាប់បាន​ព្រមាន​កូរ៉េខាងត្បូង​ថា ខ្លួន​នឹង​បញ្ជូន​កងទ័ព​ទៅ​តំបន់​ព្រំដែន​រវាង​កូរ៉េ​ទាំង​ពីរ ដោយសារតែ​ខឹង​នឹង​កូរ៉េខាងត្បូង ពុំ​អាច​ទប់ស្កាត់បាន​នូវ​ការ​បង្ហោះ​ចែកចាយ​ខិត្តប័ណ្ណ​រិះគន់ ទៅលើ​របប​ដឹកនាំ​របស់​កូរ៉េខាងជើង ដែល​ចង​ភ្ជាប់​ទៅ​នឹង​បា​ឡុង​ហោះ​។ ខិត្តប័ណ្ណ​រិះគន់​បង្ហោះ​ភ្ជាប់​នឹង​បា​ឡុង​ហោះ​នេះដែរ ជា​ទង្វើរ​របស់​សកម្ម​ជន​ជា​ពលរដ្ឋ​កូរ៉េខាងត្បូង​ក្នុង​ចេតនា​ញុះញង់​និង​បំបែកបំបាក់​ឲ្យ​ពលរដ្ឋ​កូរ៉េខាងជើង​ស្អប់​របប​ដឹកនាំ​របស់​មេដឹកនាំ​របស់ខ្លួន​។ តែ​សម្រាប់​រដ្ឋាភិបាល​កូរ៉េខាងត្បូង​អះអាងថា បាន​ខិតខំ​ទប់ស្កាត់​ទៅនឹង​សកម្មភាព​របស់​ទាំងនេះ ព្រោះ​អាច​បង្ក​ឲ្យ​ពលរដ្ឋ​របស់​ខ្លួន​ដែល​នៅ​តាម​បន្ទាត់​ព្រំដែន​អាច​នឹង​ជួប​ហានិភ័យ​ខ្ពស់​។​

​គួរ​ជម្រាប​ថា ភាព​តានតឹង​នៅក្នុង​ឧបទ្វីប​កូរ៉េ​នេះ​ដែរ បាន​ធ្វើឲ្យ​កូរ៉េខាងជើង​ឈាន​ដល់​ធ្វើការ​បំផ្ទុះ​ចោល​នូវ​អគារ​ការិយាល័យ​ទំនាក់ទំនង​រវាង​កូរ៉េខាងជើង និង​ខាងត្បូង​ចោល ខណៈ​អគារ​នោះ​ទើបតែ​សាងសង់​ឡើង​បាន​២​ឆ្នាំ​ប៉ុណ្ណោះ ហើយ​មិនតែប៉ុណ្ណោះ​ថែមទាំង​បាន​ព្រមាន​ខ្លាំងៗ​ថា​នឹង​បញ្ជូន​ទ័ព​ទៅកាន់​ព្រំដែន​ប្រឆាំង​នឹង​កូរ៉េខាងត្បូង​។ តែ​យ៉ាងណាមិញ​ក្នុង​កិច្ចប្រជុំ​គណៈកម្មាធិកា​យោធា​កណ្ដាល​របស់​កូរ៉េខាងជើង លោក​គីម ជុង​អ៊ុន បាន​និយាយថា​លោក​នឹង​ផ្អាក​សកម្មភាព​យោធា​ប្រឆាំង​នឹង​កូរ៉េខាងត្បូង​វិញ​។​

​ដោយឡែក​បើ​យោង​តាម​ចុះផ្សាយ​ដោយ​បណ្ដាញសារព័ត៌មាន​កូរ៉េខាងត្បូង​យុន​ហាប់​បាន​ផ្សាយ​ថា កូរ៉េ​ខាងជើង​បាន​កំពុង​រៀបចំ​តម្លើង​ប្រដាប់​បំពង​សម្លេង​នៅ​តំបន់​គ្មាន​កម្លាំង​យោធា​ឡើង​វិញ​ផង​ដែរ​។ អ្វី​ដែល​កូរ៉េ​ខាងជើង​បាន​បំផ្លាញចោល​និង​បង្កើតឡើង​វិញ សុទ្ធតែ​ជា​អ្វី​ដែល​កូរ៉េ​ទាំង​ពីរ​បាន​ព្រមព្រៀង​បង្កើតឡើង​និង​ដកចេញ នៅក្នុង​ជំនួប​ចរចា​រវាង​លោក​គីម ជុង​អ៊ុន​ប្រធានាធិបតី​កូរ៉េខាងជើង​និង​លោក​មូន ជែ​អ៊ីន​ប្រធានាធិបតី​កូរ៉េខាងត្បូ​ង​កាលពី​ឆ្នាំ​២០១៨៕​

ដោយ​៖ យឺន សីហា​

ព័ត៌មានផ្សេងទៀត