កូរ៉េខាងជើង​ត្រៀម​យុទ្ធនាការ​បង្ហោះ​ខិត្តប័ណ្ណ​ប្រឆាំង​កូរ៉េខាងត្បូង​

20-06-2020 3:13 pm 346

​ខិត្តប័ណ្ណ​គ​រលើ​គ្នា​ជា​ពំនូក​ដូច​ភ្នំ ត្រូវបាន​គេ​តៀម​ទុក ដើម្បី​បម្រើ​នៅក្នុង​យុទ្ធនាការ​ចែកចាយ​ខិត្តប័ណ្ណ​ប្រឆាំងនឹង​កូរ៉េខាងត្បូង ជា​លក្ខណៈ​ទ្រង់ទ្រាយ​ធំ​។ ទីភ្នាក់ងារសារព័ត៌មាន​រដ្ឋ​កូរ៉េខាងជើង​ហៅ​កាត់​ថា KCNA បាន​ចុះផ្សាយ​នៅ​ថ្ងៃ​សៅរ៍​ទី​២០​ខែមិថុនា​ឆ្នាំ​២០២០​នេះ​ថា ប្រជាជន​កូរ៉េខាងជើង​ដែលមាន​កំហឹង​ពាសពេញ​ប្រទេស កំពុងតែ​ត្រៀមលក្ខណៈ សម្រាប់​ការចាប់ផ្តើម​ការ​ចែកចាយ​ខិត្តប័ណ្ណ​នេះ នៅតាម​បន្ទាត់​ព្រំដែន ដើម្បី​សងសឹក​នឹង​កូរ៉េខាងត្បូង​។ កូរ៉េខាងជើង​បាន​សកឲ្យ​កូរ៉េខាងត្បូង​ថា ទាល់តែ​ជួបប្រទះ​ខ្លួនឯង ទើប​យល់​ពី​អារម្មណ៍​អាក់អន់ចិត្ត ដែល​ត្រូវគេ​រិះគន់​នោះ​ថា​វា​យ៉ាងម៉េច​។​

​ក្រសួង​បង្រួបបង្រួម​កូរ៉េខាងត្បូង ដែល​ទទួលខុសត្រូវ​សម្រាប់​ការសន្ទនា​អន្តរ​កូរ៉េ និយាយ​សៅរ៍​នេះ​ថា ផែនការ​របស់​កូរ៉េខាងជើង ក្នុងការ​ចែកចាយ​ខិត្តប័ណ្ណ គឺជា​ការគួរឲ្យ​សោកស្តាយ​បំផុត ហើយ​បាន​ជំរុញ​ឲ្យ​រំសាយ​ផែនការ​នេះ​ជាបន្ទាន់​។ សម្រាប់​កូរ៉េខាងត្បូង សកម្មភាព​ចែកចាយ​ខិត្តប័ណ្ណ​រិះគន់​កូរ៉េខាងជើង​កាលពីពេល​ថ្មីៗ​នេះ មិន​ឆ្លុះបញ្ចាំង​ពី​ឆន្ទៈ​របស់​រដ្ឋាភិបាល​កូរ៉េខាងត្បូង​ឡើយ តែ​ជា​ទង្វើរ​របស់​សកម្មជន​ពីរ​ក្រុម ដែល​ធ្វើឲ្យ​កិច្ចខិតខំ​ប្រឹងប្រែង​ផ្សះផ្សារ រវាង​មេដឹកនាំ​កូរ៉េខាងជើង​និង​ខាងត្បូង កាលពី​ឆ្នាំ​២០១៨​ត្រូវ​ប្រេះឆា​។ ប្រេះឆា ដោយសារតែ​សមិទ្ធផល​ដែល​សម្រេចបាន​ពី​កិច្ចចរចា​នោះ ត្រូវ​កូរ៉េខាងជើង​កម្ទេចចោល​អស់​ទៅហើយ ដោយសារតែ​ការ​ខឹងសម្បារ​នឹង​ការ​បង្ហោះ​ខិត្តប័ណ្ណ​រិះគន់​។ នៅ​ក្នុងនោះ កូរ៉េខាងជើង​បាន​បំផ្ទុះ​ការិយាល័យ​ទំនាក់ទំនង​រួម​ចោល ថែមទាំង​ប្រកាស​ពង្រឹង​កម្លាំងយោធា​នៅតាម​បណ្តោយ​ព្រំដែន ជាដើម​។​

​បើទោះបីជា​កូរ៉េខាងជើង​ធ្វើបែបនេះ តែ​កូរ៉េខាងត្បូង​មិន​ឆោឡោ​ខឹង​តបត​ទៅវិញ​ឡើយ ដ្បិត​មានការ​អាក់អន់ចិត្ត​ខ្លះ ដោយសារតែ​ត្រូវ​ប្អូនស្រី​លោក​គីម ជុង​អ៊ុន​ស្តីបន្ទោ​សក្តី នៅ​រក្សា​ចិត្តធ្ងន់ ចង់​ចរចា​បន្ថយ​ភាព​តានតឹង​ជាមួយ​កូរ៉េខាងជើង​។ តែ​សំណើរ​នេះ​ត្រូវ​កូរ៉េខាងជើង​ប្រកែក​មិន​ទទួលយក​នៅឡើយ​ទេ​។ បន្ថែម​លើ​នេះ ភាគី​កូរ៉េខាងត្បូង កាន់តែ​រក្សា​ភាព​ស្ងប់​នៅ​ព្រំដែន​។ ក្រុម​ដឹកនាំ​ការ​ចែកចាយ​ខិត្តប័ណ្ណ​និយាយ​នៅ​ថ្ងៃ​សុក្រ​ថា ខ្លួន​បាន​លុបចោល​ផែនការ​បញ្ជូន​ដប​ប្លា​ស្ទិច​រាប់រយ​កញ្ចប់ ដែលមាន​ផ្ទុក​អង្ករ ថ្នាំពេទ្យ​និង​ម៉ាស់ ទៅកាន់​ប្រទេស​កូរ៉េខាងជើង ដោយ​បោះ​ចូល​ក្នុង​សមុទ្រ​ក្បែរ​ព្រំដែន​៕ ដោយ​៖​អ៊ុន សុខ​ឡា​

ព័ត៌មានផ្សេងទៀត