​អ្នកសេដ្ឋកិច្ច​៖​​ការចចារ​ពាណិជ្ជកម្ម​សេរី​កម្ពុជា​-​កូរ៉េខាងត្បូង​​ជា​ការបើកផ្លូវ​ថ្មី​មួយទៀត​សម្រាប់​កម្ពុជា​

18-06-2020 3:55 pm 682
  ស្តាប់
ស្តាប់ជាសំឡេង

​កម្ពុជា​-​កូរ៉េខាងត្បូង នឹង​ចាប់ផ្តើម​ច​ចារ​កិច្ចព្រមព្រៀង​ពាណិជ្ជកម្ម​សេរី (FTA)  នៅ​ខែ​ក្រោយនេះ ពោលគឺ​នៅ​ខែកក្កដា ឆ្នាំ​២០២០​។ ការចចារ​កិច្ចព្រមព្រៀង​ពាណិជ្ជកម្ម​សេរី​នេះ ធ្វើឡើង​បន្ទាប់​ភាគី​ទាំងពីរ​បានបញ្ចប់​ការសិក្សា​ពី​សក្តានុពល និង​បាន​ចុះ​អនុស្សារណៈ​នៃ​ការយោគយល់​គ្នា (MoU) លើ​វិស័យ​ពាណិជ្ជកម្ម កាលពី​ចុងឆ្នាំ​២០១៩​។​

​លោក ងែ​ត ជូ អ្នកជំនាញ​ខាង​សេដ្ឋកិច្ច បាន​លើកឡើងថា កិច្ច​ច​ចារ​ខាងលើនេះ​អាចជា​ការបើកផ្លូវ​ថ្មី​មួយទៀត​សម្រាប់​កម្ពុជា ប៉ុន្តែ​លោក​ថា ត្រូវ​ពិនិត្យមើល​ឱ្យ​លម្អិត តើ​ទៅ​ថ្ងៃ​អនាគត​កម្ពុជា​អាច​នាំ​អ្វី​ចេញទៅ​ទីផ្សារ​កូរ៉េខាងត្បូង ហើយ​កូរ៉េខាងត្បូង អាច​នាំ​អ្វីខ្លះ​ចូលមក​លក់​នៅ​កម្ពុជា​? សម្រាប់​លោក ង៉ែត ជូ លោក​ថា ការចចារ​កិច្ចព្រមព្រៀង​ពាណិជ្ជកម្ម​សេរី​រវាង​កម្ពុជា​-​កូរ៉េខាងត្បូង លោក​មិន​ប្រាកដថា​កម្ពុជា​មាន​ផលចំនេញ​អ្វី​នាពេល​បច្ចុប្បន្ននេះ​ទេ ដោយសារតែ​កម្ពុជា​នាំចូល​ច្រើនជាង​នាំចេញ​…………

​សំឡេង​លោក​ង៉ែត ជូ​៖

​បើទោះជា​បែបនេះ​ក្ដី​អ្នកជំនាញ​សេដ្ឋកិច្ច​រូបនេះ​និយាយថា រាជរដ្ឋាភិបាល​អាច​សិក្សា​លម្អិត​ពី​លទ្ធភាព​ក្នុង​ការនាំចេញ​ផលិតផល​មួយចំនួន​ហើយ ដូច្នេះ​ផលិតផល​មួយចំនួន​របស់​កម្ពុជា​អាច​នឹងធ្វើ​ការនាំចេញ​ទៅ​លក់​នៅ​ប្រទេស​កូរ៉េខាងត្បូង​បាន​។ ប៉ុន្តែ​លោក​បញ្ជាក់ថា កាល​លោក​ធ្វើការ​នៅ​វិ​ស័យកសិកម្ម ផលិតផល​កសិកម្ម​មួយចំនួន​ដែល​គ្រោង​នាំ​ចេញទៅ​លក់​នៅ​ប្រទេស​កូរ៉េខាងត្បូង ការនាំចេញ​ទៅ​លក់​នៅមាន​តិចតួច​នៅឡើយ​។​

​សម្រាប់​លោក ង៉ែត ជូ ប្រសិនបើ​ការចចារ​កិច្ចព្រមព្រៀង​ពាណិជ្ជកម្ម​សេរី​រវាង​កម្ពុជា​-​កូរ៉េខាងត្បូង ទទួលបាន​ជោគជ័យ​មែន កម្ពុជា​នឹង​ខាតបង់​ចំណូល​ពី​ការបង់ពន្ធ​នាំចូល​ពី​កូរ៉េខាងត្បូង ដោយសារតែ​ការ​នាំចូល​និង​នាំចេញ​ទំនិញ​នៃ​ប្រទេស​ទាំងពីរ មិន​តម្រូវឱ្យមាន​ការបង់ពន្ធ​ទេ​។ លោក​បញ្ជាក់ថា កម្ពុជា​គួរតែ​ពង្រឹង​លើ​ការផលិត​ទាក់ទង​នឹង​វិស័យ​កសិកម្ម សម្រាប់ធ្វើ​ការនាំចេញ​ទៅ​ប្រទេស​កូរ៉េខាងត្បូង​។​

​អ្នកនាំពាក្យ​ក្រសួង​ពាណិជ្ជកម្ម លោក ស៊ា​ង ថៃ បាន​បញ្ជាក់ថា កិច្ចព្រមព្រៀង​ពាណិជ្ជកម្ម​សេរី​រវាង​កម្ពុជា​-​កូរ៉េខាងត្បូង​នេះ នឹង​ជួយ​ឱ្យ​ភាគី​ទាំងពីរ ទទួលបាន​ផលចំណេញ​ទៅវិញទៅមក​។ លោក​បន្ថែមថា ក្រៅពី​វិស័យ​ពាណិជ្ជកម្ម​ទំនិញ​នោះ វិស័យ​សេវាកម្ម វិស័យ​វិនិយោគ នឹង​ផ្ដល់​ផលប្រយោជន៍​ជាច្រើន​ឱ្យ​គ្នា​ទៅមក​ទៀតផង​។​«​ផលិតផល​សក្ដានុពល​របស់​កម្ពុជា សម្រាប់ធ្វើ​ពាណិជ្ជកម្ម​ជាមួយ​ប្រទេស​កូរ៉េខាងត្បូង គឺមាន​ផលិតផល​វាយនភ័ណ្ឌ [​សម្លៀកបំពាក់ ស្បែកជើង ផលិតផល​ធ្វើ​ពី​ស្បែក​] និង​ផលិតផល​កសិកម្ម​មួយចំនួន​»​។​

​កូរ៉េខាងត្បូង​ជា​ប្រទេស​គោលដៅ​ទី​២​ហើយ នៃ​ការឈាន​សម្រេចបាន​នូវ​កិច្ចព្រមព្រៀង​ពាណិជ្ជកម្ម​សេរី​ជាមួយគ្នា បន្ទាប់ពី​កម្ពុជា​ចរចា​កិច្ចព្រមព្រៀង​នេះ​ជាមួយ​ប្រទេស​ចិន​បានជា​ផ្លូវការ ដែល​គ្រោង​នឹង​ចុះហត្ថលេខា​លើ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី នា​ចុងឆ្នាំ​២០២០​។ ក្រៅពី​ប្រទេស​ចិន និង​កូរ៉េខាងត្បូង រដ្ឋាភិបាល​កម្ពុជា ក៏បាន​បង្កើត​ក្រុមការងារ​ជំនាញ​ដើម្បី​សិក្សា និង​រៀបចំ​គោលនយោបាយ យុទ្ធសាស្ត្រ​ចរចា ក្នុង​ការបង្កើត​កិច្ចព្រមព្រៀង​ពាណិជ្ជកម្ម​សេរី ជាមួយ​ប្រទេស​ធំៗ​គោលដៅ​ចំនួន​៦​ទៀត​។ ក្នុងនោះ សហភាព​សេដ្ឋកិច្ច​អឺ​រ៉ាស៊ី (EAEU) ជា​អង្គការ​សមាហរណកម្ម​ថ្នាក់​តំបន់​នៅ​អាស៊ី​ខាងលិច  អាស៊ី​ខាងកើត និង​អាស៊ី​កណ្តាល​, ប្រទេស​អង់គ្លេស អាមេរិក ជប៉ុន ម៉ុង​ហ្គោលី ឥណ្ឌា ជាដើម​៕ 
 

ព័ត៌មានផ្សេងទៀត