​តុលាការ​បារាំង​​សម្រេច​ដាក់​លោក​សម រង្ស៊ី​​ស្ថិតក្រោម​ការចោទប្រកាន់បទ​​បរិហារកេរ្តិ៍​លោក​ហ៊ុន សែន​​

18-06-2020 11:59 am 2799

​ក្រុម​មេធាវី​រាជរដ្ឋាភិបាល​កម្ពុជា ដែល​បានទទួល​ព័ត៌មាន​ផ្ទាល់​ពី​មេធាវី​បារាំង​ការពារ​ក្តី​ជូន​លោក​នាយករដ្ឋមន្ត្រី ហ៊ុន សែន នៅ​ទី​ក្រុងប៉ារីស បាន​ប្រាប់​អង្គភាព​ព័ត៌មាន Fresh News ថា ចៅក្រម​ស៊ើបសួរ​នៃ​តុលាការ​ព្រហ្មទណ្ឌទី​ក្រុងប៉ារីស បានសម្រេច​ដាក់​លោកសម រង្សីឲ្យ​ស្ថិតនៅក្រោម​ការចោទប្រកាន់​ពីបទ «​បរិហារកេរ្តិ៍​ជា​សាធារណ​:​លើ​បុគ្គល​» គឺ​បាន​ធ្វើឡើង​កាលពី​ថ្ងៃទី​៨ ខែមិថុនា ឆ្នាំ​២០២០​។​

​សារព័ត៌មាន​ដែល​ស្និទ​នឹង​រដ្ឋាភិបាល បាន​សរសេរ​រៀបរាប់ថា ចៅក្រម​ស៊ើបសួរ​បារាំង​បាន​កត់សម្គាល់ថា មាន​តម្រុយ និង​ភស្តុតាង​គ្រប់គ្រាន់ និង​ស៊ីសង្វាក់​ដែល​អាច​បញ្ជាក់ថា លោក សម រង្ស៉ី បាន​ប្រព្រឹត្ត​បទល្មើស​ដូចដែល​បាន​ចោទប្រកាន់​ខាងលើ ហើយ​លោក សម រង្ស៊ី ពុំមាន​មូលដ្ឋាន​ផ្លូវច្បាប់ ដែល​អាច​ប្រកែក​ដោះ​បន្ទុក ឬ​ធ្វើ​ការជំទាស់​ទៅនឹង​ពាក្យសម្ដី​របស់ខ្លួន ដែល​ត្រូវបាន​ចោទប្រកាន់​នោះទេ​។​

​សូមបញ្ជាក់ថា កាលពី​ថ្ងៃទី​២០ ខែ​សីហា ឆ្នាំ​២០១៩ លោក ហ៊ុន សែន តាមរយៈ​មេធាវី​របស់ខ្លួន និង​មេធាវី​បារាំង បានសម្រេច​ដាក់​ពាក្យបណ្តឹង​ជា​ផ្លូវការ ប្តឹង​លោកសម រង្ស៊ី ពីបទ «​បរិហារកេរ្តិ៍​ជា​សាធារណៈ​លើ​បុគ្គល​» ទៅកាន់​តុលាការ​ទី​ក្រុងប៉ារីសប្រទេស​បារាំង​៕

ព័ត៌មានផ្សេងទៀត