លោក​ប្រាក់ សុខុន​៖​​ប្រទេស​ទាំងអស់​​ចាំបាច់​​ត្រូវ​ទទួលបាន​​ថ្នាំ​បង្ការ​​និង​វ៉ាក់សាំង​​កូវី​ដ​-១៩

18-06-2020 11:03 am 373
លោកប្រាក់ សុខុនក្នុងពេលចូលរួមកិច្ចប្រជុំតាមប្រព័ន្ធវីដេអូ

​កាលពី​ថ្ងៃទី​១៧​មិថុនា​នេះ​រដ្ឋមន្ដ្រី​ក្រសួងការបរទេស​កម្ពុជា​លោក​ប្រាក់ សុខុន បាន​ចូលរួម​កិច្ចប្រជុំ​ពិសេស​រដ្ឋមន្ដ្រីការបរទេស​អាស៊ាន​-​រុស្ស៊ី​តាមរយៈ​ប្រព័ន្វ​វីដេអូ​ស្ដីពី​ជំងឺ​ឆ្លងកូវី​ដ​-១៩​។ កិច្ចប្រជុំ​នេះ​សម្របសម្រួល​ដោយ​ឥណ្ឌូនេស៊ី និង​ធ្វើជា​សហប្រធាន​ដឹកនាំ​កិច្ចប្រជុំ​ជាមួយ​រុស្ស៊ី​។ ការរៀបចំ​កិច្ចប្រជុំ​ពិសេស​ឡើង​ដើម្បី​ជា​ផ្នែក​មួយ​នៃ​យុទ្ធសាស្ដ្រ​អាស៊ាន​-​រុស្ស៊ី និង​ជា​ឱកាស​មួយ​សម្រាប់​ភាគី​ទាំងពីរ​ពិភាក្សា​លើ​មធ្យោបាយ​នានា ដើម្បី​លើកកម្ពស់​កិច្ច​សហ​ប្រតិ​ប​ត្ដិ​លើ​គ្រប់​វិស័យ ពិសេស​ក្នុង​វិស័យ​សាធារណៈ​ដើម្បី​ទប់ស្កាត់​ផលប៉ះពាល់​លើ​សេដ្ឋកិច្ចសង្គម ដែល​បណ្ដាលមកពី​ការរីក​រាលដាល​នៃ​ជំងឺ​កូវី​ដ​-១៩​។​

នៅក្នុង​កិច្ចប្រជុំ​នោះដែ​រលោក​ប្រាក់ សុខុន​ក៏បាន​ចែករំលែក​នៅ​ទស្សនៈ​មួយចំនួន​ផងដែរ​គឺ ប្រទេស​ទាំងអស់​ចាំបាច់​ត្រូវ​ទទួលបាន​ទាន់ពេលវេលា​និង​ដោយ​គ្មាន​ការរារាំង នូវ​ថ្នាំ​បង្ការ​និង​វ៉ាក់សាំង​ដែល​ប្រកបដោយ​គុណភាព សុវត្ថិភាព និង​មានតម្លៃ​សមរម្យ ដែលជា​ទំនិញ​រួម​របស់​ពិភពលោក​។ ដើម្បី​ប្រយុទ្ធ​ប្រឆាំងនឹង​ការគំរាមកំហែង​នា​ពេលអនាគត ដូចជា​ជំងឺ​រាតត្បាត​ជាដើម ពហុភាគី​និយម​គឺជា​អ្វីដែល​មិនអាច​ខ្វះ​បាន ដោយសារ​បណ្ដា​ប្រទេស​នានា​ត្រូវការ​ការសម្របសម្រួល និង​ការឆ្លើយតប​រួមគ្នា​ថែមទៀត​ដោយ​ផ្អែកលើ​ទិន្ន័យ​វិទ្យាសាស្ដ្រ​និង​ភស្ដុតាង​។​

​លោក​រដ្ឋមន្ដ្រី​បាន​បន្ថែមទៀតថា ភាគី​ទាំងពីរ​គួរតែ​បន្ដ​ទាញ​ការគាំទ្រ​ពី​ដៃគូ​ក្នុង​តំបន់ ដើម្បី​អនុវត្ដ​ប្រកបដោយ​ប្រសិទ្ធភាព​នូវ​ផែនការ​សកម្មភាព​ទីក្រុង​ម៉ានីល ដើម្បី​ជំរុញ​សេចក្ដីប្រកាស​ទី​ក្រុងភ្នំពេញ​ស្ដីពី​គំនិត​ផ្ដួចផ្ដើម​អភិវឌ្ឍ​កិច្ចប្រជុំ​កំពូល​អាស៊ី​បូព៌ា​ឆ្នាំ​២០១៨-២០២២ ដែល​ផ្ដល់​អាទិភាព​ដល់​កិច្ចសហប្រតិបត្ដិការ​លើ​បញ្ហា​សុខភាព​ពិភពលោក​និង​ជំងឺឆ្លង​រាតត្បាត​នានា​។ ក្រៅពីនេះ​លោក​គូសបញ្ជាក់​ទៀតថា ដោយ​ទទួលស្គាល់​នូវ​តួនាទី​ចម្បង​របស់​អង្គការ​សុខភាព​ពិភពលោក នៅក្នុង​ការប្រយុទ្ធប្រឆាំង​ជំងឺ​កូវី​ដ​-១៩ កម្ពុជា​រីករាយ​ដែល​អាស៊ាន​និង​រុស្ស៊ី​បាន​គាំទ្រ​ការ​អនុម័យ​សេចក្ដីសម្រេចចិត្ដ​ដោយ​សម័យប្រជុំ​សភា​សុខភា​ពពិភពលោក​កាលពី​ខែឧសភា​កន្លងមក និង​បាន​ទទួលស្គាល់​សារសំខាន់​នៃ​វិធានការ​អនុ​វត្ដិ​វិធានការ​សុខភាព​នានា ស្របតាម​សារាចរ​សុខភាព​អន្ដរជាតិ​ឆ្នាំ​២០០៥​។​

​លោក​ប្រាក់ សុខុន​លើកឡើង​ដែរថា អាស៊ាន​និង​រុស្ស៊ី​អាចធ្វើ​កិច្ចសហប្រតិបត្ដិការ​ជាមួយគ្នា​បាន​ច្រើន​ថែមទៀត ដើម្បី​ធ្វើឲ្យ​សេដ្ឋកិច្ច​រីកលូតលាស់​ឡើងវិញ​តាមរយៈ​ការធ្វើ​លំហូរ​ពាណិជ្ជកម្ម វិនិយោគ និង​ទេសចរណ៍ ឲ្យបាន​ខ្លាំងក្លា​បំផុត ដែលជា​ផ្នែក​មួយ​នៃ​ដំណាក់កាល​ស្ដារ​សេដ្ឋកិច្ច​ឡើងវិញ​បន្ទាប់ពី​វិបត្ដិកូ​វីដ​-១៩​។ ក្នុងនាម​ជា​ប្រទេស​សម្របសម្រួល​ទំនាក់ទំនង​នៃ​គូសន្ទនា​អាស៊ាន​-​រុស្ស៊ី​សម្រាប់​ឆ្នាំ​២០២១-២០២៤​ខាងមុខ កម្ពុជា​នឹង​ខិត្ដ​ខំប្រឹងប្រែង​ឲ្យអស់​ពី​សមត្ថភាព​ដើ​ម្បី​ថែបំប៉ន និង​ពង្រឹង​ថែមទៀត​នូវ​ទំនាក់ទំនង​ដៃ​គូសន្ទនា​នេះ ជា​ប្រយោជន៍​ដល់​សន្ដិភាព ស្ថិរភាព និង​វិបុលភាព​សម្រាប់​ទាំងអស់គ្នា​។​

​គួរ​ជម្រាបជូន​ដែរថា នៅក្នុង​កិច្ចប្រជុំ​កំពូល​បានអនុម័ត​សេចក្ដីប្រកាស​រួម​រវាង​រដ្ឋមន្ដ្រីការបរទេស​អាស៊ាន​-​រុស្ស៊ី ស្ដីពី​ជំងឺ​ឆ្លងកូវី​ដ​-១៩ ហើយ​ទន្ទឹងរង់ចាំ​ការចូលរួម​បន្ថែមទៀត​រវាង​អាស៊ាន​និង​រុស្ស៊ី ដើម្បី​សម្របសម្រួល​ការឆ្លើយតប​រួមគ្នា​ចំពោះ​បញ្ហា​សុខភាព​ពិភពលោក​៕

​ដោយ​៖​ពេញ ផេង​

ព័ត៌មានផ្សេងទៀត