កូរ៉េខាងជើង​​ចាប់ផ្ដើម​​ពង្រឹង​សមត្ថភាព​​ទប់ទល់​​ការគំរាមកំហែង​​របស់​អាមេរិក​

12-06-2020 3:23 pm 596

​ប្រទេស​កូរ៉េខាងជើង​បានបញ្ជាក់​ថា ខ្លួន​នឹង​ខិតខំ​បន្ថែមទៀត​ទប់ស្កាត់​សង្គ្រាម​នុយក្លេអ៊ែរ ដើម្បី​ឆ្លើយតប​នឹង​សហរដ្ឋអាមេរិក​ដែល​កំពុង​បន្ដ​គោលនយោបាយ​អរិភាព​។ រដ្ឋមន្ដ្រី​ក្រសួងការបរទេស​កូរ៉េខាងជើង​លោក​Ri Son Gwon បានចេញ​សេចក្ដីថ្លែងការណ៍​មួយ​នៅ​ថ្ងៃទី​១២​មិថុនា​នេះ ចំ​ខួប​ពីរ​ឆ្នាំ​នៃ​កិច្ច​ជំនួប​លោក​គីម ជុង​អ៊ុន​និង​លោក​ដូណាល់ ត្រាំ​នៅ​ប្រទេស​សិង្ហ​បុរី​។ 

​នៅក្នុង​សេចក្ដីថ្លែងការណ៍​បាន​និយាយថា កូរ៉េខាងជើង​បាន​ផ្អាក​ធ្វើតេស្ដ​អាវុធ​នុយក្លេអ៊ែរ​និង​មី​ស៊ី​ល​ឆ្លង​ទ្វីប​ICBM ប៉ុន្ដែ​អាមេរិក​កំពុង​ណែនាំ​គ្រឿង​សព្វាវុធ​ដូចជា​យន្ដហោះ​បំបាំងកាយ និង​យន្ដហោះ​គ្មាន​មនុស្ស​បើក​ទៅ​កូរ៉េខាងត្បូង​ទៅវិញ​។ ដូច្នេះ​គោលដៅ​យុទ្ធសាស្ដ្រ​ប្រកបដោយ​សុវត្ថិភាព​របស់​កូរ៉េខាងជើង គឺ​បង្កើន​កម្លាំង​បន្ថែមទៀត​ទប់​ទល់នឹង​ការគំរាមកំហែង​ខាង​យោធា​រយៈពេល​វែង​ពី​សហរដ្ឋអាមេរិក​។​

​គួររម្លឹកថា មេដឹកនាំ​កូរ៉េខាងជើង​លោក​គីម ជុង​អ៊ុន​និង​ប្រធានាធិបតី​អាមេរិក​លោក​ដូណាល់ ត្រាំ បាន​ជួបគ្នា​លើកដំបូង​នៅ​សិង្ហ​បុរី​កាលពី​ថ្ងៃទី​១២ ខែមិថុនា ឆ្នាំ​២០១៨​។ ក្រោយ​កិច្ច​ជំនួប​ជា​ប្រវត្ដិសាស្ដ្រ​សម្រេចបាន​លទ្ធផល​គួរឲ្យកត់សម្គាល់​។ តួយ៉ាង​មាន​កិច្ចព្រមព្រៀង​រំលាយ​កម្មវិធី​នុយក្លេអ៊ែរ​កូរ៉េខាងជើង​ជាដើម​។ ប៉ុន្ដែ​កិច្ចព្រមព្រៀង​នេះ​អនុវត្ដ​មិនបាន​ប៉ុន្មាន​ផង​ក៏ត្រូវ​ជាប់គាំង ព្រោះ​ខ្វែងគំនិត​លើ​ការដក​ទណ្ឌកម្មសេដ្ឋកិច្ច​។​

​គិត​មកដល់ពេលនេះ​រយៈពេ​លពីរ​ឆ្នាំ​ហើយ​នៅតែ​មិនអាច​ដោះស្រាយ​ចេញ ខណៈ​កូរ៉េខាងជើង​ទាមទារ​ឲ្យ​អាមេរិកដក​ទណ្ឌកម្ម​សេដ្ឋកិច្ច​ចេញ​ខ្លះ ប៉ុន្ដែ​អាមេរិក​ទទូច​ឲ្យ​កូរ៉េខាងជើង​រំលាយ​នុយក្លេអ៊ែរ​ចោល​មុន​។ ទាស់ទែង​គ្នា​លើ​ចំណុច​នេះហើយ​ទើប​កូរ៉េខាងជើង​ឈប់​បន្ដ​កិច្ចព្រមព្រៀង​ដែល​ឯកភាព​នៅ​សិង្ហ​បុរី​។ កូរ៉េខាងជើង​ធ្លាប់​ឆ្លើយតប​ទៅ​អាមេរិក​ថា ខ្លួន​មិន​អាចឲ្យ​អាមេរិ​កកេងចំណេញ​ដាច់ខាត ត្រូវតែមាន​ការដោះដូរ​ទើប​យុត្ដិធម៌​។ កូរ៉េខាងជើង​មិនអាច​បោះបង់ចោល​នុយក្លេអ៊ែរ​បានទេ ទាល់តែ​អាមេរិក​យល់ព្រម​ដក​ទណ្ឌកម្ម​សេដ្ឋកិច្ច​៕

​ដោយ​៖​ពេញ ផេង​

ព័ត៌មានផ្សេងទៀត