កម្ពុជា​អាច​នាំ​ចេញ​ផ្លែស្វាយ​ស្រស់​ដោយផ្ទាល់​ទៅ​ចិន​ហើយ​

09-06-2020 4:18 pm 546

​រដ្ឋាភិបាល​កម្ពុជា​តាម​រយៈ​ក្រសួង​កសិកម្ម រុក្ខាប្រមាញ់​និង​នេសាទ​នៅ​ថ្ងៃទី​០៩ ខែ​មិថុនា​នេះ បាន​ចុះហត្ថលេខា​លើ​ពិធីសារ​ផ្លូវការ ក្នុង​ការនាំ​ចេញ​ផ្លែស្វាយ​ស្រស់​ទៅកាន់​ប្រទេស​ចិន​ដោយផ្ទាល់​។ 
​ពិធី​នេះ​ធ្វើឡើង​ក្រោម​វត្តមាន​លោក​វេង សាខុន រដ្ឋមន្ត្រី​ក្រសួង​កសិកម្ម  រុក្ខា​ប្រមាញ់ និង​នេសាទ និង​ឯកអគ្គរដ្ឋទូត​សាធារណរដ្ឋ​ប្រជាមានិត​ចិន​ប្រចាំ​នៅ​កម្ពុជា នៅ​ទីស្តីការ​ក្រសួង​កសិកម្ម​។​

​ថ្លែង​ក្នុង​ឱកាស​នេះ​លោក​រដ្ឋមន្ដ្រី វេង សាខុន បាន​មានប្រសាសន៍ថា ផលិតកម្ម​ផ្លែស្វាយ​ស្រស់​នៅ​កម្ពុជា​នាពេល​បច្ចុប្បន្ន បាន​ឡើង​ជា​លំដាប់ ដែល​បង្ហាញ​ពី​សក្តានុពល​នូវ​ភាពចាំបាច់​ត្រូវ​ដោះស្រាយ​រក​ទីផ្សារ​ដើម្បី​នាំចេញ​។​

​លោក​រដ្ឋមន្ត្រី​បាន​គូសបញ្ជាក់ថា តាម​ស្ថិតិ​ចុងក្រោយ​នា​ឆ្នាំ​២០១៩ បានបង្ហាញ​ថា ផ្ទៃ​ដី​ដាំ​ដុះ​ដំណាំ​ស្វាយ​មាន​ចំនួន ១២៤,៣១៩​ហិកតា ផ្ទៃដី​ដែល​អាច​ប្រមូល​ផល​មាន​ចំនួន​៩១,៣៩៨​ហិកតា និង​ទិន្នផល​ជា​មធ្យម​ទទួលបាន​១៥.៨៥​តោន​ក្នុង​មួយ​ហិកតា​ក្នុង​រដូវ ដែល​ជា​មធ្យម កម្ពុជា​អាច​មាន​ផលិតផល​ស្វាយ​ស្រស់​ប្រមាណ​១,៤៤៨,៦៧៧​តោន ក្នុង​មួយ​រដូវ​។​

​នេះ​ជា​ជោគជ័យ​លើ​ក​ទី​២​លើ​ការចរចា ក្នុង​ការនាំ​ចេញ​ផ្លែឈើ​ស្រស់​ពី​កម្ពុជា​ទៅ​ចិន​ដោយ​ផ្ទាល់​ដោយ​ជោគជ័យ​លើក​ទី​១ លើ​ការនាំចេញ​ផ្លែ​ចេក​ស្រស់​ទៅកាន់​ប្រទេស​ចិន​។​ ​ក្រៅពី​ផ្លែស្វាយ​នេះ​កម្ពុជា​ក៏​កំពុង​ចរាចរណ៍​ជាមួយ​ចិន​ក្នុង​ការនាំចេញ​តាងែ​ន (​មៀន​ប៉ែលិន​) ស្រការ​នាគ និង​ទឹកមាត់​ត្រចៀក​កាំ ទៅកាន់​ប្រទេស​ចិន ដោយផ្ទាល់ ផងដែរ​។ បច្ចុប្បន្ន​ផលិតផល​កសិកម្ម​របស់​កម្ពុជា​ចំនួន​៥​មុខ ត្រូវបាន​ភាគី​ចិន​អនុញ្ញាត​ឲ្យ​នាំ​ចេញ ដោយ​ផ្ទាល់​គឺ អង្ករ ចំណិត​ដំឡូង​មី​ក្រៀម ស្វាយចន្ទី និង​ចេក​។​

​បើ​តាម​របាយកាណ៍​របស់​ក្រសួង​កសិកម្ម​បាន​ឲ្យដឹងថា​នៅ​រយៈពេល​៥​ខែ​ដំបូង​ឆ្នាំនេះ កម្ពុជា​បាន​នាំចេញ​ផ្លែស្វាយ​ស្រស់ (​តួលេខ​ផ្លូវការ​) បាន ៤៤,០៩៩ តោន​កើន​ឡើង ប្រមាណ ១៤,៨៨៥​តោន ស្មើនឹង ៥០.៩៥% ដែល​ធៀប​ទៅ​នឹង​រយៈពេល​៥​ខែ ដើមឆ្នាំ​២០១៩ មាន​ចំនួន​តែ ២៩,២១៤ តោន​ប៉ុណ្ណោះ​៕ 

​ដោយ​៖ សៅ វិសាល​

ព័ត៌មានផ្សេងទៀត